ວັນທີ 16 ທັນວາ 2020 ທີ່ກະຊວງພາຍໃນ ຈັດພິທີມອບພາຫະນະລົດຈັກ Honda Wave 110 ຈຳນວນ 12 ຄັນ ລະຫວ່າງໂຄງການຈົດທະບຽນ ແລະ ສະຖິຕິພົນລະເມືອງ ກົມຄຸ້ມຄອງພົນລະເມືອງ ກະຊວງພາຍໃນ ໃຫ້ແກ່ຂະແໜງຄຸ້ມຄອງພົນລະເມືອງ ພະແນກພາຍໃນນະຄອນຫຼວງວຽງຈັນ (ນວ) ແລະ ໜ່ວຍງານຄຸ້ມຄອງພົນລະເມືອງ ຫ້ອງການພາຍໃນເມືອງ 9 ເມືອງຂອງ ນວ ເພື່ອນຳໃຊ້ເຂົ້າໃນການເຄື່ອນໄຫວຈັດຕັ້ງປະຕິບັດວຽກງານຄຸ້ມຄອງພົນລະເມືອງ ໃຫ້ກຽດເຊັນມອບໂດຍທ່ານນາງ ກົມມະລີ ວິລະພັນ ຫົວໜ້າກົມຄຸ້ມຄອງພົນລະເມືອງ ຫົວໜ້າໂຄງການຈົດທະບຽນ ແລະ ສະຖິຕິພົນລະເມືອງ ແລະ ເຊັນຮັບໂດຍທ່ານ ບຸນທາມ ພຸດທະວົງສາ ຫົວໜ້າພະແນກພາຍໃນ ນວ ໂດຍມີທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ຫົວໜ້າຫ້ອງການກະຊວງພາຍໃນ ຄະນະກົມ ຄະນະພະແນກ ບັນດາທ່ານຫົວໜ້າ ຮອງຫົວໜ້າຫ້ອງການພາຍໃນເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງຂອງໂຄງການ ແມ່ນເພື່ອປັບປຸງການປົກຄຸມການຈົດທະບຽນເຫດການທີ່ສຳຄັນໃນຊີວິດຂອງພົນລະເມືອງ ໂດຍສະເພາະການເກີດ ແລະ ການເສຍຊີວິດຢູ່ ສປປ ລາວ ດ້ວຍການສ້າງລະບົບຖານຂໍ້ມູນຄຸ້ມຄອງພົນລະເມືອງແບບເອເລັກໂຕຣນິກ ທີ່ເດີນແມ່ນແລ່ນສະດວກ ເພື່ອບັນລຸຈຸດປະສົງ ແລະ ຄາດໝາຍສູ້ຊົນ ດັ່ງກ່າວມາຂ້າງເທິງນັ້ນ ຍັງຕ້ອງໄດ້ສຸມໃສ່ວຽກງານການໂຄສະນາເຜີຍແຜ່ຍຸດທະສາດ ແລະ ບັນດານິຕິກຳທີ່ກ່ຽວຂ້ອງກັບວຽກງານຄຸ້ມຄອງພົນລະເມືອງ ໃຫ້ແກ່ບັນດາຂະແໜງການທີ່ກ່ຽວຂ້ອງ ອົງການຈັດຕັ້ງສາກົນ ຄູ່ຮ່ວມພັດທະນາ ທັງຂັ້ນສູນກາງ ແລະ ຂັ້ນທ້ອງຖິ່ນ ເພື່ອໃຫ້ຮັບຮູ້ ແລະ ເຂົ້າໃຈເຖິງຄວາມໝາຍຄວາມສຳຄັນ ແລະ ຜົນປະໂຍດທີ່ຈະໄດ້ຮັບຈາກການຈົດທະບຽນການເກີດ.
ໂອກາດນີ້ ທ່ານນາງ ກົມມະລີ ວິລະພັນ ໄດ້ຮຽກຮ້ອງມາຍັງບັນດາທ່ານທີ່ຮັບຜິດຊອບວຽກງານຄຸ້ມຄອງພົນລະເມືອງ ນຳໃຊ້ພາຫະນະລົດຈັກທີ່ໂຄງການໄດ້ປະກອບໃຫ້ໃນຄັ້ງນີ້ ຈົ່ງນຳໃຊ້ໃຫ້ຖືກຕາມເປົ້າໝາຍ ແລະ ຈຸດປະສົງຂອງໂຄງການ ພາຫະນະລົດຈັກທີ່ນຳມາມອບໃນຄັ້ງນີ້ ໄດ້ຮັບທຶນສະໜັບສະໜູນຈາກໂຄງການຈົດທະບຽນ ແລະ ສະຖິຕິພົນລະເມືອງ ກະຊວງພາຍໃນ ຮ່ວງກູ້ຢືມຈາກທະນາຄານໂລກ.
# ຂ່າວ & ພາບ: ບຸນມີ