ຍາມທີ່ມີອາການຮູ້ສຶກຕັນດັງ ນ້ຳມູກໄຫຼຍາມໃດ ຫຼາຍຄົນຄົງຈະນຶກເຖິງ “ຢາແກ້ແພ້” ກ່ອນເປັນລຳດັບທຳອິດ ເພາະເຊື່ອວ່າຈະຜ່ອນຄາຍອາການດັ່ງກ່າວໄດ້ ແຕ່ຫຼາຍຄົນກໍຍັງບໍ່ຮູ້ເຖິງຜົນເສຍ ແລະ ອັນຕະລາຍຈາກຢາແກ້ແພ້ນີ້ ຖ້າໃຊ້ຢ່າງບໍ່ຖືກວິທີ ສະນັ້ນ ມາຮູ້ຈັກກັບ “ຢາແກ້ແພ້” ກັນກ່ອນ.
ອັນໃດຄື “ຢາແກ້ແພ້” ຢາແກ້ແພ້ ຄື: ຢາທີ່ຊ່ວຍປິ່ນປົວການແພ້ຫຼາຍປະເພດຕັ້ງແຕ່ອາການແພ້ອາກາດເລັກໆນ້ອຍໆ ເຊັ່ນ: ຕັນດັງນ້ຳມູກໄຫຼ ໄປຈົນເຖິງປິ່ນປົວເຍື່ອດັງອັກເສບຈາກອາການພູມແພ້ ລວມໄປເຖິງແກ້ອາການແພ້ຕ່າງໆ ເຊັ່ນ: ອາການແພ້ຈາກອາຫານ ແລະ ສິ່ງແວດລ້ອມຕ່າງໆ ເຊັ່ນ: ອາການເມົາລົດ ເມົາເຮືອ ແລະ ອື່ນໆ.
ຢາແກ້ແພ້ ມີຈັກປະເພດ:
1. ຢາແກ້ແພ້ທີ່ເຮັດໃຫ້ງ່ວງ (ແບບເກົ່າ):
ຢາຮຸ່ນນີ້ໃຊ້ຮັກສາອາການເຍື່ອດັງອັກເສບເນື່ອງຈາກພູມແພ້ທີ່ມີອາການຄັນ ຈາມ ນ້ຳມູກໄຫຼ ຜື່ນລົມພິດ ຜື່ນພູມແພ້ ຜິວໜັງ ອາການຄັນຜື່ນຂຶ້ນເນື່ອງຈາກແມງໄມ້ກັດ ສຳຜັດພືດພິດ ຫຼື ສຳຜັດສານເຄມີບາງຊະນິດ ແລະ ຍັງບັນເທົາອາການເມົາລົດ ແລະ ເມົາເຮືອ ໄດ້ດ້ວຍ.
ເຖິງແມ່ນວ່າຢາຮຸ່ນນີ້ຈະກິນແລ້ວງ່ວງ ແຕ່ກໍສາມາດປິ່ນປົວອາການເມົາລົດ ເມົາເຮືອ ໄດ້ດີກວ່າ ອອກລິດໄດ້ໄວກວ່າແບບທີ່ກິນແລ້ວບໍ່ງ່ວງ ແຕ່ກໍໝົດລິດໄດ້ໄວກວ່າເຊັ່ນກັນ ເນື່ອງຈາກຢາແກ້ແພ້ຊະນິດນີ້ ສາມາດດູດຊຶມຜ່ານສະໝອງໄດ້ຫຼາຍກວ່ານັ້ນເອງ.
ແຕ່ຢ່າງໃດກໍຕາມ ການກິນຢາແກ້ແພ້ຊະນິດນີ້ກໍມີຂໍ້ຈຳກັດດັ່ງນີ້:
– ບໍ່ຄວນໃຊ້ຢາຕິດຕໍ່ກັນເປັນເວລາດົນນານ.
– ບໍ່ຄວນໃຊ້ໃນຜູ້ທີ່ເຮັດວຽກທີ່ກ່ຽວກັບການຄວບຄຸມເຄື່ອງຈັກ ຫຼືຂັບລົດ.
– ຫ້າມໃຊ້ຮ່ວມກັບຢາກ່ອມປະສາດ ຢານອນຫຼັບ ເຄື່ອງດື່ມທີ່ມີທາດເຫຼົ້າ.
– ເພດຍິງຖືພາຄວນປຶກສາແພດກ່ອນໃຊ້ທຸກຄັ້ງ.
– ລະວັງການໃຊ້ໃນເດັກນ້ອຍ ໂດຍສະເພາະ ອາຍຸຕ່ຳກວ່າ 6 ປີ ເພາະອາດເຮັດໃຫ້ຢຸດຫາຍໃຈຂະນະຫຼັບໄດ້.
– ຄວນປຶກສາແພດກ່ອນໃຊ້ງານທຸກຄັ້ງ.
2. ຢາແກ້ແພ້ທີ່ບໍ່ເຮັດໃຫ້ງ່ວງ (ແບບໃໝ່):
ຢາປະເພດນີ້ສາມາດໃຊ້ປິ່ນປົວອາການຕ່າງໆ ໄດ້ຄ້າຍຄືຢາກຸ່ມດັ້ງເດີມໃຫ້ຜົນດີກວ່າ ໃນການຫຼຸດຜື່ນລົມພິດແບບທັນທີ ແລະ ຫຼຸດອາການຄັນ ໄດ້ໄວກວ່າຢາອື່ນໃນກຸ່ມດຽວກັນ ແຕ່ອາດຈະບັນເທົາອາການນ້ຳມູກໄຫຼ ອາການເມົາລົດ ເມົາເຮືອໄດ້ບໍ່ເທົ່າກຸ່ມດັ້ງເດີມ.
ເຖິງແມ່ນວ່າປະສິດທິພາບໃນການແກ້ອາການເມົາລົດ ເມົາເຮືອ ອາດຈະບໍ່ເທົ່າແບບເກົ່າແຕ່ຢາແບບໃໝ່ນີ້ ກໍສາມາດປິ່ນປົວຜື່ນແດງຜື່ນລົມພິດບາງຊະນິດ ແລະ ແກ້ອາການຄັນຜິວໜັງໄດ້ດີກວ່າ ແລະ ເຖິງແມ່ນວ່າຈະອອກລິດຊ້າກວ່າແບບທຳອິດ ແຕ່ກໍອອກລິດໄດ້ຍາວນານກວ່າ.
ຢ່າງໃດກໍຕາມ ເມື່ອເກີດອາການແພ້ ສິ່ງທີ່ຕ້ອງເຮັດເປັນອັນດັບຕົ້ນ ຄື ສິ່ງໃດທີ່ເຮັດໃຫ້ແພ້ ແລະ ຕ້ອງຫຼີກລ່ຽງເມື່ອຕ້ອງພົບຕົວການທີ່ເຮັດໃຫ້ແພ້ ເລືອກໃຊ້ຢາແກ້ແພ້ໃຫ້ຖືກຕ້ອງ ໝັ່ນອອກກຳລັງກາຍ ກິນອາຫານທີ່ມີປະໂຫຍດ ພັກຜ່ອນໃຫ້ພຽງພໍ ແລະ ປຶກສາແພດ ເມື່ອຕ້ອງການທີ່ຈະໃຊ້ຢາ ຈະເປັນການດີທີ່ສຸດ.
ວ. ດາລາວົງ – ນຳສະເໜີ