ຫຸ່ນຍົນທີ່ສາມາດປຸງແຕ່ງອາຫານໄດ້ ກຳລັງເປັນທີ່ຕ້ອງການເພີ່ມຫຼາຍຂຶ້ນໃນສະຫະລັດ ໂດຍຄວາມຕ້ອງການທີ່ວ່ານີ້ເພີ່ມຂຶ້ນ ໃນໄລຍະທີ່ຮ້ານອາຫານຕ່າງໆພະຍາຍາມທີ່ ຈະກຳນົດໄລຍະຫ່າງລະຫວ່າງພະນັກງານ ແລະ ລູກຄ້າໃນໄລຍະວິກິດການລະບາດຂອງໂຄໂຣນາໄວຣັສ.
ໃນອີກບໍ່ເທົ່າໃດອາທິດນີ້ ຮ້ານອາຫານ White Castle ຈະທົດສອບໃຊ້ແຂນຫຸ່ນຍົນ ທີ່ສາມາດຈືນມັນຝຣັ່ງ ຫຼື French fries ແລະ ເຮັດອາຫານອື່ນໆໄດ້ ໂດຍຫຸ່ນຍົນທີ່ມີ ຊື່ວ່າ Flippy ນີ້ ເປັນຜະລິດຕະພັນຂອງບໍລິສັດ Miso Robotics ທີ່ເມືອງພາຊາເດນາ ລັດກາລິຟໍເນຍ.
ທ່ານ Jamie Richardson ຮອງປະທານ ຮ້ານ White Castle ກ່າວວ່າ ທາງຮ້ານໄດ້ໂອ້ລົມກັບບໍລິສັດ Miso ໃນເລື່ອງການຮ່ວມຫຸ້ນກັນມາປະມານໜຶ່ງປີແລ້ວ ແລະ ການເຈລະຈາດັ່ງກ່າວຈິງຈັງຫຼາຍຂຶ້ນ ເມື່ອເລີ່ມມີການລະບາດຂອງ COVID-19.
ທ່ານ Richardson ກ່າວວ່າ ຫຸ່ນຍົນຊ່ວຍໃຫ້ພະນັກງານມີເວລາໄປເຮັດວຽກອື່ນໆໄດ້ ເຊັ່ນ ເຮັດຄວາມສະອາດໂຕ໊ະ ຫຼື ຮັບລາຍການອາຫານ ເພື່ອໄປສົ່ງໃຫ້ລູກຄ້າທີ່ເຮືອນ ນອກຈາກນີ້ ສະພາບແວດລ້ອມທີ່ປາສະຈາກການສຳຜັດ ກໍມີຄວາມສຳຄັນຕໍ່ລູກຄ້າຫຼາຍຂຶ້ນ ເຂົາຍັງບອກວ່າ ຈາກນີ້ ທົ່ວໂລກຕ້ອງຄິດປັບປ່ຽນຮູບແບບເລື່ອງຄວາມປອດໄພຂອງອາຫານຫຼາຍຂຶ້ນ.
ປັດຈຸບັນ ຫຸ່ນຍົນ Flippy ມີລາຄາຢູ່ທີ່ 30.000 ໂດລາສະຫະລັດ ພ້ອມຄ່າບໍລິການລາຍເດືອນອີກ 1.500 ໂດລາ ໂດຍບໍລິສັດ Miso ມີແຜນທີ່ຈະໃຫ້ຜູ້ປະກອບການຮ້ານອາຫານ ນຳຫຸ່ນຍົນໄປໃຊ້ໂດຍທີ່ບໍ່ຕ້ອງຈ່າຍເງິນຄ່າຊື້ຫຸ່ນຍົນ ແຕ່ຕ້ອງເສຍຄ່າບໍລິການລາຍເດືອນທີ່ສູງຂຶ້ນແທນ.
