ທ່ານ ສາລະພິດ ສູນວໍລະວົງ ຄະນະປະຈຳ ເລຂາທິການສະພາປະຊາຊົນນະຄອນຫຼວງວຽງຈັນ (ສປ ນວ) ຖະແຫຼງຂ່າວກ່ຽວກັບການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 10 ຂອງ ສປ ນວ ຊຸດທີ I ວັນທີ 23 ທັນວາ 2020 ວ່າ: ກອງປະຊຸມດັ່ງກ່າວ ຈະດຳເນີນວັນທີ 28-30 ທັນວາ 2020 ຢູ່ຫ້ອງວ່າການປົກຄອງ ນວ ໂດຍຈະພິຈາລະນາ ແລະ ຮັບຮອງເອົາບັນຫາສຳຄັນຕ່າງໆ ຄື: ຮັບຟັງການຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 5 ປີ (2016-2020) ຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2020 ແລະ ທິດທາງແຜນການ ປີ 2021 ທາບທາມ ແລະ ປະກອບຄຳເຫັນຕໍ່ຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງ ນວ (2021-2025) ພິຈາລະນາ ແລະ ຮັບຮອງເອົາບົດລາຍງານການເຄື່ອນໄຫວວຽກງານ ປີ 2020 ແລະ ທິດທາງແຜນການ ປີ 2021 ຂອງອົງການກວດສອບປະຈຳພາກກາງ ບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານ ປີ 2019 ຂອງ ນວ ພິຈາລະນາ ແລະ ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2020 ແລະ ທິດທາງແຜນການເຄື່ອນໄຫວ ປະຈຳປີ 2021 ຂອງອົງການໄອຍະການປະຊາຊົນ ແລະ ສານປະຊາຊົນ ນວ ພິຈາລະນາ ແລະ ຮັບຮອງເອົາການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ (2016-2020) ປີ 2020 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I ແຜນການຮອດກອງປະຊຸມຄັ້ງປະຖົມມະລຶກ ແລະ ຄາດຄະເນແຜນການປະຈຳປີ 2021 ຂອງ ສປ ນວ ຊຸດທີ II ຮັບຟັງການປະກອບຄຳເຫັນຂອງອົງການແນວລາວສ້າງຊາດ ນວ ຕໍ່ການເຄື່ອນໄຫວວຽກງານຂອງ ສປ ນວ ຮັບຟັງການຊີ້ແຈງບັນຫາສຳຄັນຂອງອົງການປົກຄອງ ນວ ໂດຍສະເພາະ ການຊີ້ແຈງກ່ຽວກັບການແກ້ໄຂບັນຫາຢາເສບຕິດໃນສະເພາະໜ້າຢູ່ ນວ ການຈັດສັນຄວາມເປັນລະບຽບຮຽບຮ້ອຍໃນຕົວເມືອງ ແລະ ບັນຫາການຮົກເຮື້ອໃນຕົວເມືອງນະຄອນຫຼວງ ການຄຸ້ມຄອງລາຄາສິນຄ້າຕາມທ້ອງຕະຫຼາດຢູ່ ນວ ການແກ້ໄຂບັນຫາວຽກເຮັດງານທຳຂອງປະຊາຊົນຊາວ ນວ.
ນອກນີ້ ຍັງຈະໄດ້ຮັບຟັງການຊີ້ແຈງຈາກອົງການປົກຄອງ ນວ ຕໍ່ການຊັກຖາມຂອງສະມາຊິກສະພາແຫ່ງຊາດ (ສສຊ) ຊຸດທີ VIII ປະຈຳເຂດເລືອກຕັ້ງທີ 1 ແລະ ສະມາຊິກສະພາປະຊາຊົນນະຄອນຫຼວງວຽງຈັນ (ສສ ນວ) ຊຸດທີ I ຈຳນວນໜຶ່ງ ພ້ອມທັງຮັບຟັງການເຜີຍແຜ່ເອກະສານກ່ຽວກັບການເລືອກຕັ້ງ ສສຊ ຊຸດທີ IX ແລະ ສສ ນວ ຊຸດທີ II ແລະ ມອບຫຼຽນກາທີ່ລະນຶກໃຫ້ ສສ ນວ ຊຸດທີ I ຕື່ມອີກ.
# ຂ່າວ & ພາບ: ສະບາໄພ