ສູ່ມື້ນີ້ມີເດັກຫຼາຍຄົນຖືກປ່ອຍປະລະເລີຍ ຍ້ອນພໍ່ ຫຼື ແມ່ເສຍຊີວິດ ຫຼື ພໍ່ ແລະ ແມ່ເສຍຊີວິດ ພໍ່ ຫຼື ແມ່ຂາດຄວາມຮັບຜິດຊອບ ຂາດຄວາມສາມາດທາງດ້ານການປະພຶດ ຕິດຢາເສບຕິດ ຫຼີ້ນການພະນັນຈົນໝົດເນື້ອໝົດຕົວ ພໍ່ ຫຼື ແມ່ເຈັບປ່ວຍເປັນພະຍາດຮ້າຍແຮງ ເດັກຈຶ່ງໄດ້ຮັບຄວາມລະກຳລຳບາກໄປຕາມໆກັນ ມີເດັກຈຳນວນໜຶ່ງ ຖືກຂູດຮີດແຮງງານ ຖືກລ່ວງລະເມີດທາງເພດ ເສບຢາເສບຕິດ ຫາກິນຕາມສະຖານທີ່ຊຸມຊົນ ຊຶ່ງມີຄວາມສ່ຽງຕໍ່ຊີວິດ ສຸຂະພາບ ການສຶກສາ ແລະ ບັນຫາອື່ນໆ.
ສະນັ້ນ ເພື່ອເປັນການປ້ອງກັນບັນຫາເຫຼົ່ານີ້ ການຖືຜົນປະໂຫຍດຂອງເດັກເປັນສິ່ງສູງສຸດນັ້ນ ກົດໝາຍຈະຕ້ອງມີມາດຕະການ ເພື່ອປົກປ້ອງເຂົາເຈົ້າແຕ່ຫົວທີ ຍ້ອນພໍ່ແມ່ເດີມຂອງເຂົາເຈົ້າບໍ່ສາມາດເປັນທີ່ເພິ່ງໄດ້ ປະມວນກົດໝາຍແພ່ງ ຈຶ່ງໄດ້ອະນຸຍາດໃຫ້ມີການແຕ່ງຕັ້ງຜູ້ປົກຄອງເດັກ.
ປະມວນກົດໝາຍແພ່ງມາດຕາ 222 ໄດ້ກຳນົດວິທີການແຕ່ງຕັ້ງຜູ້ປົກຄອງໄວ້ດັ່ງນີ້ ພາຍຫຼັງທີ່ໄດ້ຮັບແຈ້ງກ່ຽວກັບເດັກ ຊຶ່ງຂາດການເບິ່ງແຍງດູແລຈາກ ພໍ່ ແມ່ ທີ່ໄດ້ເສຍຊີວິດ ໄດ້ຖືກປົດສິດໃນການເປັນພໍ່ແມ່ເຈັບເປັນ ຫຼື ຍ້ອນສາເຫດອື່ນ ນາຍບ້ານແຕ່ງຕັ້ງຜູ້ປົກຄອງເດັກຢ່າງຊ້າພາຍໃນ 1 ເດືອນ ໂດຍໃຫ້ເລືອກເອົາຈາກຍາດພີ່ນ້ອງໃກ້ຊິດຂອງເດັກ.
ໃນກໍລະນີທີ່ຍາດໃກ້ຊິດ ຫາກບໍ່ຮັບເປັນຜູ້ປົກຄອງ ຫຼື ຍາດໃກ້ຊິດ ມີພຶດຕິກຳໃດໜຶ່ງທີ່ຂັດກັບຜົນປະໂຫຍດຂອງເດັກ ນາຍບ້ານຕ້ອງສະເໜີຕໍ່ສານເປັນຜູ້ພິຈາລະນາຕັດສິນ ແຕ່ງຕັ້ງຜູ້ອື່ນເປັນຜູ້ປົກຄອງເດັກ.
