ໃນບົດນີ້ ຜູ້ຂຽນຂໍນຳສະເໜີກ່ຽວກັບມາດຕະການຂອງທາງການເກາະໄຕ້ຫວັນ ແລະ ອົດສະຕຣາລີ ເພື່ອປົກປ້ອງຜູ້ບໍລິໂພກຈາກຜົນກະທົບຂອງອາຫານທີ່ປົນເປື້ອນ ຫຼື ອາຫານເສຍຄຸນບໍ່ໄດ້ມາດຕະຖານ.
ທີ່ເກາະໄຕ້ຫວັນ: ຜູ້ລັກລອບຈຳໜ່າຍອາຫານປົນເປື້ອນ ອາຫານທີ່ຖືກຫ້າມຢູ່ເກາະໄຕ້ຫວັນນັ້ນ ຈະໄດ້ຮັບໂທດຢ່າງໜັກໜ່ວງ ຄື: ອາດຕິດຄຸກສູງສຸດ 7 ປີ ຫຼື ຖືກປັບໃໝເປັນເງິນສູງເຖິງ 200 ລ້ານໂດລາໄຕ້ຫວັນ (1 ໂດລາໄຕ້ຫວັນ ແລກເງິນກີບໄດ້ເກືອບ 300 ກີບ) ຫຼື ທັງໄດ້ຮັບໂທດຈຳຄຸກ ແລະ ໂທດປັບໃໝ ສ່ວນຜູ້ເຮັດໜ້າທີ່ເປັນຫູເປັນຕາໃຫ້ທາງການກ່ຽວກັບການຈຳໜ່າຍອາຫານປົນເປື້ອນ-ອາຫານເສຍຄຸນນັ້ນ ກໍຈະໄດ້ຮັບລາງວັນເປັນເງິນ 2,2 ລ້ານໂດລາໄຕ້ຫວັນ ເຫດທີ່ຕ້ອງໄດ້ມີການປັບປຸງກົດໝາຍວ່າດ້ວຍການຄຸ້ມຄອງຜູ້ບໍລິໂພກ ໂດຍໄດ້ກຳນົດໂທດຕໍ່ຜູ້ລະເມີດໃຫ້ສູງຂຶ້ນກວ່າເກົ່ານັ້ນ ແມ່ນຍ້ອນມີປາກົດການລັກລອບຈຳໜ່າຍອາຫານປົນເປື້ອນຫຼາຍຂຶ້ນ ຕົວຢ່າງ ທີ່ເປັນກໍລະນີດັງ ກໍຄື ກໍລະນີໂຮງງານຊາງກວນ (Chang Guann) ທີ່ຜະລິດ ແລະ ຈຳໜ່າຍນ້ຳມັນສຳລັບປຸງແຕ່ງອາຫານ ໄດ້ລັກລອບນຳເອົານ້ຳມັນທີ່ໃຊ້ຄົວອາຫານແລ້ວມາໃຊ້ຄືນໃໝ່ ໂດຍໄດ້ເອົານ້ຳມັນໝູປົນໃສ່ ແລ້ວໄປຕົວະຂາຍໃຫ້ບັນດາຮ້ານອາຫານທັງຢູ່ໃນ ແລະ ນອກເກາະໄຕ້ຫວັນຫຼາຍກວ່າ 1.000 ແຫ່ງ ສຸດທ້າຍ ເຈົ້າຂອງໂຮງງານດັ່ງກ່າວ ກໍຖືກຈັບກຸມໃນເດືອນຕົ້ນເດືອນກັນຍາ 2014 ແລະ ຖືກປັບໃໝໃນເບື້ອງຕົ້ນເປັນເງິນ 50 ລ້ານໂດລາໄຕ້ຫວັນ ຄະດີດັ່ງກ່າວ ໄດ້ນຳໄປສູ່ແຜນປັບຂຶ້ນໂທດຕໍ່ຜູ້ລະເມີດພາຍໃນເດືອນກັນຍາປີນັ້ນເອງ.
