ນອກຈາກລົດໄຟຟ້າ ກຳລັງເປັນເຕັກໂນໂລຊີທີ່ສັ່ນສະເທືອນອຸດສາຫະກຳຍານຍົນ ຝັ່ງລົດຈັກໄຟຟ້າ ກໍເລີ່ມຖືກໃຫ້ຄວາມສຳຄັນຫຼາຍຂຶ້ນ ແລະ ຫຼ້າສຸດ Honda Yamaha Kawasaki ແລະ Suzuki ໄດ້ຮ່ວມມືກັນທົດສອບເຕັກໂນໂລຊີນີ້ແລ້ວ.
ຍົກລະດັບເຕັກໂນໂລຊີໃຫ້ໃຊ້ວຽກໄດ້
ເມື່ອປີ 2019 ທາງ Honda Yamaha Kawasaki ແລະ Suzuki ໄດ້ຕັ້ງກິດຈະການຄ້າຂາຍຮ່ວມ ຫຼື Consortium ເພື່ອພັດທະນາເຕັກໂນໂລຊີລົດຈັກໄຟຟ້າ ໂດຍສະເພາະ ລະບົບສະຫຼັບແບດເຕີຣີ່ ໃຫ້ໃຊ້ວຽກຮ່ວມກັນໄດ້ທັງ 4 ຍີ່ຫໍ້ ແຕ່ທີ່ສຸດແລ້ວຍັງບໍ່ມີຄວາມຊັດເຈນອອກມາວ່າເຕັກໂນໂລຊີດັ່ງກ່າວ ມີລາຍລະອຽດເປັນຢ່າງໃດແດ່.
ຫຼ້າສຸດ ທັງ 4 ຍີ່ຫໍ້ ໄດ້ປະກາດຄວາມຄືບໜ້າຂອງການພັດທະນາເຕັກໂນໂລຊີລົດຈັກໄຟຟ້າ ດ້ວຍຮ່ວມມືກັບມະຫາວິທະຍາໄລໂອຊາກາ ຜ່ານໂຄງການ e-Yan OSAKA ທີ່ນຳລົດຈັກໄຟຟ້າໄປໃຫ້ນັກສຶກສາ ແລະ ເຈົ້າໜ້າທີ່ໃນມະຫາວິທະຍາໄລໄດ້ຮ່ວມທົດສອບ ພ້ອມກັບຕັ້ງຕູ້ສະຫຼັບແບດເຕີຣີ່ໃນມະຫາວິທະຍາໄລ ແລະ ຮ້ານສະດວກຊື້ເຂດໃກ້ຄຽງ.
ການທົດສອບນີ້ ຈະກິນໄລຍະເວລາປະມານ 1 ປີ ເພື່ອນຳຂໍ້ມູນການໃຊ້ງານ ແລະ ປະສິດທິພາບຂອງແບດເຕີຣີໄປວິໄຈ ແລະ ພັດທະນາເພື່ອຕໍ່ຍອດສູ່ການຜະລິດຈິງ ຫຼັງຈາກນີ້ ໂດຍຕົວແທນຈາກ Honda ລະບຸວ່າ ເຕັກໂນໂລຊີການສະຫຼັບແບດເຕີຣີ ສາມາດສ້າງການເຕີບໂຕໃຫ້ກັບຕະຫຼາດລົດຈັກໄຟຟ້າໄດ້ ແລະ ກິດຈະການຄ້າຂາຍຮ່ວມນີ້ ຈະຊ່ວຍຍູ້ດັນຢ່າງເຕັມທີ່.
ຢ່າງໃດກໍຕາມ ຍັງບໍ່ມີລາຍລະອຽດກ່ຽວກັບຄວາມຈຸ ແລະ ປະສິດທິພາບໃນການສົ່ງກຳລັງຂອງແບດເຕີຣີ ແຕ່ມີການຄາດການກັນວ່າ ແບດເຕີຣີທີ່ໃຊ້ທົດສອບ ມີຄວາມສາມາດໃກ້ຄຽງກັບທີ່ Honda ເຄີຍໃຊ້ທົດສອບກັບຮຸ່ນ PCX ສ່ວນໃນປະເທດໄທ ພາບລວມຕະຫຼາດລົດຈັກໄຟຟ້າ ເໝືອນຈະກໍ່ຕົວຕິດ ແຕ່ສຸດທ້າຍທຸກຢ່າງຍັງບໍ່ມີຄວາມຄືບໜ້າ.
ສະຫຼຸບ
ຕອນນີ້ ຍັງບໍ່ມີຄວາມຊັດເຈນວ່າ ເຕັກໂນໂລຊີສະຫຼັບແບດເຕີຣີ ຫຼື ການສຽບປລັ໊ກສາກ ຄືເຕັກໂນໂລຊີທີ່ເໝາະສົມກັບການໃຊ້ງານລົດຈັກໄຟຟ້າຫຼາຍທີ່ສຸດ ແຕ່ຈາກການຮ່ວມມືຂອງ Honda Yamaha Kawasaki ແລະ Suzuki ກໍໜ້າຈະຊີ້ໃຫ້ເຫັນວ່າ ອະນາຄົດຂອງລົດຈັກໄຟຟ້າຈະເປັນຢ່າງໃດ.