ບົດປະຈຳວັນນີ້ ຂໍເວົ້າເລື່ອງແພດ-ໝໍ ແລະ ການປິ່ນປົວໃນອາຊີ-ອາຊຽນຂອງພວກເຮົາ ເບິ່ງທັງເບື້ອງຜົນສຳເລັດ ກໍຄື ບັນຫາທີ່ເກີດຂຶ້ນໃນວົງການແພດ ເຊັ່ນ:
ທີ່ຫວຽດນາມ: ໃນປີ 2015 ທາງການຂອງຫວຽດນາມ ໄດ້ລິເລີ່ມສ້າງຮ່າງດຳລັດວ່າດ້ວຍການສັກຢາກັນພະຍາດ ເຊິ່ງຕາມແຜນແລ້ວແມ່ນຕ້ອງໄດ້ຮັບຮອງເອົາ ແລະ ປະກາດໃຊ້ໃນ ປີ 2016 (ວຽງຈັນທາມ 30/7/2015) ດຳລັດດັ່ງກ່າວ ໄດ້ກຳນົດການຊົດເຊີຍໃຫ້ຜູ້ທີ່ໄດ້ຮັບຜົນກະທົບດ້ານສຸຂະພາບຂັ້ນຮ້າຍແຮງ ຍ້ອນການສີດຢາກັນພະຍາດແຫ່ງຊາດ ເຊັ່ນ ຜົນຂ້າງຄຽງ ການເຈັບປ່ວຍ ແລະ ຮ້າຍແຮງຂັ້ນເສຍຊີວິດ ເຈົ້າການທີ່ຮ່າງດຳລັດສະບັບນີ້ ແມ່ນກະຊວງສາທາລະນະສຸກຫວຽດນາມ ກ່ຽວກັບລະດັບການຊົດເຊີຍນັ້ນ ທ່ານຮອງສາສະດາຈານ ເຈິນດັກຟູ (Tran Dac Phu) ຫົວໜ້າກົມການຢາ ເພື່ອປ້ອງກັນຂອງກະຊວງສາທາລະນະສຸກ ໄດ້ໃຫ້ລາຍລະອຽດວ່າ ບຸກຄົນທີ່ຈະໄດ້ຮັບຄ່າຊົດເຊີຍນັ້ນ ລວມມີຜູ້ທີ່ຈຳເປັນຕ້ອງໄດ້ປິ່ນປົວຜົນຂ້າງຄຽງທີ່ຮ້າຍແຮງ ຈາກການສີດຢາ ກໍຄື ຜູ້ເສຍຊີວິດຍ້ອນສາເຫດດຽວກັນ ສ່ວນມູນຄ່າການຊົດເຊີຍນັ້ນ ແມ່ນຂຶ້ນກັບລະດັບຄວາມໜັກໜ່ວງຂອງຜົນຂ້າງຄຽງ ໂດຍໄດ້ກຳນົດໃນອັດຕາແຕ່ 1,05 ລ້ານ-31,5 ລ້ານດົງ (ລະຫວ່າງ 48-1.400 ໂດລາສະຫະລັດໃນເວລານັ້ນ).
