ວັນທີ 13/12/2020 ກໍພໍດີຄົບຮ້ອຍປີຂອງຊີວິດອາດີດຜູ້ນຳທ່ານ ໄກສອນ ພົມວິຫານ(13/12/1920) ສິ່ງທີ່ພວກເຮົາສາມາດນຳມາເປັນແວ່ນແຍງແກ່ຊີວິດ ແລະ ປະຍຸກໃຊ້ໃນໜ້າວຽກກໍແມ່ນບົດຮຽນຊີວິດຕົວຈິງຂອງທ່ານ ໄກສອນ ພົມວິຫານ ເຊິ່ງມັນໄດ້ສະແດງອອກບ່ອນບົດຂີດຂຽນ ປື້ມຕຳລາກ່ຽວກັບຊີວິດຂອງເພິ່ນທີ່ນັກວິຊາການ ຜູ້ນຳການປະຕິວັດໄດ້ຂຽນເຖິງ ຖ້າວ່າເຮົາຫາກອ່ານສຶກສາຄົ້ນຄວ້າກໍຈະພົບວ່າ ຄຸນສົມບັດທີ່ໜຶ່ງໃນຊີວິດທ່ານ ໄກສອນ ນັ້ນຄືການຮຽນຮູ້ຕະຫຼອດເວລາ.
ໃນປື້ມປະຫວັດທ່ານ ໜູຮັກ ພູມສະຫວັນ ໄດ້ເວົ້າເຖິງຕອນໜຶ່ງທີ່ເພິ່ນທັງສອງໄດ້ພົບກັນຢູ່ຮ່າໂນ້ຍ ເຊິ່ງທ່ານ ໄກສອນ ພົມວິຫານ ໄດ້ເວົ້າເຖິງໜັງສືທີ່ເພິ່ນມັກອ່ານສອງສາມຫົວ ແລະ ປື້ມຫົວໜຶ່ງທີ່ເວົ້າເຖິງພະລັງຂອງຈິດໃຈທີ່ເຂັ້ມແຂງ ເຊິ່ງເມື່ອທ່ານໜູຮັກ ໄດ້ວາງແຜນອອກຈາກຄຸກໂພງເຄັງ ເພິ່ນໄດ້ຄິດເຫັນຄຳເວົ້າຂອງທ່ານ ໄກສອນ ພົມວິຫານ ນີ້ແມ່ນປະເດັນໜຶ່ງທີ່ສຳຄັນມັນສະທ້ອນໃຫ້ເຫັນວ່າ ທ່ານ ໄກສອນ ພົມວິຫານ ເປັນຜູ້ຄົ້ນຄວ້າສະແຫວງຫາຄວາມຮູ້ທັງຈາກບຸກຄົນອ້ອມຂ້າງ ຫຼື ຈາກນັກວິຊາການຕ່າງປະເທດ ແລະ ໜັງສືຕຳລາຕ່າງໆ ບົດຮຽນການໃຊ້ຊີວິດສຶກສາຄົ້ນຄວ້າຕະຫຼອດເວລານັ້ນມັນໄດ້ເຮັດໃຫ້ທ່ານ ໄກສອນ ກາຍເປັນຜູ້ນຳທີ່ມີຄວາມຮູ້ສະຕິປັນຍາແຫຼມຄົມ ເບິ່ງບັນຫາ ແລະ ຕັດສິນໄດ້ຢ່າງຖືກຕ້ອງ.
ທ່ານ ສີຊະນະ ສີສານ ໄດ້ຂຽນໄວ້ກ່ຽວກັບຊີວິດ ທ່ານ ໄກສອນ ພົມວິຫານ ໃນປື້ມ ໄກສອນ ພົມວິຫານ ລູກຂອງປະຊາຊົນ 1991 ໜ້າ 47 ທ່ານ ໄກສອນ ພົມວິຫານ ໄດ້ອຸກໃຈນຳການຈັດຕັ້ງ ແນວທາງຂອງພັກ ແລະ ແຜນການຂອງລັດ ແນວທາງຖືກແຕ່ການຈັດຕັ້ງປະຕິບັດຍັງຂ້ອງຄານຳຫຼາຍອັນ… ປະເດັນນີ້ແມ່ນສະແດງເຖິງຄວາມຫ່ວງໄຍຂອງຜູ້ນຳທີ່ສະຫຼາດ ເພາະຈິດໃຈເພິ່ນໄດ້ຄິດຕິດຕາມແຜນງານທີ່ວາງອອກແຕ່ການຈັດຕັ້ງປະຕິບັດບາງອັນຍັງຂ້ອງຄາ ເຊິ່ງຄົງຈະຂຶ້ນກັບຄົນ ເພາະຄົນແມ່ນຜູ້ບໍລິຫານວຽກ ມັນຈຶ່ງຮຽກຮ້ອງໃຫ້ພະນັກງານເອົາໃຈໃສ່ຈິງໃຈຕໍ່ແນວທາງຂອງພັກ.
ທ່ານ ພູມີ ວົງວິຈິດ ໄດ້ຂຽນເນັ້ນໄວ້ໃນປື້ມຫົວດຽວກັນວ່າ: ມື້ທຳອິດເຮົາໄດ້ພົບສະຫາຍ ໄກສອນ ພົມວິຫານ ສາຍຕາແຫຼມຄົມ ສະຫຼາດວ່ອງໄວ ປາກເວົ້າ ພ້ອມກັບຍິ້ມຢ່າງມີສະເໜ່ ເບິ່ງແຕ່ຫົວທີກໍຮູ້ໂລດວ່າ ສະຫາຍເປັນຄົນມີຄວາມຮູ້ຄວາມສາມາດສູງແຕ່ຖ່ອມຕົນ… ຊີວິດທີ່ເພິ່ນອຸທິດແກ່ການຮຽນຮູ້ ແລະ ແກ່ຊາດ ແລະ ສັງຄົມ ນັ້ນເຍົາວະຊົນໜຸ່ມນ້ອຍຄວນສຶກສາໃຫ້ຮູ້ແຈ້ງ ແລະ ປະຕິບັດເອົາແບບຢ່າງທີ່ດີຂອງເພິ່ນ.
..ປະທານ ໄກສອນ ພົມວິຫານ ຜູ້ນຳທີ່ເຄົາລົບຮັກຍືນຍົງໃນພາລະກິດປະຕິວັດ ແລະ ຢູ່ໃນດວງໃຈຂອງປະຊາຊົນລາວຕະຫຼອດໄປ..
ໂດຍ: ດັ້ນກີບເມກ