ໃນບົດປະຈຳວັນນີ້ ມີເລື່ອງກ່ຽວກັບມາດຕະການຕ່າງໆ ເພື່ອກຳຈັດຂໍ້ຄວາມໃນສື່ສັງຄົມ ທີ່ກໍ່ໃຫ້ເກີດມີຄວາມລັງກຽດຄຽດຊັງ ການຈຳແນກຜິວພັນເຊື້ອຊາດ ກໍຄື ການຍຸຍົງສົ່ງເສີມການໃຊ້ຄວາມຮຸນແຮງ.
ອົງການສະຫະປະຊາຊາດ (ສປຊ): ໃນທ້າຍເດືອນມິຖຸນາ 2019 ທ່ານ ອານໂຕໂຍ ອູເຕເຣັດ ເລຂາທິການໃຫຍ່ ອົງການສະຫະປະຊາຊາດ ໄດ້ປະກາດແຜນຍຸດທະສາດ ເພື່ອຕ້ານຂໍ້ຄວາມອັນຕະລາຍທີ່ຜ່ານເຄືອຄ່າຍສື່ສານສັງຄົມ ດ້ວຍວິທີຊອກຮູ້ເຫດຜົນຂອງບັນຫາ ກຳນົດວິທີການປ້ອງກັນ ແລະ ວິທີຕ້ານທານໂດຍກົງ ທ່ານເລຂາທິການໃຫຍ່ບອກວ່າ ຂໍ້ຄວາມທີ່ກໍ່ໃຫ້ເກີດຄວາມຄຽດແຄ້ນກຽດຊັງນັ້ນ ເປັນຕົວມານທີ່ຮ້າຍຂາດຕໍ່ພື້ນຖານສິດທິມະນຸດ ມັນທຳລາຍຄວາມສະໝານສາມັກຄີ ສັນຕິພາບ ກໍຄື ການພັດທະນາແບບຍືນຍົງ ແຜນຍຸດທະສາດດັ່ງກ່າວຂອງອົງການສະຫະປະຊາຊາດ ມີເປົ້າທີ່ສຳຄັນຕົ້ນຕໍຢູ່ 2 ຢ່າງຄື: ໜຶ່ງ: ແກ້ໄຂສາເຫດຕົ້ນຕໍທີ່ກໍ່ໃຫ້ເກີດມີການແຜ່ລະບາດຂໍ້ຄວາມທີ່ສ້າງຄວາມຄຽດຊັງໃນສັງຄົມ ເຊັ່ນ: ການໃຊ້ຄວາມຮຸນແຮງ ຊ່ອງຫວ່າງຫຼຸດໂຕນ ການຈຳແນກ ຄວາມທຸກຍາກ ການບໍ່ມີສ່ວນຮ່ວມ ຄວາມບໍ່ສະເໝີພາບ ການຂາດພື້ນຖານການສຶກສາ ແລະ ຄວາມອ່ອນແອໄຮ້ປະສິດທິພາບໃນກົນໄກການປົກຄອງຂອງລັດ ວິທີແກ້ໄຂສາເຫດໂຕທີ 1 ໜຶ່ງ ກໍຄື ຕ້ອງຊອກໃຫ້ເຫັນຜູ້ກໍ່ເຫດ ແລ້ວຊອກຫາຜູ້ທີ່ມີຄວາມສາມາດປະເຊີນໜ້າກັບຜູ້ກໍ່ເຫດດັ່ງກ່າວ ປັບປຸງໃຫ້ລະບົບການສຶກສາເຂັ້ມແຂງ ເພື່ອເປັນເຄື່ອງມືປ້ອງກັນລ່ວງໜ້າ ການສຶກສາຈະເຮັດໜ້າທີ່ສັງລວມເປົ້າໝາຍທີ່ເປັນເອກະພາບ ໃນການຕ້ານຂໍ້ຄວາມແຫ່ງຄວາມຄຽດຊັງກັນ ເປົ້າໝາຍສຳຄັນຕົ້ນຕໍອັນທີສອງຂອງແຜນຍຸດທະສາດ ກໍຄື ເພີ່ມຂີດຄວາມສາມາດຂອງອົງການ ສປຊ ໃຫ້ມີຄວາມສາມາດແກ້ໄຂຜົນກະທົບທາງລົບຂອງຂໍ້ຄວາມແຫ່ງຄວາມລັງກຽດຄຽດຊັງທີ່ມີຕໍ່ສັງຄົມ.
