ອຸບັດເຫດທີ່ເກີດຂຶ້ນກັບການໂດຍສານ ບໍ່ວ່າຈະເປັນທາງອາກາດ ທາງບົກ ຫຼື ທາງນ້ຳນັ້ນ ກໍລ້ວນແຕ່ໄດ້ສ້າງຄວາມເສຍຫາຍຕໍ່ຊີວິດ ກໍຄື ເສດຖະກິດ ດັ່ງນັ້ນ ແຕ່ລະປະເທດຈຶ່ງໃຫ້ຄວາມສຳຄັນເປັນພິເສດຕໍ່ຄວາມປອດໄພຂອງຜູ້ໂດຍສານ ເຊັ່ນ:
ທີ່ ສປ ຈີນ: ໃນເດືອນສິງຫາ ປີ 2018 ທາງການ ສປ ຈີນ ໄດ້ເລີ່ມມາດຕະການປັບປຸງມາດຕະຖານ ການໃຫ້ບໍລິການໃນຂະແໜງການຂົນສົ່ງ ແນໃສ່ຮັບປະກັນຄວາມປອດໄພຂອງຜູ້ໃຊ້ບໍລິການ (ຜູ້ໂດຍສານ) ພາຍຫຼັງເກີດມີຄະດີຜູ້ໂດຍສານຍິງຄົນໜຶ່ງຖືກຂົ່ມຂືນ ແລະ ຂ້າຖິ້ມໃນເວລານຳໃຊ້ລົດແທັກຊີ (Taxi) ຂອງບໍລິສັດ ຄາພູນຕີຕີຊູສິງ ອັນເປັນເຫດໃຫ້ທາງບໍລິສັດຕ້ອງໄດ້ຢຸດການໃຫ້ບໍລິການ ຈາກເຫດການດັ່ງກ່າວ ທາງກະຊວງຂົນສົ່ງຂອງຈີນໄດ້ທວງໃຫ້ທາງບໍລິສັດຕ້ອງຮັບຜິດຊອບຕໍ່ເຫດການທີ່ເກີດຂຶ້ນກັບຜູ້ໂດຍສານໃນທຸກກໍລະນີ ພາຍຫຼັງນັບແຕ່ເວລາຜູ້ໂດຍສານຍ່າງຂຶ້ນລົດ ຂ່າວໃຫ້ຮູ້ຕື່ມວ່າ ໃນເດືອນພຶດສະພາປີດຽວກັນນັ້ນ (2018) ຜູ້ໂດຍສານຂອງ ຄາພູນ ອີກຄົນໜຶ່ງ ກໍຖືກຄາຕະກຳ ອັນໄດ້ສ້າງກະແສຄວາມຄຽດແຄ້ນໃນທົ່ວສັງຄົມ ຕໍ່ການໃຫ້ບໍລິການຂອງທາງບໍລິສັດ ນອກຈາກຢຸດການໃຫ້ບໍລິການນັບແຕ່ວັນທີ 27 ເດືອນສິງຫາ 2018 ເປັນຕົ້ນມາ ທາງບໍລິສັດ ຍັງໄດ້ປົດຜູ້ບໍລິຫານ 2 ຄົນ ອອກຈາກຕຳແໜ່ງ ແລ້ວເລີ່ມເຮັດການປະເມີນຮູບແບບທຸລະກິດໃໝ່ ເພື່ອປ່ຽນແທນບໍລິສັດ ຄາພູນ ທີ່ໄດ້ທຳລາຍຄວາມເຊື່ອໝັ້ນຂອງສັງຄົມລົງຢ່າງສິ້ນເຊີງ.
