ການລະບາດຂອງໂຄວິດ-19 ສ້າງຄວາມເສຍຫາຍຢ່າງໜັກຕໍ່ອຸດສາຫະກຳການບິນ ເຮັດໃຫ້ສາຍການບິນຕະຫຼອດຈົນສະໜາມບິນຕ່າງໆທົ່ວໂລກ ຕ້ອງປັບຫຼຸດຄ່າໃຊ້ຈ່າຍໃນດ້ານຕ່າງໆລົງ ຍົກເວັ້ນຄ່າໃຊ້ຈ່າຍໃນດ້ານການປະຊາສຳພັນ ສ້າງຄວາມໝັ້ນໃຈໃຫ້ແກ່ຜູ້ໂດຍສານທີ່ຈະເດີນທາງໃນໄລຍະການລະບາດໃຫຍ່ນີ້.
ທ່ານ Sean Donohue ປະທານບໍລິຫານຂອງສະໜາມບິນນາໆຊາດ Dallas-Forth Worth (DFW) ໃຫ້ສຳພາດກັບສື່ມວນຊົນວ່າ ບໍ່ວ່າສິ່ງທີ່ເອີ້ນກັນວ່າ New Normal ຫຼື “ຄວາມປົກກະຕິໃນຮູບແບບໃໝ່” ນັ້ນ ຈະເປັນໄປໃນທິດທາງໃດ ແຕ່ສະໜາມບິນ DFW ກຳລັງປ່ຽນຮູບແບບການບໍລິການ ໂດຍເນັ້ນໃຫ້ລູກຄ້າຊ່ວຍເຫຼືອຕົວເອງຫຼາຍຂຶ້ນ ພ້ອມກັບນຳເຕັກໂນໂລຊີໄຮ້ການສຳຜັດ ມາໃຊ້ເພື່ອຄວາມປອດໄພດ້ານສາທາລະນະສຸກ.
ທ່ານ Sean Donohue ກ່າວອີກວ່າ ເລື່ອງທີ່ສະໜາມບິນໄດ້ຮັບການຮ້ອງຮຽນເຂົ້າມາຫຼາຍທີ່ສຸດ ກໍຄືເລື່ອງ “ຫ້ອງນ້ຳ”.
ຂະນະນີ້ ສະໜາມບິນ DFW ແລະ ສາຍການບິນ American Airlines ພະຍາຍາມຊຸກຍູ້ໃຫ້ມີລະບົບເຊັກອິນສຳພາລະດ້ວຍຕົວເອງ ແລະ ປ່ຽນຫ້ອງນ້ຳທັງໝົດໃຫ້ເປັນລະບົບທີ່ບໍ່ມີການສຳຜັດໃດໆ.
ບໍລິສັດ Infax Inc. ຈະເປັນຜູ້ຕິດຕັ້ງລະບົບເຊັນເຊີທີ່ອ່າງລ້າງມື ສະບູ່ ຊັກໂຄກ ແລະ ເຈ້ຍເຊັດມືໃຫ້ເປັນລະບົບທີ່ບໍ່ມີການສຳຜັດ ແລະ ລະບົບດັ່ງກ່າວຈະແຈ້ງເຕືອນລ່ວງໜ້າ ເວລາທີ່ສິ່ງຂອງ ຫຼື ອຸປະກອນຕ່າງໆໃນຫ້ອງນ້ຳໃກ້ຈະໝົດ.
ນອກຈາກນີ້ ສະໜາມບິນ DFW ກຳລັງທົດສອບເຕັກໂນໂລຊີໃໝ່ໆໃນການຂ້າເຊື້ອທີ່ດີຂຶ້ນ ເຊັ່ນ ການໃຊ້ເຕັກໂນໂລຊີລັງສີອຸນຕຣາໄວໂອເລດ ທີ່ສາມາດຂ້າເຊື້ອພະຍາດກ່ອນທີ່ຈະໄຫຼວຽນເຂົ້າສູ່ລະບົບ HVAC.
DFW ໃຊ້ງົບປະມານຫຼາຍລ້ານໂດລາ ໃນເລື່ອງການເຮັດຄວາມສະອາດ ແລະ ລະບົບສຸຂາພິບານນັບຕັ້ງແຕ່ເກີດການລະບາດໃຫຍ່ ໃນຂະນະດຽວກັນ ກໍໄດ້ລະງັບໂຄງການອື່ນໆທີ່ໃຊ້ງົບປະມານຈຳນວນຫຼາຍ ແລະ ຫຼຸດຕົ້ນທຶນການດຳເນີນງານໃນເຄິ່ງປີຫຼັງລົງປະມານ 20% ເພື່ອຮັບມືກັບການລະບາດຂອງໂຄວິດ-19.
ສະໜາມບິນແຫ່ງນີ້ ຍັງໄດ້ນຳເຕັກໂນໂລຊີແບບໃໝ່ມາໃຊ້ໃນການເຊັກອິນສຳພາລະໃຫ້ຜູ້ໂດຍສານ ເຊັ່ນ ເມື່ອປີທີ່ຜ່ານມາ DFW ເປິດໃຊ້ລະບົບ Biometric ຫຼື ການໃຊ້ໃບໜ້າຂອງຜູ້ໂດຍສານເປັນ boarding pass ຫຼື ໃບອະນຸຍາດຜ່ານຂຶ້ນເຮືອບິນສຳລັບຖ້ຽວບິນລະຫວ່າງປະເທດ ແລະ ໃຊ້ເຕັກໂນໂລຊີ VeriScan ສຳລັບຜູ້ໂດຍສານທີ່ເດີນທາງມາເຖິງ.
ຂະນະທີ່ສາຍການບິນ Delta Air Lines ເປິດອາຄານ biometric ແຫ່ງທຳອິດຂອງສະຫະລັດ ທີ່ແອດແລນຕາ ໃນປີ 2018 ແລະ ສະໜາມບິນບາງແຫ່ງໃນເອີຣົບ ແລະ ອາຊີ ກໍໃຊ້ເຕັກໂນໂລຊີຈົດຈຳໃບໜ້າດ້ວຍ ເຊັ່ນກັນ.
ນອກຈາກນີ້ແລ້ວ ທາງສະໜາມບິນຍັງທົດສອບເຕັກໂນໂລຊີລະບົບໄຮ້ການສຳຜັດ ໃນການກວດວັດອຸນຫະພູມຂອງພະນັກງານ ເຊັ່ນກັນ.