ຫຸ່ນຍົນເຮັດອາຫານນັ້ນ ກາຍມາເປັນທີ່ນິຍົມຕັ້ງແຕ່ກ່ອນການລະບາດຂອງໂຄໂຣນາໄວຣັສ ເມື່ອໂຮງໝໍ ຮ້ານອາຫານ ຕາມມະຫາວິທະຍາໄລ ແລະ ສະຖານທີ່ອື່ນໆ ພະຍາຍາມທີ່ຈະຫຼຸດຕົ້ນທຶນຄ່າແຮງງານລົງດ້ວຍການໃຊ້ຫຸ່ນຍົນ.
ຕົວຢ່າງເຊັ່ນ ຫຸ່ນຍົນພໍ່ຄົວ ໄດ້ປາກົດຕົວຕາມຮ້ານອາຫານຕ່າງໆມາແລ້ວ ເຊັ່ນທີ່ຮ້ານ Creator ໃນນະຄອນຊານຟຣານຊິສໂກ.
ທັງນີ້ ສູນຄວບຄຸມ ແລະ ປ້ອງກັນໂລກ ສະຫະລັດ ຫຼື CDC ຊີ້ແຈງວ່າ ຄວາມສ່ຽງທີ່ຈະຕິດ COVID-19 ຈາກການສຳຜັດ ຫຼື ກິນອາຫານນອກເຮືອນນັ້ນ ຢູ່ໃນລະດັບຕ່ຳ ແຕ່ກໍມີລາຍງານເລື່ອງການແຜ່ລະບາດຂອງພະຍາດນີ້ ຫຼາຍຕໍ່ຫຼາຍຄັ້ງ ໃນບັນດາພະນັກງານຮ້ານອາຫານ ແລະ ລູກຄ້າ.
ທ່ານ Vipin Jain ຜູ້ຮ່ວມກໍ່ຕັ້ງ ແລະ ເປັນຜູ້ບໍລິຫານຂອງ Blendid ເຊິ່ງເປັນບໍລິສັດສະຕາດອັບທີ່ Silicon Valley ຄາດວ່າ ໃນອີກສອງປີຂ້າງໜ້າ ເຮົາຈະໄດ້ເຫັນການໃຊ້ຫຸ່ນຍົນໃນອຸດສາຫະກຳອາຫານຫຼາຍຂຶ້ນ ເຊິ່ງເປັນເພາະຜົນພວງຈາກ COVID-19.
ຢ່າງໃດກໍຕາມ ຜູ້ສັງເກດການບາງຄົນກ່າວວ່າ ການໃຊ້ຫຸ່ນຍົນອາດເຮັດໃຫ້ຄວາມຕ້ອງການໃນດ້ານແຮງງານຫຼຸດລົງໄດ້.
ທ່ານ Tonya Johnson ຜູ້ອຳນວຍການຝ່າຍບໍລິການໂພຊະນາການທີ່ມະຫາວິທະຍາໄລ University of Arkansas for Medical Sciences ທີ່ເມືອງລິດເຕິລຣັອກ ຕັ້ງຂໍ້ສັງເກດວ່າ ພະນັກງານໃນຄາເຟ່ຂອງມະຫາວິທະຍາໄລ ເຄີຍໃຊ້ເວລາໃນການເຮັດສະຫຼັດວັນລະ 6 ຊົ່ວໂມງ ແຕ່ເມື່ອສອງປີທີ່ຜ່ານມາ ທາງມະຫາວິທະຍາໄລໄດ້ນຳຫຸ່ນຍົນ Sally ມາໃຊ້ ເຊິ່ງສາມາດເຮັດສະຫຼັດໄດ້ປະມານວັນລະ 40 ອໍເດີ.
ການເພີ່ມ Sally ເຂົ້າມາ ເຮັດໃຫ້ທາງມະຫາວິທະຍາໄລບໍ່ຕ້ອງເປີດຮັບສະໝັກພະນັກງານໃນຄົວອີກຕໍ່ໄປ ແລະ ເຂົາຄິດວ່າ ການເກີດພະຍາດລະບາດໃຫຍ່ນີ້ ເຮັດໃຫ້ຮັບຮູ້ໄດ້ວ່າຫຸ່ນຍົນແບບ Sally ນັ້ນມີຄວາມຈຳເປັນຫຼວງຫຼາຍພຽງໃດ.