ບໍລິສັດ ພູເບ້ຍ ມາຍນິງ ມອບພັນທະອາກອນກຳໄລລ່ວງໜ້າ ລວມມູນຄ່າ 4,1 ໂດລາສະຫະລັດ ໃຫ້ລັດຖະບານລາວ ເຊິ່ງການມອບພັນທະອາກອນດັ່ງກ່າວ ເປັນສ່ວນໜຶ່ງຂອງການປະກອບສ່ວນດ້ານການເງິນຂອງບໍລິສັດໃຫ້ປະເທດລາວ ນອກຈາກຄ່າພາສີຊັບພະຍາກອນແຮ່ທາດ ອາກອນປະເພດຕ່າງໆ ແລະ ພັນທະອື່ນໆ ລວມທັງຄ່າທຳນຽມບໍລິການນຳເຂົ້າ.
ນັບແຕ່ເລີ່ມດຳເນີນງານໃນລາວ ບໍລິສັດ ພູເບ້ຍ ມາຍນິງ ໄດ້ມອບພັນທະອາກອນກຳໄລໃຫ້ລັດຖະບານລາວຢ່າງຕໍ່ເນື່ອງ ຈົນເຖິງທ້າຍປີ 2019 ການມອບພັນທະອາກອນກຳໄລເປັນເງິນສົດຂອງບໍລິສັດ ພູເບ້ຍ ມາຍນິງ ໃຫ້ລັດຖະບານລາວ ມີມູນຄ່າລວມຫຼາຍກວ່າ 259 ລ້ານໂດລາສະຫະລັດ.
ທ່ານ ຈັນເພັງ ບຸນນະຜົນ ປະທານບໍລິສັດ ພູເບ້ຍ ມາຍນິງ ກ່າວວ່າ : ການມອບພັນທະອາກອນກຳໄລລ່ວງໜ້າຄັ້ງນີ້ ສະທ້ອນໃຫ້ເຫັນຢ່າງຊັດເຈນເຖິງຄວາມມຸ່ງໝັ້ນອັນໜັກແໜ້ນຂອງບໍລິສັດ ໃນການປະກອບສ່ວນໂດຍກົງ ເຂົ້າໃນການພັດທະນາເສດຖະກິດຂອງລາວ ສະໜັບສະໜູນມາດຕະຖານການດຳລົງຊີວິດ ແລະ ຊ່ວຍພັດທະນາສັງຄົມຂອງພະນັກງານບໍລິສັດ ພວກເຮົາມີຄວາມມຸ່ງໝັ້ນຢ່າງຕໍ່ເນື່ອງ ຍາວນານຕໍ່ປະຊາຊົນລາວ ພວກເຮົາມີຄວາມພາກພູມໃຈທີ່ໄດ້ປະກອບສ່ວນອັນມີຄ່າໃຫ້ບັນດາຊຸມຊົນທີ່ພວກເຮົາເຂົ້າໄປດຳເນີນງານ ແລະ ໃຫ້ສັງຄົມລາວ ການປະກອບສ່ວນຂອງພວກເຮົາເຂົ້າໃນການພັດທະນາເສດຖະກິດ ເປັນສ່ວນໜຶ່ງທີ່ສຳຄັນ ໂດຍຜ່ານການມອບພັນທະຄ່າພາສີຊັບພະຍາກອນແຮ່ທາດ ອາກອນ ແລະ ພັນທະອື່ນໆ ພວກເຮົາມີຄວາມເຊື່ອໝັ້ນວ່າພວກເຮົາ ຈະມີຜົນສຳເລັດດີໃນປີໃໝ່ທີ່ໃກ້ຈະມາເຖິງນີ້ ເພື່ອສືບຕໍ່ປະຕິບັດຕາມຄວາມມຸ່ງໝັ້ນອັນຕໍ່ເນື່ອງ ຍາວນານດັ່ງກ່າວນີ້.
ພິທີມອບ-ຮັບເງິນດັ່ງກ່າວ ຈັດຂຶ້ນວັນທີ 24 ທັນວາ 2020 ຢູ່ກະຊວງການເງິນ ເຊິ່ງມອບໂດຍທ່ານ ສະຕີບ ກິມເພິລ ຮັກສາການຜູ້ອຳນວຍການບໍລິສັດ ພູເບ້ຍ ມາຍນິງ ແລະ ຮັບໂດຍທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ກະຊວງການເງິນ ມີພາກສ່ວນກ່ຽວຂ້ອງເຂົ້າຮ່ວມ.
# ຂ່າວ & ພາບ: ສະບາໄພ