ເຊັ່ນດຽວກັບບາງບົດທີ່ໄດ້ຂຽນໃນຄໍລຳນີ້ມາແລ້ວ ມື້ນີ້ຜູ້ຂຽນຂໍສືບຕໍ່ເລື່ອງຄວາມປອດໄພຂອງອາຫານ ຍັງຈຳໄດ້ວ່າຫຼາຍປີມາແລ້ວ ຜູ້ຂຽນໄດ້ຊື້ເຂົ້າຫຼາມໃນງານບຸນພະທາດຫຼວງ ພໍກິນໄປບໍ່ຮອດເຄິ່ງກໍພົບນ້ຳສີ ຂີ້ເລື່ອຍ ແລະ ເຫຼັກຕະປູ ຈາກນັ້ນ ກໍເລີຍຫຼາບບໍ່ກ້າຊື້ເຂົ້າຫຼາມໄປກິນເປັນເວລາຫຼາຍປີ ຄິດວ່າເຈົ້າຂອງເຂົ້າຫຼາມບັ້ງນັ້ນຄົງບໍ່ມີເຈດຕະນາຮ້າຍ ພຽງແຕ່ວ່າຂາດຄວາມເອົາໃຈໃສ່ ເລື່ອງແບບນີ້ກໍເຄີຍເກີດຢູ່ຕ່າງປະເທດ ຈົນກາຍເປັນຄະດີຟ້ອງຂຶ້ນສານ ເຊັ່ນ:
ທີ່ສະຫະລັດອາເມຣິກາ: ເຫດຮ້າຍໄດ້ເກີດຂຶ້ນຢູ່ຮ້ານອາຫານ ບິດສະໂຕຼໂມແດກ (Bistro Moderne) ທີ່ມີຊື່ສຽງໂດ່ງດັງໃນຍ່ານທຸລະກິດ ແມນແຮດຕັນ ນະຄອນນິວຢອກ ເປັນຮ້ານອາຫານຝຣັ່ງ ບັນຊາໂດຍພໍ່ຄົວໃຫຍ່ ຊື່ ດານຽນ ບູລຸດ (Daniel Boulud) ໃນມື້ເຄາະຮ້າຍນັ້ນ ລູກຄ້າຊື່ທ້າວ ແບຣີ ແບຼດ (Barry Brett) ກັບເມຍ ໄດ້ເຂົ້າໄປຮັບປະທານອາຫານຢູ່ຮ້ານຊື່ດັງແຫ່ງນີ້ ແຕ່ກິນບໍ່ໄດ້ພໍຄາວ ທ້າວ ແບຣີ ກໍຮູ້ສຶກວ່າຕົນໄດ້ກືນວັດຖຸສິ່ງໃດສິ່ງໜຶ່ງເຂົ້າໄປຄ້າງອະຍະຢູ່ຮູຄໍ ເຂົາ ແລະ ເມຍຮີບອອກໄປຈາກຮ້ານ 4 ວັນຜ່ານມາ ທ້າວ ແບຣີ ຍິ່ງເຈັບໜັກ ເລີຍຈຳເປັນໄດ້ໄປພົບແພດ ຈຶ່ງຮູ້ວ່າ ສິ່ງທີ່ຄ້າງຢູ່ຮູຄໍນັ້ນແມ່ນເສັ້ນໂລຫະ ເຊິ່ງຕົກຫຼົ່ນຈາກເຄື່ອງມືຄົວກິນ ໃນທີ່ສຸດສານນະຄອນນິວຢອກ ກໍໄດ້ຕັດສິນຄວາມຜິດຂອງຮ້ານອາຫານໃນຖານປະໝາດເລີ່ນເລີ້ ເຮັດໃຫ້ຄົນອື່ນສ່ຽງຕໍ່ຄວາມອັນຕະລາຍ ສານຕັດສິນໃຫ້ທາງຮ້ານອາຫານຈ່າຍເງິນໃຫ້ທ້າວ ແບຣີ 3 ແສນໂດລາ ຈ່າຍ 11 ພັນໂດລາ ໃຫ້ເມຍທ້າວ ແບຣີ ແລະ ອີກ 1 ລ້ານໂດລາ ແມ່ນການປັບໃໝ ໂດຍທາງການຂ່າວໃຫ້ຮູ້ຕື່ມວ່າ ອາຫານທີ່ສອງຜົວເມຍກິນວັນນັ້ນແມ່ນໄກ່ອົບປະສົມເຫຼົ້າວາຍ (Cogauvin) ອາຫານຈານເດັດຂອງຝຣັ່ງ ສ່ວນເສັ້ນລວດ ເຮັງ-ຊວຍ ທີ່ໄປຄ້າງຄໍທ້າວ ແບຣີ ນັ້ນ ມີຄວາມຍາວ 2,5 ຊັງຕີແມັດ ເຊິ່ງຫຼົ່ນອອກຈາກເຄື່ອງມືລາຄາຖືກໆທີ່ໃຊ້ຄົວກິນ.