ທີ່ອົດສະຕຣາລີ: ຄວາມປອດໄພດ້ານອາຫານໃນປະເທດອົດສະຕຣາລີນັ້ນ ເປັນສິ່ງທີ່ສັງຄົມຂອງປະເທດນີ້ຮຽກຮ້ອງສູງທີ່ສຸດ ດັ່ງຂ່າວວຽງຈັນທາມ ສະບັບວັນທີ 19 ຕຸລາ 2015 ໄດ້ສະເໜີໃຫ້ຮູ້ວ່າ ຄຳຮຽກຮ້ອງທີ່ມີລາຍເຊັນ 46.000 ລາຍເຊັນ ໄດ້ສົ່ງເຖິງສະພາສູງຂອງອົດສະຕຣາລີ ເພື່ອໃຫ້ພິຈາລະນາກຳນົດໃຫ້ຕິດປ້າຍບອກທີ່ມາຂອງອາຫານທະເລທີ່ຈຳໜ່າຍ ແລະ ບໍລິໂພກຢູ່ພາຍໃນປະເທດ ອາຫານທະເລທີ່ນຳເຂົ້າຈາກຕ່າງປະເທດນັ້ນ ໄດ້ກວມເອົາສ່ວນແບ່ງໃນຕະຫຼາດອົດສະຕຣາລີສູງເຖິງ 70 ຍ້ອນແນວນີ້ເອງ ສັງຄົມຈຶ່ງເຫັນວ່າ ຄວນມີກົດໝາຍບັງຄັບໃຫ້ຕິດປ້າຍບອກທີ່ມາຂອງອາຫານທະເລເຫຼົ່ານັ້ນ ທັງນີ້ກໍເພື່ອສ້າງຄວາມໝັ້ນໃຈແກ່ຜູ້ບໍລິໂພກກ່ຽວກັບຄຸນນະພາບຂອງອາຫານ ຈຸດປະສົງຂອງກົດໝາຍບັງຄັບໃຫ້ຕິດປ້າຍບອກທີ່ມາຂອງອາຫານທະເລ ໃນຮ້ານອາຫານນີ້ ແມ່ນເພື່ອປ້ອງກັນການບອກທີ່ມາທີ່ບໍ່ມີມູນຄວາມຈິງ ແລະ ພ້ອມດຽວກັນກໍເພື່ອໃຫ້ຜູ້ບໍລິໂພກໃນຮ້ານອາຫານຮູ້ລົດຊາດ ແລະ ຄຸນນະພາບທີ່ດີ ອາຫານທະເລທີ່ຜະລິດຢູ່ພາຍໃນປະເທດເອງ ເຊິ່ງຈະເປັນການສ້າງກະແສນິຍົມຜະລິດຕະພັນພາຍໃນ ເນື້ອໃນຂອງປ້າຍບອກທີ່ມາຂອງອາຫານທະເລນີ້ ຈະຕ້ອງບອກຊື່ປະເທດ ແລະ ຕໍ່ໄປກໍອາດຕື່ມລາຍລະອຽດກ່ຽວກັບວິທີການຈັບປາ ແລະ ສັດທະເລອື່ນໆທີ່ສັ່ງນຳເຂົ້າ.
ຢູ່ລາວພວກເຮົາຜູ້ຂຽນເຫັນວ່າ ຄວນເອົາໃຈໃສ່ກ່ຽວກັບອາຫານ ໝາກໄມ້ ກໍຄື ຜັກ ທີ່ນຳເຂົ້າຈາກຕ່າງປະເທດວ່າ ປ້າຍບອກທີ່ມາທີ່ຕິດຢູ່ໝາກໄມ້-ອາຫານນັ້ນຈິງແທ້ບໍ ຫຼື ເປັນປ້າຍຂີ້ຕົວະ ເພື່ອຫຼອກຂາຍລ້າໆ.