ເນື່ອງກົນໄກເສດຖະກິດຕະຫຼາດ ພາໃຫ້ມີການແກ່ງແຍ່ງແຂ່ງຂັນ ພາໃຫ້ຄົນເຮົາດີ້ນຮົນທົນສູ້ເພື່ອເອົາຕົວລອດໄປແຕ່ລະວັນ ດ້ວຍການຄ້າຂາຍຫງາຍມື ເຮັດທຸລະກິດ ແຕ່ນ້ອຍຫາໃຫຍ່ ມີມູນຄ່າຕ່ຳຫາສູງ ຈຶ່ງຫຼີກລຽງເລື່ອງທຶນຮອນບໍ່ໄດ້ ຫົນທາງທີ່ຈະສາມາດເປັນໄປໄດ້ກໍຕ້ອງຫາກູ້ຫາຢືມບຸກຄົນອື່ນ ຊຶ່ງບາງຄັ້ງກໍຕ້ອງຢືມຫຼາຍຄັ້ງ ແລະ ຢືມນຳຫຼາຍຄົນ ໂດຍການເອົາຫຼັກຊັບ ຫຼື ເອົາຊັບອັນດຽວນຳໄປຄ້ຳປະກັນນຳຫຼາຍຄົນ.
ສະນັ້ນ ຕ້ອງເຂົ້າໃຈວ່າ ການທີ່ນຳເອົາຊັບອັນດຽວນຳໄປຄ້ຳປະກັນນຳເຈົ້າໜີ້ຫຼາຍຄົນ ແມ່ນການຄ້ຳປະກັນການໃຊ້ແທນໜີ້ສິນ ຫຼື ຫຼາຍພັນທະດ້ວຍຊັບອັນດຽວກັບເຈົ້າໜີ້ຫຼາຍຄົນ ຊຶ່ງປັນຮູບການໜຶ່ງຂອງການຄ້ຳປະກັນຕາມສັນຍາ ເຊັ່ນ: ການຈຳນຳ ແລະ ການຈຳນອງຕາມທີ່ໄດ້ກຳນົດໄວ້ໃນປະມວນກົດໝາຍແພ່ງ ການນຳຊັບດຽວໄປຄ້ຳປະກັນກັບເຈົ້າໜີ້ຫຼາຍຄົນ ຕ້ອງມີເງື່ອນໄຂດັ່ງນີ້:
1. ຊັບທີ່ນຳໄປຄ້ຳປະກັນ ຕ້ອງແມ່ນຊັບຂອງລູກໜີ້ ຫຼື ໃນກໍລະນີທີ່ເປັນຊັບຂອງບຸກຄົນອື່ນ ກໍຕ້ອງມີການເຫັນດີຢ່າງເປັນລາຍລັກອັກສອນ ໂດຍຖືກຕ້ອງຕາມກົດໝາຍໃຫ້ໄປຄ້ຳປະກັນ ເວັ້ນເສຍແຕ່ກົດໝາຍໄດ້ກຳນົດໄວ້ເປັນຢ່າງອື່ນ.
2. ຊັບທີ່ນຳໄປຄ້ຳປະກັນ ຕ້ອງມີມູນຄ່າເກີນໜີ້ສິນໃນເວລາຄ້ຳປະກັນ ລວມທັງການຄ້ຳປະກັນຜ່ານມາຕາມການຕົກລົງກັນ ລະຫວ່າງເຈົ້າໜີ້ກັບລູກໜີ້ ຫຼື ຕາມການຕີມູນຄ່າຊັບໃນເວລານັ້ນ ຈາກອົງການຈັດຕັ້ງ ຫຼື ສະຖາບັນທີ່ກ່ຽວຂ້ອງ.
3. ຕ້ອງມີການກຳນົດ ຫຼື ລະບຸມູນຄ່າທີ່ຍັງເຫຼືອຂອງຊັບດຽວທີ່ນຳໄປຄ້ຳປະກັນຢ່າງ ຈະແຈ້ງໄວ້ໃນສັນຍາຄ້ຳປະກັນກັບເຈົ້າໜີ້ຜູ້ທຳອິດ ແລະ ຜູ້ຖັດໄປ ເວັ້ນເສຍແຕ່ໄດ້ມີການຕົກລົງກັນເປັນຢ່າງອື່ນໄວ້ໃນສັນຍາຄ້ຳປະກັນ.
4. ລູກໜີ້ທີ່ໄດ້ນຳຊັບດຽວໄປຄ້ຳປະກັນ ຕ້ອງແຈ້ງໃຫ້ເຈົ້າໜີ້ຜູ້ທຳອິດຊາບ ກ່ຽວກັບການຄ້ຳປະກັນເພີ່ມ ແລະ ເຈົ້າໜີ້ຜູ້ໃໝ່ ກ່ຽວກັບການຄ້ຳປະກັນຜ່ານມາ ເປັນລາຍລັກອັກສອນລ່ວງໜ້າຢ່າງໜ້ອຍ 15 ວັນ ເພື່ອໃຫ້ເຈົ້າໜີ້ຜູ້ໃໝ່ພິຈາລະນາກ່ຽວກັບການຄ້ຳປະກັນເພີ່ມກັບຕົນ.
5. ໃນກໍລະນີທີ່ຊັບດຽວນັ້ນ ຫາກເປັນອະສັງຫາລິມະຊັບ ເຈົ້າໜີ້ ແລະ ລູກໜີ້ ຕ້ອງໄດ້ຈົດທະບຽນການຄ້ຳປະກັນຄັ້ງທຳອິດກ່ອນ ຕາມທີ່ໄດ້ກຳນົດໄວ້ໃນມາດຕາ 562 ຂອງປະມວນກົດໝາຍແພ່ງ ຈຶ່ງມີສິດນຳໄປຄ້ຳປະກັນເພີ່ມໄດ້ ແລະ ການຄ້ຳປະກັນເພີ່ມຄັ້ງຕໍ່ໄປ ກໍຕ້ອງໄດ້ຈົດທະບຽນ ຈຶ່ງມີສິດນຳໄປຄ້ຳປະກັນໄດ້.
ເຈົ້າໜີ້ແຕ່ລະຄົນ ທີ່ມີການຄ້ຳປະກັນດ້ວຍຊັບດຽວ ຈະໄດ້ຮັບບຸລິມະສິດຕາມທີ່ໄດ້ກຳນົດໄວ້ໃນມາດຕາ 524 ຂອງປະມວນກົດໝາຍແພ່ງ ຊຶ່ງໄດ້ກຳນົດກ່ຽວກັບບຸລິມະສິດໃນການໄດ້ຮັບການໃຊ້ແທນໜີ້ສິນກ່ອນເຈົ້າໜີ້ຜູ້ອື່ນ.
ການຍົກເອົາບັນຫາດັ່ງກ່າວນີ້ມາສະເໜີ ຈຸດປະສົງກໍເພື່ອສ້າງຄວາມຮັບຮູ້ ແລະ ເຂົ້າໃຈຕື່ມອີກໃຫ້ແກ່ເຈົ້າໜີ້ ແລະ ລູກໜີ້ ພ້ອມກັນນີ້ ກໍເພື່ອຫຼີກເວັ້ນບັນຫາທີ່ຈະເກີດຕາມມາ ຊຶ່ງຈະສ້າງຄວາມອັບປະໂຫຍດໃຫ້ແກ່ຝ່າຍໃດຝ່າຍໜຶ່ງ ໃນການປະຕິບັດສັນຍານັ້ນໆ
ໂດຍ: ໄມ້ງັດ