ທີ່ ສ ເກົາຫຼີ: ແຫຼ່ງຂ່າວ ກໍເຣຍ ເຮຣັນ (Korea Henald ) ໄດ້ໃຫ້ຮູ້ໃນເດືອນກໍລະກົດ 2019 ວ່າ: ທາງກະຊວງຄວາມປອດໄພຂອງອາຫານ ສ ເກົາ ຫຼີ ໄດ້ກວດກາ ແລະ ລົງໂທດຮ້ານອາຫານແຄມ ທາງຈຳນວນ 37 ຫົວໜ່ວຍ ຍ້ອນລະເມີດກົດ ໝາຍ ວ່າດ້ວຍຫຼັກອະນາໄມຂອງອາຫານ ທາງການ ສ ເກົາຫຼີ ໄດ້ລົງຕິດຕາມກວດກາຮ້ານອາຫານແຕ່ວັນທີ 3 ມິຖຸນາ-ວັນທີ 5 ກໍລະກົດ 2019 ເຊິ່ງກວມເອົາຮ້ານອາຫານ ຈຳນວນ 63 ຫົວໜ່ວຍ ໃນນັ້ນ ເຫັນວ່າ 37 ແຫ່ງໄດ້ລະເມີດຫຼັກອະນາໄມ ທີ່ກຳນົດໄວ້ໃນກົດໝາຍ ຄື: 6 ຮ້ານບໍ່ໄດ້ຈົດທະບຽນດຳເນີນທຸລະກິດ 13 ຮ້ານ ນຳໃຊ້ເຄື່ອງປຸງແຕ່ງທີ່ບໍ່ຮູ້ບ່ອນຜະລິດ 10 ຮ້ານ ປຸງແຕ່ງອາຫານບໍ່ໄດ້ມາດຕະຖານຄວາມສະອາດ.
ທີ່ ສປ ຈີນ: ໃນຊຸມປີຫຼັງມານີ້ ທາງການ ສປ ຈີນ ໄດ້ເອົາມາດຕະການຈິງຈັງຕັ້ງໜ້າ ເພື່ອກຳຈັດອາຫານ-ຢາປອມ ພ້ອມທັງປັບປຸງມາດຕະຖານຄວາມປອດໄພຂອງອາຫານ… ສະແດງອອກໃນການເຄື່ອນໄຫວຕົວຈິງ ເຊັ່ນ: ໃນຕົ້ນປີ 2017 ອົງການອາຫານ ແລະ ຢາຂອງຈີນ ໄດ້ເປີດເຜີຍກ່ຽວກັບຜົນສຳເລັດໃນການກວາດລ້າງໂຮງງານຜະລິດເຄື່ອງປຸງແຕ່ງອາຫານປອມ ຈຳນວນ 50 ແຫ່ງ ໃນເທສະບານນະຄອນທຽນສິນ ເຊິ່ງມີລາຍຮັບສູງເຖິງ 100 ລ້ານຢວນຕໍ່ປີ ຜະລິດຕະພັນທີ່ປອມນັ້ນ ລວມມີ ນ້ຳຖົ່ວເຫຼືອງ ນ້ຳສົ້ມ ໄກ່ກ້ອນ ຜະລິດຕະພັນເຫຼົ່ານີ້ໄດ້ບັນຈຸໃສ່ແກ້ວຕິດກາໝາຍສິນຄ້າຊື່ດັງລະດັບໂລກ ເຊັ່ນ: ແມັກກີ ເນັສເລ ຄະນໍ ແລະ ອື່ນໆ ລວມທັງເຄື່ອງປຸງແຕ່ງອາຫານຊື່ດັງ ພາຍໃນປະເທດ ວັດຖຸທີ່ນຳໃຊ້ໃນການຜະລິດສິນຄ້າປອມເຫຼົ່ານີ້ ລ້ວນແຕ່ເປັນອັນຕະລາຍຕໍ່ສຸຂະພາບ ເພາະມີສ່ວນປະກອບຂອງໂລຫະໜັກທີ່ສາມາດກໍ່ໃຫ້ເກີດພະຍາດມະເຮັງໄດ້.