ຈາກຂໍ້ມູນຂອງກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໃຫ້ຮູ້ວ່າ: ເດືອນພະຈິກ 2020 ຜ່ານມາ ທົ່ວປະເທດມີອຸບັດເຫດເກີດຂຶ້ນທັງໝົດ 666 ກໍລະນີ ມີຜູ້ເສຍຊີວິດຈຳນວນ 97 ຄົນ ທຽບໃສ່ເດືອນຕຸລາ ການເກີດອຸບັດເຫດແມ່ນເພີ່ມຂຶ້ນ 62 ກໍລະນີ ແລະ ຄົນເສຍຊີວິດກໍເພີ່ມຂຶ້ນເຊັ່ນດຽວກັນ ຄື 18 ຄົນ ເຊິ່ງນະຄອນຫຼວງວຽງຈັນ ມີຄົນເສຍຊີວິດຫຼາຍກວ່າໝູ່ ຮອງລົງມາແມ່ນແຂວງສະຫວັນນະເຂດ ລວມມູນຄ່າຄວາມເສຍຫາຍທັງໝົດປະມານ 11 ຕື້ກວ່າກີບ.
ການເກີດອຸບັດເຫດໃນແຕ່ລະຄັ້ງ ເຮັດໃຫ້ມີພາຫະນະເປ່ເພທັງໝົດ 1.185 ຄັນ ໃນນີ້ ເປ່ເພເລັກໜ້ອຍ 586 ຄັນ ສົມຄວນ 573 ຄັນ ໃຊ້ການບໍ່ໄດ້ 26 ຄັນ ມີຄົນໄດ້ຮັບບາດເຈັບທັງໝົດ 1.074 ຄົນ ໃນນີ້ ໄດ້ຮັບບາດເຈັບເລັກໜ້ອຍ 496 ຄົນ ສົມຄວນ 459 ຄົນ ສາຫັດ 119 ຄົນ ແລະ ມີຄົນເສຍຊີວິດທັງໝົດ 97 ຄົນ ຍິງ 38 ຄົນ ເຊິ່ງການເກີດອຸບັດ ເຫດສ່ວນໃຫຍ່ ແມ່ນເກີດມາຈາກນັກຂັບຂີ່ດື່ມສິ່ງມຶນເມົາ 239 ກໍລະນີ ແລະ ໃຊ້ຄວາມໄວເກີນກວ່າກົດໝາຍກຳນົດ 79 ກໍລະນີ ແລະ ອື່ນໆ.
ອີງຕາມສະຖິຕິການເກີດອຸບັດເຫດ ນະຄອນຫຼວງວຽງຈັນມີອຸບັດເຫດເກີດຂຶ້ນ 145 ຄັ້ງ ເສຍຊີວິດ 25 ຄົນ ຜົ້ງສາລີ 12 ຄັ້ງ ເສຍຊີວິດ 0 ຄົນ ອຸດົມໄຊ 29 ຄັ້ງ ເສຍຊີວິດ 3 ຄົນ ຫຼວງນ້ຳທາ 50 ຄັ້ງ ເສຍຊີວິດ 5 ຄົນ ບໍ່ແກ້ວ 14 ຄັ້ງ ເສຍຊີວິດ 2 ຄົນ ໄຊຍະບູລີ 33 ຄັ້ງ ເສຍຊີວິດ 6 ຄົນ ຫຼວງພະບາງ 64 ຄັ້ງ ເສຍຊີວິດ 6 ຄົນ ຫົວພັນ 9 ຄັ້ງ ເສຍຊີວິດ 3 ຄົນ ຊຽງຂວາງ 19 ຄັ້ງ ເສຍຊີວິດ 4 ຄົນ ໄຊສົມບູນ 7 ຄັ້ງ ເສຍຊີວິດ 1 ຄົນ ວຽງຈັນ 58 ຄັ້ງ ເສຍຊີວິດ 6 ຄົນ ບໍລິຄຳໄຊ 33 ຄັ້ງ ເສຍຊີວິດ 7 ຄົນ ຄຳມ່ວນ 10 ຄັ້ງ ເສຍຊີວິດ 2 ຄົນ ສະຫວັນນະເຂດ 71 ຄັ້ງ ເສຍຊີວິດ 14 ຄົນ ສາລະວັນ 16 ຄັ້ງ ເສຍຊີວິດ 0 ຄົນ ຈຳປາສັກ 67 ຄັ້ງ ເສຍຊີວິດ 9 ຄົນ ເຊກອງ 13 ຄັ້ງ ເສຍຊີວິດ 1 ຄົນ ແລະ ແຂວງອັດຕະປື 16 ຄັ້ງ ເສຍຊີວິດ 3 ຄົນ.
# ຂ່າວ & ພາບ: ຊິລິການດາ