ທີມນັກວິໄຈຈາກມະຫາວິທະຍາໄລລີດ ໃນສະຫະລາຊະອານາຈັກອັງກິດ ໄດ້ສ້າງແຜ່ນຄຳທີ່ມີຄວາມໜາພຽງ 0,47 ນາໂນແມັດ ໄດ້ສຳເລັດເປັນຄັ້ງທຳອິດຂອງໂລກ (ໜາເທົ່າກັບ 2 ອະຕອມ).
ຄຳ ເປັນວັດສະດຸສຳຄັນໃນອຸດສາຫະກຳ ເອເລັກໂຕຣນິກ ດ້ວຍຄຸນສົມບັດທີ່ແສນພິເສດ ນັ້ນຄືມັນບໍ່ເຮັດປະຕິກິລິຍາກັບອົກຊິແຊນໃນອາກາດ ເຮັດໃຫ້ຄຳບໍ່ເປັນຂີ້ໝ້ຽງ ດັ່ງນັ້ນ ມັນຈຶ່ງຖືກນຳໄປໃຊ້ໃນການເຄືອບຜິວອຸປະກອນຂະໜາດນ້ອຍ ນອກຈາກນີ້ ມັນຍັງເປັນຕົວເລັ່ງປະຕິກິລິຍາທີ່ມີປະສິດທິພາບສູງ ເປັນຕົວສະທ້ອນຄວາມຮ້ອນໄດ້ດີ ຈຶ່ງມີການນຳໄປໃຊ້ໃນວົງການອະວະກາດດ້ວຍ ແລະ ທີ່ສຳຄັນ ຄຳຍັງສາມາດເຮັດວຽກໄດ້ ເຖິງແມ່ນຈະຖືກເຮັດໃຫ້ເປັນແຜ່ນບາງພຽງໃດກໍຕາມ ຈົນເອີ້ນໄດ້ວ່າເປັນແຜ່ນຄຳ 2D ເນື່ອງຈາກໄຮ້ຄວາມໜາໃນມິຕິທີ 3 ກໍວ່າໄດ້.
ທີ່ແລ້ວມາ ການຜະລິດແຜ່ນຄຳໃຫ້ບາງ ເພື່ອນຳມາໃຊ້ໃນວົງການອຸດສາຫະກຳນັ້ນ ຫຼັກໆຄືການເຮັດກຳໄລຈາກການປະຢັດຕົ້ນທຶນ ແຕ່ຈາກນີ້ໄປ ຫາກແຜ່ນຄຳ 2D ນີ້ຖືກນຳໄປໃຊ້ໃນວົງການອຸດສາຫະກຳ ກໍຈະເຮັດໃຫ້ຕົ້ນທຶນຫຼຸດຈາກເດີມລົງໄປຢ່າງຫຼວງຫຼາຍ ເນື່ອງຈາກໃຊ້ຄຳໃນປະລິມານໜ້ອຍກວ່າທີ່ແລ້ວໆມາ ໃນການຜະລິດຢ່າງເຫັນໄດ້ຈະແຈ້ງ ຄຳ 2D ນີ້ ສ້າງຂຶ້ນໂດຍການສັງເຄາະມາຈາກກົດ chloroauric ເຊິ່ງເປັນສານລະລາຍທີ່ມີທາດຄຳເປັນສ່ວນປະກອບ ຈາກນັ້ນ ກໍນຳໄປໃສ່ໃນນ້ຳຢາເຄມີ ອີກຊະນິດໜຶ່ງ ເພື່ອໃຫ້ມັນຟອມຕົວຂຶ້ນມາ ໂດຍບັງຄັບໃຫ້ການຟອມຕົວນັ້ນຢູ່ທີ່ລະດັບຊັບນາໂນ ນັ້ນຄືໃຫ້ໜາພຽງ 2 ອະຕອມ.
ຖືເປັນຄວາມກ້າວໜ້າຂອງວົງການວິທະຍາສາດ ທີ່ມີສ່ວນຊ່ວຍໂດຍກົງຕໍ່ວົງການອຸດສາຫະກຳ ລວມທັງວົງການອື່ນທີ່ກ່ຽວຂ້ອງໃນໂລກຂອງຄຳ.