ຊັບສົມບັດຂອງຜົວ-ເມຍ ບາງທ່ານອາດຈະຍັງບໍ່ທັນເຂົ້າໃຈວ່າ ມີຊັບສົມບັດໃດແດ່ ຊັບສົມບັດແຕ່ລະຢ່າງມີຄວາມໝາຍແນວໃດ ການໄດ້ມາຂອງຊັບສົມບັດມີແນວໃດ ຫຼື ບາງທ່ານອາດຈະເຂົ້າໃຈວ່າ ຊັບສົມບັດທຸກຢ່າງທີ່ຢູ່ໃນການຄຸ້ມຄອງຂອງຄອບຄົວ ແມ່ນເປັນສິນສົມສ້າງທັງໝົດ ຫຼື ເປັນຊັບເດີມທັງໝົດ ມື້ນີ້ ຂ້າພະເຈົ້າຈະມານຳສະເໜີຄວາມໝາຍ ແລະ ໃຫ້ຄວາມກະຈ່າງແຈ້ງ ກ່ຽວກັບຊັບສົມບັດຂອງຜົວ-ເມຍ ຄື:
ຊັບສົມບັດຂອງຜົວ-ເມຍ ແມ່ນຊັບສິນຂອງຜົວ ຫຼື ເມຍ ທີ່ໄດ້ມາກ່ອນ ຫຼື ຫຼັງການແຕ່ງດອງ ຫຼື ໄດ້ມາຈາກການສືບທອດມູນມໍລະດົກ ຫຼື ຈາກການມອບໝາຍ ຫຼື ໄດ້ຈາກການຍົກຊັບໃຫ້ ຊຶ່ງຊັບສົມບັດຂອງຜົວ-ເມຍ ປະກອບມີ 2 ປະເພດຄື:
ຊັບເດີມ ແມ່ນຊັບສົມບັດຂອງຜົວ ຫຼື ເມຍ ທີ່ໄດ້ມາກ່ອນການແຕ່ງດອງ ຫຼື ແມ່ນຊັບສົມບັດທີ່ໄດ້ມາຈາກການສືບທອດມູນມໍລະດົກ ຫຼື ຈາກການມອບ ຫຼື ການຍົກຊັບໃຫ້ຜົວ ຫຼື ເມຍສະເພາະ ພາຍຫຼັງການແຕ່ງດອງທີ່ຍັງຄົງຢູ່ ຫຼື ປ່ຽນສະພາບໄປເປັນຊັບສິ່ງຂອງໃໝ່ແລ້ວ.
ນອກຈາກນີ້ ດອກເບ້ຍ ລາຍໄດ້ ແລະ ໝາກຜົນ ທີ່ເກີດຈາກຊັບເດີມຂອງຜົວ ຫຼື ເມຍ ກໍໃຫ້ຖືເປັນຊັບເດີມຂອງຜູ້ນັ້ນ ເວັ້ນເສຍແຕ່ ຜົວ ຫຼື ເມຍ ຫາກໄດ້ປະກອບສ່ວນເຂົ້າໃນການຜະລິດ ຫຼື ການສ້າງສາຮ່ວມກັນ ໃນກໍລະນີນີ້ ລາຍໄດ້ ແລະ ໝາກຜົນນັ້ນ ໃຫ້ຖືເປັນສິນສົມສ້າງ.
ສິນສົມສ້າງ ແມ່ນຊັບສົມບັດທີ່ຄູ່ຜົວ-ເມຍສ້າງສາ ແລະ ຫາມາໄດ້ໃນເວລາເປັນຜົວ-ເມຍນຳກັນ ເວັ້ນເສຍແຕ່ຊັບສິ່ງຂອງທີ່ເປັນເຄື່ອງໃຊ້ສ່ວນຕົວ ຊຶ່ງບໍ່ມີມູນຄ່າສູງ ລາຍໄດ້ທັງໝົດທີ່ຜົວ ຫຼື ເມຍໄດ້ຮັບ ໃນເວລາຢູ່ຮ່ວມກັນ ຫຼື ແຍກກັນຢູ່ນັ້ນ ກໍໃຫ້ຖືເປັນສິນສົມສ້າງ.
ໃນກໍລະນີທີ່ມີການສ້ອມແປງຊັບເດີມຂອງຝ່າຍໃດຝ່າຍໜຶ່ງ ໂດຍນຳໃຊ້ສິນສົມສ້າງ ຫຼື ຊັບເດີມຂອງອິກຝ່າຍໜຶ່ງ ໃນມູນຄ່າເກີນກວ່າສອງສ່ວນສາມ (2/3) ຂອງມູນຄ່າຊັບເດີມທີ່ສ້ອມແປງ ກໍໃຫ້ຖືວ່າຊັບນັ້ນເປັນສິນສົມສ້າງ.
ໂດຍ: ສ. ສາຍນ້ຳຊຳ