ສຳລັບຜູ້ທີ່ມີໂອກາດໄດ້ເຫາະເຫີນເດີນອາກາດເລື້ອຍໆນັ້ນ ເລື່ອງຕໍ່ໄປນີ້ຈະກາຍເປັນຄວາມຮູ້ແຮໄວ້.
ທີ່ ມາເລເຊຍ: ການປົກປ້ອງຜົນປະໂຫຍດຂອງຜູ້ໂດຍສານທາງອາກາດ ຢູ່ມາເລເຊຍນັ້ນ ໄດ້ຮັບການຄ້ຳປະກັນດ້ວຍກົດໝາຍຄັກແນ່ ກົດໝາຍທີ່ວ່ານັ້ນໄດ້ປະກາດໃຊ້ມາແຕ່ເດືອນກໍລະກົດ 2016 ໂດຍໄດ້ກຳນົດໃຫ້ບໍລິສັດການບິນຕ້ອງແຈ້ງຄ່າປີ້ຍົນຢ່າງລະອຽດວ່າ ໄດ້ກວມເອົາຄ່າໃຊ້ຈ່າຍຫຍັງແດ່ ເຊັ່ນ: ຄ່າອາກອນກໍ່ສ້າງ ການຄຸ້ມຄອງສະໜາມບິນ ອາກອນຜູ້ໂດຍສານ ຄ່າປະກັນໄພ ຄ່າຂົນສົ່ງເຄື່ອງຂອງ ຄ່າອາຫານໃນຍົນ ແລະ ອື່ນໆ ເວົ້າໃຫ້ສັ້ນໆກໍຄືວ່າ ກ່ອນຈະມາເປັນຄ່າປີ້ຍົນປີ້ໜຶ່ງນັ້ນ ມັນກວມເອົາຄ່າໃຊ້ຈ່າຍຫຍັງແດ່ ນອກຈາກນັ້ນ ກົດໝາຍຍັງກຳນົດໃຫ້ທາງບໍລິສັດການບິນຮັບຜິດຊອບແກ້ໄຂທຸກໆຄະດີທີ່ມີການຮ້ອງຟ້ອງຈາກຜູ້ໂດຍສານພາຍໃນ 30 ວັນ ເປັນຢ່າງຊ້າ ບໍ່ພຽງແຕ່ເທົ່ານັ້ນ ກົດໝາຍຍັງມີຜົນບັງຄັບໃຊ້ກັບບໍລິສັດການບິນຕ່າງປະເທດທີ່ນຳໃຊ້ສະໜາມບິນໃນມາເລເຊຍອີກດ້ວຍ ທັງນີ້ກໍເພື່ອຮັບປະກັນໃຫ້ພົນລະເມືອງມາເລເຊຍ ທີ່ໂດຍສານດ້ວຍເຄື່ອງບິນຂອງບໍລິສັດການບິນຕ່າງປະເທດໄດ້ຮັບການປົກປ້ອງເຊັ່ນດຽວກັນ.