ນາຍບ້ານມີໜ້າທີ່ປະຕິບັດການກວດກາ ການເຄື່ອນໄຫວຂອງຜູ້ປົກຄອງນັ້ນຢ່າງເປັນປະຈຳ ຜູ້ບໍ່ພົ້ນກະສຽນອາຍຸ ຜູ້ບໍ່ມີຄວາມສາມາດທາງດ້ານການປະພຶດ ຜູ້ທີ່ຖືກປົດສິດໃນການເປັນພໍ່ແມ່ ຫຼື ຜູ້ທີ່ມີການປະພຶດບໍ່ເໝາະສົມ ບໍ່ສາມາດແຕ່ງຕັ້ງມາເປັນຜູ້ປົກຄອງເດັກໄດ້.
ຜູ້ປົກຄອງເດັກ ມີພັນທະລ້ຽງດູ ສຶກສາອົບຮົມ ເອົາໃຈໃສ່ຕໍ່ສຸຂະພາບການຮ່ຳຮຽນ ແລະ ປົກປ້ອງສິດ ແລະ ຜົນປະໂຫຍດຂອງເດັກ ຜູ້ປົກຄອງເດັກ ມີສິດເປັນຜູ້ຕາງໜ້າຂອງເດັກໃນການເຮັດສັນຍາ ແລະ ການເຄື່ອນໄຫວຕ່າງໆ.
ເມື່ອເຫັນວ່າ ຜູ້ປົກຄອງເດັກ ຫາກມີການປະພຶດບໍ່ດີ ບໍ່ມີຄວາມສາມາດໃນການປະຕິບັດໜ້າທີ່ ຫຼື ພັນທະຂອງຕົນຢ່າງເໝາະສົມແລ້ວ ອາດຖືກຖອນ ຫຼື ປ່ຽນຜູ້ປົກຄອງກໍໄດ້ຕາມການຕັດສິນຂອງສານ.
ແຕ່ເຖິງຢ່າງໃດກໍຕາມ ກົດໝາຍກໍໄດ້ລະບຸເງື່ອນໄຂທີ່ພາໃຫ້ຜູ້ປົກຄອງເດັກສິ້ນສຸດໄວ້ ໃນກໍລະນີໃດໜຶ່ງ ດັ່ງນີ້: 1. ເມື່ອເດັກຫາກໄດ້ພົ້ນກະສຽນອາຍຸແລ້ວ ໝາຍຄວາມວ່າ ເດັກມີອາຍຸ 18 ປີຂຶ້ນໄປ 2. ຜູ້ປົກຄອງເດັກເສຍຊີວິດ ໝາຍຄວາມວ່າຜູ້ທີ່ຖືກແຕ່ງຕັ້ງຈາກນາຍບ້ານ ຫຼື ຖືກແຕ່ງຕັ້ງຕາມຄຳຕັດສິນຂອງສານໄດ້ເສຍຊີວິດ 3. ຜູ່ປົກຄອງເດັກເສຍຄວາມສາມາດທາງດ້ານການປະພຶດ ໝາຍຄວາມວ່າ ເປັນຄົນບ້າ ຫຼື ເສຍຈິດ ແຕ່ຕ້ອງມີການຢັ້ງຢືນຈາກຊ່ຽວຊານທາງດ້ານຈິດຕະພະຍາດ.
ສິ່ງທີ່ກ່າວມາຂ້າງເທິງນີ້ ແມ່ນຄວາມຈຳເປັນ ແມ່ນຄວາມຮຽກຮ້ອງຕ້ອງການຂອງເດັກຜູ້ຊຶ່ງຂາດຄວາມອົບອຸ່ນ ຂາດກຳລັງໃຈ ຂາດຜູ້ລ້ຽງດູເບິ່ງແຍງ ແລະ ສົ່ງເສີມ ຫາກພວກເຮົາປ່ອຍປະລະເລີຍ ພວກກຸ່ມຄົນບໍ່ດີຈະສວຍໃຊ້ໂອກາດນີ້ ເພື່ອແກ່ດຶງເອົາເດັກໄປສູ່ຫົນທາງທີ່ມືດມົນ ແລະ ຫາຍຍະນະໄດ້ ໂດຍສະເພາະ ພວກເຂົາຈະຢືມມືເດັກເຫຼົ່ານີ້ ສ້າງປາກົດການຫຍໍ້ທໍ້ໃນສັງຄົມນັບມື້ນັບຫຼາຍຂຶ້ນ.
ໂດຍ: ໄມ້ງັດ