ພົບກັນວັນນີ້ມີເລື່ອງເຊິ່ງຟັງແລ້ວສີເຄືອງຫູນັ້ນກໍຄື ການຂຶ້ນທະບຽນຂໍບໍລິຈາກຮ່າງກາຍ ແລະ ອະໄວຍະວະ ເພື່ອນຳໃຊ້ທາງການແພດ ມີຕົວຢ່າງຈາກຍີ່ປຸ່ນ ແລະ ປະເທດໂຮນລັງ ຫຼື ເນເທີແລນ ມາເລົ່າສູ່ຟັງ.
ທີ່ຍີ່ປຸ່ນ: ຂ່າວຕ່າງປະເທດຈາກຍີ່ປຸ່ນ ໃນເດືອນສິງຫາປີ 2019 ໃຫ້ຮູ້ວ່າ ກະແສນິຍົມຈົດທະບຽນມອບຮ່າງກາຍຂອງຄົນຍີ່ປຸ່ນ ເພື່ອທົດລອງໃນທາງການແພດ ຫຼັງຈາກຕົນເສຍຊີວິດລົງນັ້ນ ໄດ້ເພີ່ມຂຶ້ນຢ່າງເຖິງຂັ້ນວ່າບ່ອນຮົບຈົດທະບຽນຫຼາຍແຫ່ງໄດ້ໂຈະການຮັບໄວ້ກ່ອນ ເລື່ອງນີ້ໄດ້ມີຕົວເລກຢັ້ງຢືນຢ່າງຄັກແນ່ ຄື ພຽງແຕ່ 3 ເດືອນຕົ້ນປີ 2018 (ແຕ່ເດືອນມັງກອນ-31 ມີນາ 2018) ໄດ້ມີຜູ້ຂໍຈົດທະບຽນບໍລິຈາກຮ່າງກາຍເພື່ອການແພດ ພາຍຫຼັງຕົນເສຍຊີວິດລົງນັ້ນ ມີປະມານ 296.000 ຄົນ ທຽບກັບຈຳນວນປະມານ 68.000 ຄົນ ໃນໝົດປີ 1985 ໃນຊຸມປີຫຼັງໆມານີ້ ໂດຍສະເລ່ຍແລ້ວ ຄົນຍີ່ປຸ່ນທີ່ລົງທະບຽນຂໍມອບຮ່າງກາຍຂອງຕົນ ເພື່ອທາງການແພດນັ້ນໄດ້ເພີ່ມຂຶ້ນເຖິງ 8.000 ຄົນຕໍ່ປີ ຢູ່ຍີ່ປຸ່ນ ມີສະມາຄົມໜຶ່ງຊື່ວ່າ ຕາກຸຊິ ກາອິໂບະ ເຊັນໂກກຸ ເຣນໂກກາອິ ສ້າງຕັ້ງຂຶ້ນໃນປີ 1985 ທີ່ເຮັດໜ້າທີ່ປຸກລະດົມໃຫ້ຄົນລົງທະບຽນ ມອບຮ່າງກາຍຂອງຕົນເພື່ອທາງການແພດ ຫຼັງຈາກເສຍຊີວິດ ໃນຫຼາຍທົດສະວັດກ່ອນການສ້າງຕັ້ງສະມາຄົມນີ້ ຮ່າງກາຍ ຫຼື ວ່າສົບຄົນທີ່ນຳໃຊ້ໃນການຜ່າຕັດ ເພື່ອສຶກສາທາງການແພດນັ້ນ ແມ່ນສົບຄົນທີ່ໄຮ້ຍາດຂາດມິດ ຫຼື ສົບຄົນຕາຍທີ່ບໍ່ຮູ້ທີ່ມາ ໃນເວລານັ້ນ ພະນັກງານມະຫາວິທະຍາໄລທີ່ກ່ຽວຂ້ອງ ພາກັນຊອກຫາສົບຄົນຕາຍຕາມສະຖານທີ່ສົງເຄາະເບິ່ງແຍງຜູ້ໄຮ້ຍາດຂາດມິດ ມາດຕະການຮັບການຈົດທະບຽນຜູ້ສະໝັກມອບຮ່າງກາຍ ເພື່ອທາງການແພດຢູ່ຍີ່ປຸ່ນໃນປັດຈຸບັນນີ້ ມີຂັ້ນຕອນງ່າຍດາຍ ຄື ຜູ້ສະໝັກເຂົ້າໄປຈົດທະບຽນຢູ່ມະຫາວິທະຍາໄລ (ຂະແໜງການແພດ) ຈາກນັ້ນ ກໍຈະໄດ້ຮັບບັດຢັ້ງຢືນການມອບຫຼັງຈາກຜູ້ກ່ຽວເສຍຊີວິດລົງ ທາງສະມາຊິກຄອບຄົວ ຫຼື ຜູ້ຢູ່ໃກ້ສິດກັບຜູ້ກ່ຽວກໍຈະພົວພັນກັບເຈົ້າໜ້າທີ່ຮັບລົງທະບຽນ ເພື່ອໄປຮັບສົບ ສົບຈະຖືກເຄືອບນ້ຳຢາເຄມີ ເພື່ອປ້ອງກັນການເນົ່າເປື່ອຍແລ້ວເກັບໄວ້ຕູ້ແຊ່ເຢັນເປັນເວລາ 3 ອາທິດ ກ່ອນຈະສາມາດນຳອອກໄປໃຊ້ໃນການທົດລອງທາງການແພດ ການບໍລິຈາກຮ່າງກາຍຂອງຕົນເພື່ອທາງການແພດນັ້ນ ຕາມກົດໝາຍຂອງຍີ່ປຸ່ນແລ້ວ ກໍຄື ຕ້ອງສະໝັກດ້ວຍຕົນເອງ ຫຼື ຈາກການຍິນຍອມຂອງສະມາຊິກຄອບຄົວຂອງຜູ້ເສຍຊີວິດເທົ່ານັ້ນ.