ໃນກໍລະນີມີການເສຍຊີວິດ ຍ້ອນການສີດຢາ ຄອບຄົວຜູ້ເຄາະຮ້າຍຈະໄດ້ຮັບເປັນຈຳນວນ 10,5 ລ້ານດົງ (ປະມານ 500 ໂດລາສະຫະລັດ) ເພື່ອຈັດງານຊາປະນາກິດສົບ ອີກເລື່ອງໜຶ່ງກ່ຽວກັບຫວຽດນາມ ນັ້ນກໍຄື ຂ່າວກ່ຽວກັບຜົນສຳຫຼວດທີ່ຊີ້ອອກວ່າ ການບົ່ງພະຍາດຂອງບັນດາແພດຂັ້ນຕາແສງນັ້ນ ສ່ວນໃຫຍ່ແມ່ນຍັງບໍ່ຖືກຕ້ອງ (ໜັງສືພິມວຽງຈັນທາມ 15/12/2016 ອີງຕາມ Vietnam News) ການສຳຫຼວດໄດ້ສຳພາດທ່ານໝໍ ຈຳນວນ 1.000 ຄົນ ທີ່ເຮັດວຽກຢູ່ໂຮງໝໍຂັ້ນເມືອງ 78 ແຫ່ງ ແລະ ສຸກສາລາຂັ້ນຕາແສງ 240 ແຫ່ງ ພາຍໃນ 6 ຕົວເມືອງໃຫຍ່ໃນບັນດາແຂວງຈາກເຂດຕ່າງໆ ຈຸດປະສົງຂອງການສຳຫຼວດທີ່ແກ່ຍາວເປັນເວລາ 1 ປີນີ້ ແມ່ນເພື່ອຕີລາຄາຄຸນນະພາບຂອງພະນັກງານແພດຂັ້ນທ້ອງຖິ່ນ ຜົນການສຳຫຼວດມີດັ່ງນີ້ ມີພຽງ 3% ຂອງທ່ານໝໍທີ່ສາມາດບົ່ງ 5 ພະຍາດໄດ້ຢ່າງຖືກຕ້ອງ ເຊັ່ນ ພະຍາດຖອກທ້ອງຂອງເດັກ ພະຍາດປອດອັກເສບ ວັນນະໂລກ ເບົາຫວານ ປະເພດ 2 ແລະ ຄວາມດັນ ສ່ວນຈຳນວນທ່ານໝໍທີ່ສາມາດບົ່ງພະຍາດໄດ້ໃນຈຳນວນ 3-4 ຊະນິດທີ່ກ່າວມາຂ້າງເທິງນັ້ນ ຢູ່ລະຫວ່າງ 36 ແລະ 48% ສ່ວນຈຳນວນທີ່ບົ່ງຖືກຕ້ອງພຽງ 2 ຊະນິດພະຍາດນັ້ນ ມີ 11% ແລະ 2% ສາມາດບົ່ງພະຍາດຖືກຕ້ອງແຕ່ພຽງຊະນິດດຽວນີ້ເປັນການສຳຫຼວດເມື່ອ 5 ປີຜ່ານມາແລ້ວ ໃນປັດຈຸບັນ ການແພດຂອງຫວຽດນາມ ໄດ້ຮັບການພັດທະນາຢ່າງວ່ອງໄວໄປທັນຍຸກ ເຖິງຂັ້ນວ່າທາງການຫວຽດນາມ ໄດ້ຕັ້ງເປົ້າໝາຍສ້າງຫວຽດນາມ ໃຫ້ເປັນສູນກາງການທ່ອງທ່ຽວ ເພື່ອສຸຂະພາບລະດັບພາກພື້ນ ແລະ ໂລກ.
ທີ່ ສ ເກົາຫຼີ ຂ່າວຈາກ ສ ເກົາຫຼີ ໃນທ້າຍປີ 2017 (ວຽງຈັນທາມ 13/12/2017) ໃຫ້ຮູ້ວ່າ ທາງການເກົາຫຼີ ໄດ້ລິເລີ່ມໂຄງການບົ່ງມະຕິພະຍາດດ້ວຍລະບົບດີຈີຕອນ ນີ້ຄືຫົວຄິດລິເລີ່ມຂອງມະຫາວິທະຍາໄລການແພດ ນະຄອນຫຼວງເຊອູນ ແລະ ສູນການແພດຂອງບໍລິສັດຊຳຊຸງ ທັງສອງພາກສ່ວນໄດ້ເຊັນບັນທຶກຄວາມເຂົ້າໃຈຮ່ວມກັນ ໃນເດືອນທັນວາ ປີ 2017 ນີ້ເອງ ໂຄງການທີ່ວ່າມີເປົ້າໝາຍສ້າງຄວາມສະດວກສະບາຍໃຫ້ແກ່ຄົນເຈັບ ຄື ສາມາດຮັບການບົ່ງມະຕິໂດຍຜ່ານໜ້າຈໍໂທລະສັບມືຖື ບໍ່ຈຳເປັນໄປພົບທ່ານໝໍຢູ່ຄຼີນິກ ຫຼື ສູນປິ່ນປົວໃຫ້ທ່ານໝໍບົ່ງມະຕິພະຍາດ ບົ່ງຢາປິ່ນປົວ ເຊິ່ງເປັນການເສຍເວລາ ແລະ ສິ້ນເປືອງ ໂດຍບໍ່ມີຄວາມຈຳເປັນ.