ທີ່ ເຢຍລະມັນ: ໃນທ້າຍເດືອນ ກຸມພາ 2020 ທາງການເຢຍລະມັນ ໄດ້ຮັບຮອງເອົາກົດໝາຍຕ້ານລັດທິຂວາຈັດ ອາຊະຍາກຳແຫ່ງຄວາມຄຽດຊັງ ທີ່ເຜີຍແຜ່ຜ່ານລະບົບອິນເຕີເນັດ ກົດໝາຍໄດ້ກຳນົດໂທດຜູ້ລະເມີດດ້ວຍໂທດຈຳຄຸກສູງສຸດເປັນເວລາ 3 ປີ ເພີ່ມຈາກ 1 ປີໃນເມື່ອກ່ອນ ພາຍໃຕ້ກົດໝາຍດັ່ງກ່າວ ເຄືອຄ່າຍສື່ສັງຄົມອອນລາຍ ຕ້ອງໄດ້ລາຍງານການເຜີຍແຜ່ເອກະສານ ຂອງບັນດາອົງການຈັດຕັ້ງນອກລັດຖະທຳມະນູນ ໃຫ້ຫ້ອງການຕຳຫຼວດທີ່ຮັບຜິດຊອບຄະດີອາຊະຍາກຳ ນອກຈາກນັ້ນ ຍັງຕ້ອງລາຍງານເນື້ອໃນທີ່ຈະກໍ່ໃຫ້ເກີດມີການໃຊ້ຄວາມຮຸນແຮງຢ່າງໜັກໜ່ວງ ກໍຄື ບັນຍາກາດແຫ່ງຄວາມຄຽດຊັງທີ່ຈະເປັນອັນຕະລາຍຕໍ່ອຳນາດລັດ ເຈົ້າໜ້າທີ່ຕຳຫຼວດມີສິດທວງເອົາທີ່ຢູ່ ແລະ ລະຫັດສະເພາະສ່ວນບຸກຄົນຂອງຜູ້ໃຊ້ສື່ສັງຄົມອອນລາຍ ໃນກໍລະນີທີ່ມີພົວພັນກັບອາຊະຍາກຳທີ່ຮ້າຍແຮງ ໃນເມື່ອກ່ອນ (ກ່ອນມີກົດໝາຍສະບັບນີ້) ເຈົ້າຂອງສຳນັກງານສື່ດີຈີຕອນ ມີພຽງແຕ່ໄດ້ຮັບການຂໍຮ້ອງໃຫ້ລຶບເນື້ອໃນທີ່ຂັດກັບກົດໝາຍອອກ.
ໃນເດືອນຕຸລາ 2019 ກຸ່ມຫົວຮຸນແຮງຂວາຈັດ ໄດ້ໂຈມຕີແບບກໍ່ການຮ້າຍໃນຊຸມຊົນຊາວຢິວ ທີ່ເມືອງຮານເລີ ທາງພາກຕາເວັນອອກຂອງເຢຍລະມັນ ໂດຍຊາຍຄົນໜຶ່ງໄດ້ຍິງປືນກວາດໃສ່ຊາວຢິວ ຢູ່ນອກສຳນັກປະຕິບັດທຳ ວ່າກັນວ່າ ກົດໝາຍຕ້ານການໃຊ້ຄວາມຮຸນແຮງຂອງກຸ່ມຂວາຈັດສະບັບນີ້ ອອກມາເພື່ອຮັບມືກັບການກະທຳແບບກໍ່ການຮ້າຍທີ່ອາດເກີດຂຶ້ນອີກໃນອະນາຄົດ ທ່ານນາງ ຄຼິດສະຕິນ ລຳເບຼັດ ລັດຖະມົນຕີກະຊວງຍຸຕິທຳຂອງເຢຍລະມັນ ມີຄຳເຫັນກ່ຽວກັບກົດໝາຍສະບັບນີ້ວ່າ: “ຕໍ່ໄປ ບຸກຄົນທີ່ໃຊ້ອິນເຕີເນັດ ເພື່ອເປົ້າໝາຍຂູ່ເຂັນ (ຄົນອື່ນ) ຈະຕ້ອງຖືກຕັດສິນຢ່າງເຄັ່ງຄັດ ແລະ ໜັກຂຶ້ນ ພວກເຮົາຕ້ອງດັບສູນບ່ອນເພາະພັນ ທີ່ເຮັດໃຫ້ລັດທິການໃຊ້ຄວາມຮຸນແຮງແຜ່ລະບາດ”.