ທີ່ ສປ ຈີນ: ສປ ຈີນ ມີກົດໝາຍເດັດໆເພື່ອລົງໂທດຕໍ່ຜູ້ໂຄສະນາເກີນຄວາມເປັນຈິງ ເພື່ອຂາຍສິນຄ້າຜ່ານທາງອອນລາຍ ນອກຈາກນັ້ນ ຍັງມີການກຳນົດໂທດສະເພາະຜູ້ຂາຍສິນຄ້າທາງອອນລາຍທີ່ເຂົ້າໄປລຶບຄວາມຄິດຄວາມເຫັນໃນທາງລົບຈາກສັງຄົມຕໍ່ສິນຄ້າທີ່ຕົນໂຄສະນາຈ່າວຂາຍນັ້ນອີກ ກົດໝາຍທີ່ວ່ານີ້ອອກມາສູ່ສັງຄົມໃນທ້າຍປີ 2017 ພາຍໃຕ້ກົດໝາຍສະບັບນີ້ ຜູ້ໃດກໍຕາມທີ່ໂຄສະນາເກີນຄວາມຈິງກ່ຽວກັບສິນຄ້າທີ່ຕົນຂາຍຜ່ານທາງອອນລາຍ ຫຼື ເຂົ້າໄປລຶບຄວາມເຫັນ ຕ້ອງຕິສິນຄ້າຂອງຕົນຈາກສັງຄົມນັ້ນ ຈະໄດ້ຖືກປັບໃໝເປັນເງິນຕ່ຳສຸດ 30.000 ໂດລາສະຫະລັດ (ຫຼາຍກວ່າ 270 ລ້ານກີບ) ກົດໝາຍສະບັບນີ້ປະກາດໃຊ້ກ່ອນວັນຄົນໂສດຂອງຈີນ ເຊິ່ງຕົກໃສ່ວັນທີ 11 ພະຈິກຂອງທຸກໆປີ ໃນວັນດັ່ງກ່າວ ພຽງວັນດຽວນັ້ນ ຕົວເລກສະເລ່ຍການຊື້-ຂາຍ ມີສູງເຖິງ 18.000 ລ້ານໂດລາສະຫະລັດ ທາງການເຊື່ອໝັ້ນວ່າ ກົດໝາຍຈະສາມາດຄວບຄຸມການສວຍໂອກາດຂອງບັນດາເວັບໄຊທີ່ຈ່າວຂາຍສິນຄ້າທາງອອນລາຍ ຂ່າວໃຫ້ຮູ້ຕື່ມວ່າ ໃນເດືອນສິງຫາ 2019 ທາງການຈີນໄດ້ເປີດນຳໃຊ້ສານດີຈີຕອນ ທີ່ເຮັດໜ້າທີ່ແກ້ໄຂຄວາມຂັດແຍ່ງທາງການຄ້າຜ່ານສື່ສັງຄົມອອນລາຍ ກໍຄື ອາຊະຍາກຳທາງອິນເຕີເນັດ ອີກເລື່ອງໜຶ່ງກ່ຽວກັບ ສປ ຈີນ ນັ້ນກໍຄື ການເລີ່ມໃຊ້ກົດໝາຍວ່າດ້ວຍການຄ້າທາງເອເລັກໂຕຣນິກສະບັບທຳອິດ ນັບແຕ່ເດືອນມັງກອນ ປີ 2019 ເປັນຕົ້ນມາ ກົດໝາຍມີຈຸດປະສົງຄຸ້ມຄອງການຈັດລະບຽບການຄ້າເອເລັກໂຕຣນິກ (ອີຄອມເມີດ) ຮັບປະກັນສິດທິຂອງຜູ້ບໍລິໂພກ ປ້ອງກັນບໍ່ໃຫ້ມີການລະເມີດລິຂະສິດສິນຄ້າ ແລະອື່ນໆ ກົດໝາຍບັງຄັບໃຫ້ຜູ້ຄ້າຂາຍທາງອີຄອມເມີດທຸກຄົນ ລົງທະບຽນດຳເນີນທຸລະກິດກ່ອນມີໃບປະກອບການຈ່າຍພາສີຢ່າງຖືກຕ້ອງ ແລະ ຮັບຜິດຊອບໃນກໍລະນີມີສິນຄ້າປອມ ຜູ້ລະເມີດກົດໝາຍອີຄອມເມີດນີ້ ຈະໄດ້ຮັບໂທດປັບໃໝສູງສຸດ 2 ລ້ານຢວນ.
ທີ່ ກຳປູເຈຍ: ເລື່ອງນີ້ບໍ່ກ່ຽວກັບຄະດີສື່ສັງຄົມອອນລາຍໂດຍກົງ ແຕ່ມັນກໍຍັງເປັນຄະດີທີ່ພົວພັນກັບວຽກສື່ສານໂຄສະນາ ຄື: ໃນກາງເດືອນຕຸລາ 2017 ທາງການກຳປູເຈຍໄດ້ສັ່ງຫ້າມສາຍຮູບເງົາເລື່ອງ ຄິງແມນ (Kingsman The Golden Circle) ໃນທົ່ວກຳປູເຈຍ ພ້ອມທັງໄດ້ສົ່ງໜັງສືປະທ້ວງໄປສຳນັກງານບໍລິສັດສາຍຟິມຮູບເງົາ ຮອນລີວູດ ຂອງສະຫະລັດອາເມຣິກາ ຍ້ອນວ່າ ຮູບເງົາດັ່ງກ່າວໄດ້ກຳນົດເອົາສະຖານທີ່ຄ້າຍກັບວັດຕຼາພົມ ທີ່ສັກສິດຂອງກຳປູເຈຍເປັນບ່ອນຜະລິດ ບ່ອນຄ້າຢາເສບຕິດ ແລະ ມີສາກການໃຊ້ຄວາມຮຸນແຮງ ແລະ ຂ້າກັນຢູ່ທີ່ນັ້ນ ທາງກຳປູເຈຍ ບອກວ່າ ຟິມຮູບເງົານີ້ເປັນທີ່ຮັບເອົາບໍ່ໄດ້ ເຖິງວ່າບໍ່ມີການຖ່າຍທຳຕົວຈິງຢູ່ກຳປູເຈຍກໍຕາມ ແຕ່ມັນໄດ້ໃຊ້ຊື່ປະເທດກຳປູເຈຍ ແລະ ໃຊ້ສາກພາບທີ່ເໝືອນກັບວັດຕຼາພົມ ທີ່ສັກກະລະບູຊາ ແລະ ເປັນມໍລະດົກໂລກ ເລື່ອງນີ້ຄ້າຍໆກັບຮູບເງົາໄທເລື່ອງໜຶ່ງທີ່ໃຊ້ສາກປະຕູໄຊຂອງພວກເຮົາເປັນຈຸດທີ່ຖືກໄຟໄໝ້ຈົນໄດ້ຮັບສຽງປະນາມຢ່າງຟົດເດືອດຈາກສັງຄົມລາວ.