ທີ່ ອິນໂດເນເຊຍ: ໃນເດືອນມັງກອນ 2019 ສາຍການບິນແຫ່ງຊາດ “ກາຣູດາ” (Garuda) ຂອງອິນໂດເນເຊຍ ໄດ້ສະເໜີຫົວຄິດປະດິດສ້າງໃໝ່ໆ ເພື່ອດຶງດູດຜູ້ໂດຍສານໃຫ້ນຳໃຊ້ສາຍການບິນນີ້ຫຼາຍຂຶ້ນ ຫົວຄິດປະດິດສ້າງທີ່ວ່ານັ້ນ ກໍຄື ຈັດໃຫ້ມີລາຍການເສບດົນຕີ ແລະ ຮ້ອງເພງສົດຈາກເຫຼົ່າສິລະປິນຊື່ດັງໃນເຄື່ອງບິນ ເພື່ອກ່ອມອາລົມຂອງຜູ້ໂດຍສານໃນທຸກໆຖ້ຽວບິນ ເປັນອັນວ່າ ທາງສາຍການບິນໄດ້ນຳເອົານັກດົນຕີຮ່ວມຖ້ຽວບິນໃນທຸກຖ້ຽວຂອງສາຍການບິນພາຍໃນ ການເສບ ແລະ ຮ້ອງເພງສົດນັ້ນ ໃຊ້ເວລາປະມານ 10-15 ນາທີ ຂ່າວບອກວ່າ ການເສບ ແລະ ຮ້ອງສົດນັ້ນ ເລີ່ມປະຕິບັດໃນຖ້ຽວບິນແຮກໝານຄັ້ງວັນທີ 9 ມັງກອນ 2019 ແຕ່ນະຄອນຫຼວງຈາກາຕາ ຫາເມືອງເດັນປາຊາ ແຕ່ປາກົດວ່າ ຫົວຄິດປະດິດສ້າງໃໝ່ໆແປກໆນີ້ ບໍ່ພຽງແຕ່ບໍ່ໄດ້ຮັບຄວາມນິຍົມຊົມຊອບຈາກຜູ້ໂດຍສານ ແຕ່ຍັງໄດ້ໃບສຽງຄັດຄ້ານຕ້ານຄືນຢ່າງຟົດສະໜັ່ນຕາມພາຍຫຼັງ ເຊັ່ນ: ຜູ້ໂດຍສານຊື່ ດຽນ ອອນໂນ ບອກວ່າ “ໃນຖ້ຽວບິນນັ້ນ ເຮົາຕ້ອງການຄວາມສະຫງົບເປັນຂອງຕົນເອງ ຈະຟັງ ຫຼື ບໍ່ຟັງດົນຕີນັ້ນແມ່ນທາງເລືອກຂອງເຮົາເອງ… ບໍ່ມີໃຜດອກຕ້ອງການຖືກບັງຄັບໃຫ້ຟັງດົນຕີ” ອີກຄົນໜຶ່ງຊື່ ຊັນລີເຢໂລ ບອກວ່າ “ຢ່າເລີຍ… ກາຣູດາ!… ເຮົາຕ້ອງການຟັງດົນຕີຜ່ານເຄື່ອງຟັງຫູ… ແລ້ວນອນ” ອີກຄົນໜຶ່ງບອກວ່າ “ຄວນບໍລິການເຄື່ອງຟັງຫູ ແລະ ເພີ່ມການສາຍຮູບເງົາຍັງຈະດີກວ່າເອົານັກດົນຕີໝວດຊຸມຊຸຍຂຶ້ນຍົນມາສະແດງ…” ນອກຈາກນັ້ນ ກໍຍັງມີຂໍ້ຄວາມຢອກລໍ້ອໍ້ແອ້ຕ່າງໆນາໆກ່ຽວກັບຫົວຄິດປະດິດສ້າງຂອງສາຍການບິນ ກາຣູດາ ຄັ້ງນີ້.
ທີ່ ສປ ຈີນ: ມາດຕະການຄວາມປອດໄພຂອງການບິນພົນລະເຮືອນຈີນ ມີຄວາມເຄັ່ງຄັດຮັດກຸມທີ່ສຸດ ໂດຍເນັ້ນການປ້ອງກັນບໍ່ໃຫ້ເກີດອຸບັດເຫດໃນການຂົນສົ່ງທາງອາກາດ ຈາກຄວາມປະໝາດໃນການປະຕິບັດໜ້າທີ່ ປ້ອງກັນບໍ່ໃຫ້ເກີດເຫດກໍ່ການຮ້າຍ ແລະ ວາງລະເບີດເຮືອບິນ ປ້ອງກັນບໍ່ໃຫ້ເກີດອຸບັດເຫດທາງບົກ ແລະ ການສ້ອມແປງເຮືອບິນຄັ້ງໃຫຍ່ ເນື້ອໃນນີ້ສະຫຼຸບມາຈາກກອງປະຊຸມການບິນພົນລະເຮືອນແຫ່ງຊາດຈີນ ປະຈຳປີ 2020.