ພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ນະຄອນຫຼວງວຽງຈັນ (ຖວທ ນວ) ສໍາເລັດການນຳພາພະນັກງານ-ລັດຖະກອນພາຍໃນຂົງເຂດ ຖວທ ໄປທັດສະນະສຶກສາ-ທ່ອງທ່ຽວ ຢູ່ແຂວງຄຳມ່ວນ ແລະ ແຂວງສະຫວັນນະເຂດ ວັນທີ 18-20 ທັນວາ 2020 ເພື່ອຊຸກຍູ້ວຽກງານທ່ອງທ່ຽວ ແລະ ຈັດຕັ້ງປະຕິບັດໂຄງການສົ່ງເສີມການທ່ອງທ່ຽວພາຍໃນ “ລາວທ່ຽວລາວ” ທັງເປັນການແລກປ່ຽນບົດຮຽນກ່ຽວກັບວຽກງານການທ່ອງທ່ຽວ ແລະ ສ້າງກິດຈະກຳສົ່ງທ້າຍປີເກົ່າ ແລະ ຕ້ອນຮັບປີໃໝ່ສາກົນ 2021 ໃຫ້ມີບັນຍາກາດຄຶກຄຶ້ນ ແລະ ມີເນື້ອໃນເລິກເຊິ່ງ.
ທ່ານນາງ ວິໄລວອນ ຈັນທະລາຕີ ຫົວໜ້າພະແນກ ຖວທ ນວ ໃຫ້ສໍາພາດວ່າ: ພາຍຫຼັງມີການລະບາດຂອງພະຍາດໂຄວິດ-19 ວຽກງານການທ່ອງທ່ຽວຢູ່ບັນດາແຂວງພາຍໃນປະເທດມີທ່າອ່ຽງຫຼຸດລົງ ການນໍາພາຄະນະມາທັດສະນະ ແລະ ທ່ອງທ່ຽວຄັ້ງນີ້ ຈຶ່ງເປັນກິດຈະກໍາໜຶ່ງທີ່ເຮັດໃຫ້ໂຄງການລາວທ່ຽວລາວ ທີ່ກະຊວງ ຖວທ ກໍຄືການນໍາ ນວ ກໍານົດອອກ ພະແນກ ຖວທ ນວ ເປັນຜູ້ຈັດຕັ້ງປະຕິບັດ ປາກົດຜົນເປັນຈິງ ເຊິ່ງຜ່ານການທ່ອງທ່ຽວຕົວຈິງ ນັກທ່ອງທ່ຽວຢູ່ຂະບວນຂອງພວກເຮົາແມ່ນມີຄວາມປະທັບໃຈຫຼາຍ ສະຖານທີ່ແຫຼ່ງທ່ອງທ່ຽວຕ່າງໆໃນແຂວງຄໍາມ່ວນ ແລະ ແຂວງສະຫວັນນະເຂດ ມີຄວາມສວຍສົດງົດງາມ ດ້ານທີ່ພັກ ຮ້ານອາຫານ ຜູ້ປະກອບການກໍມີຄວາມກຽມພ້ອມຕ້ອນຮັບນັກທ່ອງທ່ຽວເປັນຢ່າງດີ ນອກນີ້ ຍັງມີສ່ວນຫຼຸດສໍາລັບນັກທ່ອງທ່ຽວ ເພື່ອປະກອບສ່ວນຊຸກຍູ້ສົ່ງເສີມການທ່ອງທ່ຽວພາຍໃນໃຫ້ນັບມື້ດີຂຶ້ນ ຈຶ່ງຂໍເຊີນຊວນປະຊາຊົນລາວ ໂດຍສະເພາະຊາວ ນວ ເຂົ້າຮ່ວມກິດຈະກໍາຊຸກຍູ້ສົ່ງເສີມໂຄງການລາວທ່ຽວລາວໃຫ້ກວ້າງຂວາງ ແລະ ນັບມື້ຫຼາຍຂຶ້ນ.
# ຂ່າວ & ພາບ: ສະບາໄພ