ທີ່ອົງການ ການບິນພົນລະເຮືອນສາກົນ: (ICAO): ເພື່ອຮັບປະກັນຄວາມປອດໄພຂອງສາຍການບິນພົນລະເຮືອນໃນທົ່ວໂລກ ທາງອົງການ ICAO ໄດ້ເອົາມາດຕະການເຄັ່ງຄັດຮັດກຸມຫຼາຍຂຶ້ນກ່ຽວກັບສຸຂະພາບ ແລະ ລະບົບການບັນຊາເຄື່ອງບິນຂອງບັນດານັກບິນ ຄື:
ໜຶ່ງ: ນັກບິນທຸກຄົນນອກຈາກການກວດເຊັກຮ່າງກາຍ ແລະ ສຸຂະພາບຈິດແລ້ວ ຍັງຕ້ອງໄດ້ຜ່ານການກວດລະບົບປະສາດຕື່ມອີກຈາກຄະນະແພດ ແລະ ຜູ້ຊ່ຽວຊານທີ່ມີຄວາມຊຳນານງານເປັນພິເສດໃນດ້ານນີ້ ສອງ: ໃນຫ້ອງຂັບຕ້ອງມີນັກບິນຢ່າງໜ້ອຍ 2 ຄົນ ຢູ່ເປັນປະຈຳ ໃນກໍລະນີນັກບິນຄົນໃດຄົນໜຶ່ງມີວຽກສ່ວນຕົວ ຕ້ອງໄດ້ອອກຈາກຫ້ອງຂັບໄປ ຫ້າມເດັດຂາດບໍ່ໃຫ້ມີນັກບິນຢູ່ໃນຫ້ອງຂັບຄົນດຽວ ນີ້ເປັນມາດຕະການທີ່ສາຍການບິນພົນລະເຮືອນຂອງເຢຍລະມັນໄດ້ເລີ່ມປະຕິບັດກ່ອນໝູ່ ມາດຕະການເຄັ່ງຄັດຮັດກຸມດັ່ງກ່າວ ມີຂຶ້ນພາຍຫຼັງມີເຫດເຄື່ອງບິນໂດຍສານເຢຍລະມັນວິງ ບິນຊົນພູເຂົາແອນ ທີ່ປະເທດຝຣັ່ງ ເຮັດໃຫ້ມີຄົນເສຍຊີວິດພາບດຽວເຖິງ 150 ຄົນ ໃນທ້າຍເດືອນເມສາ 2015 ຜ່ານການກວດສອບຂອງອົງການ ການບິນພົນລະເຮືອນສາກົນ ກ່ຽວກັບອຸບັດເຫດຄັ້ງນັ້ນ ໄດ້ມີຜົນວິເຄາະອອກມາວ່າ: ທ້າວ ອັງເດຼ ອາດລູບິດ ອາຍຸ 28 ປີ ເຊິ່ງເປັນນັກບິນສຳຮອງ (ຜູ້ຊ່ວຍ) ໄດ້ຕັ້ງໃຈຂັບເຄື່ອງບິນຕຳພູ ເພາະເຂົາເຄີຍມີປະຫວັດຄວາມບົກຜ່ອງທາງປະສາດ ແລະ ໃນຂະນະນັ້ນ ເຂົາກໍຢູ່ຫ້ອງຂັບພຽງຄົນດຽວ ເພາະນັກບິນທີ່ເປັນຫົວໜ້າໃນການບັນຊາເຄື່ອງບິນໄດ້ອອກຫ້ອງຂັບໄປທຸລະສ່ວນຕົວ.
ທີ່ ສ ເກົາຫຼີ: ນີ້ເປັນເລື່ອງມາດຕະການປ້ອງກັນອຸບັດເຫດຕາມຖະໜົນ ເຊິ່ງຜູ້ສ່ຽງຕົກເປັນເຫຍື່ອສ່ວນໃຫຍ່ແມ່ນກຸ່ມຄົນໃນສັງຄົມກົ້ມໜ້າ ຂ່າວກ່ຽວກັບມາດຕະການດັ່ງກ່າວ ມີຂຶ້ນໃນທ້າຍເດືອນກັນຍາ 2016 ທີ່ນະຄອນຫຼວງເຊອູນ ໂດຍໄດ້ບອກວ່າ ທາງການໄດ້ຕິດຕັ້ງປ້າຍເຕືອນສະຕິກຸ່ມຄົນທີ່ກົ້ມໜ້າເບິ່ງຈໍໂທລະສັບມືຖື ກ່ຽວກັບຄວາມສ່ຽງທີ່ພວກເຂົາຈະຖືກລົດຕຳບາດເຈັບລົ້ມຕາຍ ເວລາຍ່າງຂວ້າມທາງ ແຜ່ນປ້າຍຊຸດທຳອິດໄດ້ເອົາໄປຕິດໄວ້ຕາມເສົາໄຟຟ້າໃນ 5 ຈຸດ ບ່ອນທີ່ມີສະພາບການຈະລາຈອນແໜ້ນໜາ ສັບສົນທີ່ສຸດຂອງນະຄອນຫຼວງ ໂດຍຫວັງວ່າ ເມື່ອມາບເຫັນປ້າຍແລ້ວຜູ້ໃຊ້ໂທລະສັບມືຖືຈະໄດ້ຕັ້ງສະຕິແຕ່ເລື່ອງນີ້ກໍມີຫຼາຍຄົນ ຕັ້ງຂໍ້ສົງໄສວ່າ ອາດບໍ່ໄດ້ຜົນ ເພາະພວກບ້າໜ້າຈໍນັ້ນຄົງບໍ່ມີເວລາເວສາຍຕາອອກໄປທາງອື່ນ ມາດຕະການຕິດປ້າຍເຕືອນຄົນຍ່າງທີ່ໃຊ້ສະມາດໂຟນຄັ້ງນີ້ ມີຂຶ້ນພາຍ ຫຼັງມີສະຖິຕິກ່ຽວກັບອຸບັດເຫດທີ່ເກີດຂຶ້ນກັບພວກໃຊ້ມືຖືເວລາຍ່າງ ຄື ໃນປີ 2000 ທີ່ກົ້ມເບິ່ງໜ້າຈໍມືຖືເວລາຍ່າງ ອຸບັດເຫດໄດ້ເກີດຂຶ້ນກັບ 437 ຄົນ ແລະ ໄດ້ເພີ່ມຂຶ້ນຫຼາຍກວ່າ 1.000 ຄົນ ໃນປີ 2014.