ທີ່ໂຮນລັງ (ໂຮນແລນ ຫຼື ເນເທີແລນ): ໃນເດືອນກັນຍາ 2016 ຫຼັງຈາກຮ່າງກົດໝາຍກ່ຽວກັບບໍລິຈາກອະໄວຍະວະ ເພື່ອຊ່ວຍຊີວິດຄົນອື່ນ ໄດ້ຖືກຮັບຮອງເອົາໂດຍສະພາຕ່ຳ (ສະພາຜູ້ແທນລາຊະດອນ) ດ້ວຍຄະແນນສຽງ 75 ຕໍ່ 74 ທາງອົງການນິຕິບັນຍັດກໍໄດ້ເລີ່ມອະພິປາຍ ເພື່ອປຸກລະດົມໃຫ້ຄົນໂຮນລັງທຸກຄົນ ກາຍເປັນຜູ້ບໍລິຈາກອະໄວຍະວະຂອງຕົນ ຍົກເວັ້ນຜູ້ທີ່ບໍ່ສະໝັກເຂົ້າຮ່ວມຢູ່ໃນບັນຊີຜູ້ບໍລິຈາກ ໃນເວລານັ້ນ ຮ່າງກົດໝາຍທີ່ສະພາຕ່ຳຮັບຮອງເອົາ ຍັງຈະຕ້ອງໄດ້ຜ່ານການຮັບຮອງຈາກສະພາສູງ (ວຸດທິສະພາ) ອີກຕໍ່ໜຶ່ງ ຈຶ່ງຈະເປັນອັນສົມບູນ ຮ່າງກົດໝາຍສະບັບນີ້ ກຳນົດໃຫ້ຊາວໂຮນລັງທຸກຄົນເປັນຜູ້ບໍລິຈາກອະໄວຍະວະໂດຍອັດຕະໂນມັດ ແຕ່ຖ້າບໍ່ຍິນຍອມກໍຕ້ອງໄດ້ຂໍຖອນຕົວຕາມລະບຽບການ ສະຖິຕິຊີ້ອອກວ່າ ຢູ່ປະເທດໂຮນລັງນັ້ນ ໃນແຕ່ລະປີໄດ້ມີຄົນເສຍຊີວິດປະມານ 150 ຄົນ ຍ້ອນບໍ່ມີອະໄວຍະວະຈະປ່ຽນແທນ ແລະ ພວກເຂົາຈະມີຊີວິດຕໍ່ໄປໄດ້ ຖ້າມີຜູ້ສະໜອງອະໄວຍະວະທີ່ຕ້ອງການ ໃນບັ້ນອະພິປາຍເພື່ອຂົນຂວາຍຜູ້ສະໝັກ ບໍລິຈາກອະໄວຍະວະກ່ອນຮ່າງກົດໝາຍ ຈະໄດ້ຖືກຮັບຮອງຢ່າງສົມບູນນັ້ນ ກໍມີຂ່າວດີອອກມາວ່າ ຊາວໂຮນລັງ ຈຳນວນເກືອບ 1/4 ຂອງພົນລະເມືອງທົ່ວປະເທດ ທີ່ມີອາຍຸແຕ່ 12 ປີຂຶ້ນໄປ ກຽມພ້ອມແລ້ວທີ່ຈະເປັນຜູ້ບໍລິຈາກອະໄວຍະວະຂອງຕົນ ເພື່ອຊ່ວຍເຫຼືອຊີວິດຂອງຄົນອື່ນ.