ພາຍຫຼັງທີ່ໄດ້ພິມຄຳຕັດສີນສຳເລັດ ແລະ ປະທານຄະນະສານ ພ້ອມດ້ວຍຈ່າສານໄດ້ລົງລາຍເຊັນ ແລະ ຈ້ຳກາຄະນະສານ ແລະ ຊື່ແຈ້ງຂອງຈ່າສານເປັນທີ່ຮຽບຮ້ອຍແລ້ວ ຈ່າສານຈະເຮັດຄຳຕັດສິນເປັນ 2 ສະບັບ ສະບັບ 1 ເກັບໄວ້ໃນສຳເນົາຂອງຄະນະສານ ອີກສະບັບ 1 ເກັບໄວ້ໃນ ສຳນວນຄະດີ ໃນກໍລະນີທີ່ມີການຕັດສິນເປັນການຕັດສີນຊ້ອງໜ້າຄູ່ຄວາມ ຈ່າສານຈະອອກໝາຍຮຽກຄູ່ຄວາມທັງສອງຝ່າຍເຂົ້າຮັບເອົາຄຳຕັດສິນ ແລະ ຖ້າຄູ່ຄວາມທັງສອງຝ່າຍ ຫຼື ພາກສ່ວນອື່ນຕ້ອງການເອົາຄຳຕັດສິນນັ້ນ ຈ່າສານຈະສຳເນົາໃຫ້ພວກກ່ຽວ ພ້ອມທັງລົງລາຍເຊັນໃສ່ດ້ານຫຼັງເພື່ອຢັ້ງຢືນຄຳຕັດສິນດັ່ງກ່າວ.
ໃນກໍລະນີທີ່ຄະນະສານຫາກໄດ້ຕັດສິນລັບຫຼັງຄູ່ຄວາມຝ່າຍໃດຝ່າຍໜຶ່ງນັ້ນ ຈ່າສານກໍຈະເປັນຜູ້ຮຽກຄູ່ຄວາມຝ່າຍທີ່ບໍ່ໄດ້ເຂົ້າມາຮ່ວມ ການພິຈາລະນາຄະດີໃນທີ່ປະຊຸມສານ ແລະ ມື້ປະກາດຄຳຕັດສິນນັ້ນ ເພື່ອເຂົ້າມາຮັບຊາບຄຳຕັດສິນ ພາຍຫຼັງທີ່ຜູ້ກ່ຽວເຂົ້າມາແລ້ວ ຈ່າສານກໍເຮັດບົດບັນທຶກຮັບຊາບຄຳຕັດສິນໃຫ້ຝ່າຍທີ່ບໍ່ໄດ້ເຂົ້າຮ່ວມ ພ້ອມທັງແຈ້ງສິດໃນການຄັດ ຄ້ານການຕັດສິນຂອງສານ ເພື່ອສະເໜີໃຫ້ຄະນະສານພິຈາລະນາຕັດສິນຄະດີນັ້ນຄືນໃໝ່ ໃຫ້ຊ້ອງໜ້າຜູ້ກ່ຽວ ແລະ ແຈ້ງສິດໃນການຂໍອຸທອນໃຫ້ແກ່ຜູ້ກ່ຽວຊາບ.
ໃນກໍລະນີທີ່ຈ່າສານ ໄດ້ສົ່ງໝາຍຮຽກໃຫ້ຄູ່ຄວາມເຂົ້າມາຮັບຊາບຄຳຕັດສິນເຖິງ 3 ຄັ້ງແລ້ວ ແຕ່ຄູ່ຄວາມທີ່ຖືກຄະນະສານຕັດສິນລັບຫຼັງນັ້ນ ຫາກບໍ່ເຂົ້າມາສານໂດຍບໍ່ມີເຫດຜົນພຽງພໍ ຊຶ່ງມີການຢັ້ງຢືນຈາກອົງການປົກຄອງບ້ານ ຫຼື ການຈັດຕັ້ງທີ່ກ່ຽວຂ້ອງແລ້ວ ຈ່າສານກໍຈະສົ່ງສຳນວນຄະດີດັ່ງກ່າວ ໄປຍັງຫ້ອງການຈັດຕັ້ງປະຕິບັດຄຳຕັດສິນຂອງສານ ເພື່ອຈັດຕັ້ງປະຕິບັດ ຫຼື ສົ່ງສຳນວນຄະດີໄປຍັງສານປະຊາຊົນຂັ້ນອຸທອນພິຈາລະນາ ຖ້າມີການຮ້ອງຂໍອຸທອນ ຫຼື ມີການສະເໜີຄັດຄ້ານຄຳຕັດສິນຂອງສານຂອງຫົວໜ້າອົງການໄອຍະການປະຊາຊົນ ທັງໝົດນີ້ແມ່ນບັນດາຂັ້ນຕອນຕ່າງໆຂອງສານ ພາຍຫຼັງທີ່ໄດ້ມີການປະກາດຄຳຕັດສີນຂອງສານແລ້ວ ຊຶ່ງຂະບວນການດຳເນີນຈະປະຕິບັດຕາມກຳນົດເວລາທີ່ກົດໝາຍ ວ່າດ້ວຍການດຳເນີນຄະດີແພ່ງໄດ້ກຳນົດໄວ້ ເພື່ອຫຼີກເວັ້ນຫາງສຽງທີ່ວ່າ ເປັນຫຍັງສານປະຊາຊົນຕັດສິນແຕ່ດົນ ແຕ່ຍັງບໍ່ທັນໄດ້ຄຳຕັດສິນ ຫຼື ອາດຈະມີການລະແວງສົງໄສວ່າ ການແກ່ຍາວເວລາດັ່ງກ່າວ ແມ່ນເພື່ອຈຸດປະສົງອັນໃດຂອງຈ່າສານ ສະນັ້ນ ຄູ່ຄວາມເມື່ອມີເລື່ອງ ມີບັນຫາຂັດແຍ່ງກັນ ຕ້ອງໄດ້ທຳຄວາມເຂົ້າໃຈໃຫ້ເລິກເຊິ່ງ ກ່ຽວກັບຂະບວນການດຳເນີນການຄົ້ນຄວ້າ ພິຈາລະນາຄະດີຂອງສານຕາມກົດໝາຍວ່າດ້ວຍການດຳເນີນຄະດີແພ່ງ ແລະ ກົດໝາຍອື່ນທີ່ກ່ຽວຂ້ອງກັບບັນຫານັ້ນເສຍກ່ອນ ທັງນີ້ ກໍເພື່ອຫຼີກເວັ້ນໃນເລື່ອງທີ່ກ່າວມາຂ້າງເທິງນັ້ນ.
ໂດຍ: ໄມ້ງັດ