ມື້ນີ້ຂໍພາທ່ານຜູ້ອ່ານໄປຮູ້ຈັກກັບນະໂຍບາຍ ລົງທຶນພັດທະນາທຸລະກິດ ຢູ່ອິນໂດເນເຊຍ ແລະ ສິງກະໂປ ເພື່ອເບິ່ງໄວ້ເປັນບົດຮຽນ.
ທີ່ ອິນໂດເນເຊຍ: ມີຂ່າວອອກມາຈາກອິນໂດເນເຊຍ ໃນຕົ້ນເດືອນຕຸລາ ປີ 2019 (ວຽງຈັນທາມ 7 ຕຸລາ 2019) ວ່າ: ທາງກະຊວງກົດໝາຍ ແລະ ສິດທິມະນຸດຂອງປະເທດນີ້ ໄດ້ລິເລີ່ມແຜນສ້າງແຜນປະຕິບັດງານແຫ່ງຊາດ ເພື່ອສົ່ງເສີມຫຼັກການສິດທິມະນຸດໃນການດຳເນີນທຸລະກິດ ເວົ້າໃຫ້ເຂົ້າໃຈງ່າຍໆ ກໍຄື ແຜນງານເພື່ອສ້າງຄວາມສົມດູນລະຫວ່າງ ການພັດທະນາເສດຖະກິດກັບການເຄົາລົບສິດທິມະນຸດຂອງປະຊາຊົນ ບໍ່ໃຫ້ການດຳເນີນທຸລະກິດແຕະຕ້ອງສິດທິມະນຸດ ຍ້ອນແລ່ນແຕ່ນຳຜົນກຳໄລອ້ອຍຕ້ອຍ ຄືບາງປະເທດໄດ້ປະເຊີນມາແລ້ວ.
ແຜນງານສົ່ງເສີມຫຼັກ ສິດທິມະນຸດໃນການດຳເນີນທຸລະກິດຢູ່ອິນໂດເນເຊຍ ຈະເນັ້ນສະເພາະໃນຂະແໜງການທີ່ມີຜົນກະທົບໄວຕໍ່ສັງຄົມ ເຊັ່ນ: ຂົງເຂດທຸລະກິດ ການປູກຝັງທີ່ຕ້ອງໄດ້ມີການນຳໃຊ້ຊັບພະຍາກອນທີ່ດິນ ປ່າໄມ້ ແຫຼ່ງນ້ຳຢ່າງຫຼວງຫຼາຍ ຕໍ່ໄປກໍແມ່ນທຸລະກິດບໍ່ແຮ່ ເຊິ່ງແຕະຕ້ອງພື້ນທີ່ດິນເຂດບໍ່ມີການນຳໃຊ້ສານເຄມີ ຕະຫຼອດຮອດການຍົກຍ້າຍປະຊາຊົນອອກຈາກເຂດທຸລະກິດ ສຸດທ້າຍນັ້ນແມ່ນທຸລະກິດທ່ອງທ່ຽວ ທີ່ຕ້ອງມີການສັບສ່າວບຸກເບີກເນື້ອທີ່ເພື່ອພັດທະນາໂຄງລ່າງທີ່ຈຳເປັນ ແຕະຕ້ອງເຖິງວິຖີຊີວິດຂອງຄົນທ້ອງຖິ່ນ.
ສຳລັບທຸລະກິດຂຸດຄົ້ນບໍ່ແຮ່ນັ້ນ ແຜນງານຈະເນັ້ນໃຫ້ຜູ້ປະກອບການເອົາໃຈໃສ່ບັນຫາຜົນກະທົບຕໍ່ສິ່ງແວດລ້ອມ ແຜນງານໄດ້ກຳນົດໃຫ້ບໍລິສັດຜູ້ປະກອບການ ຕ້ອງປັບປຸງເນື້ອທີ່ດິນເຂດບໍ່ໃຫ້ກັບຄືນສູ່ສະພາບປົກກະຕິ ຄືບໍ່ປະປ່ອຍໃຫ້ເປັນບວກຂຸມ ຕ້ອງເກັບມ້ຽນສິ່ງເສດເຫຼືອ ເປັນພິດທີ່ຕົກເຮ່ຍ ເຊິ່ງຈະສົ່ງຜົນກະທົບໄລຍະຍາວຕໍ່ຄົນໃນທ້ອງຖິ່ນນັ້ນ.
ໃນໄລຍະຜ່ານມາ ຫຼາຍບໍລິສັດບໍ່ໄດ້ປັບປຸງເນື້ອທີ່ດິນຄືນ ພາຍຫຼັງສຳເລັດໂຄງການແຜນງານນີ້ຈະເຮັດໜ້າທີ່ໃຫ້ຄຳແນະນຳ ສ້າງຄວາມຮັບຮູ້ທີ່ຖືກຕ້ອງໃຫ້ບັນດາບໍລິສັດເອກະຊົນ ເພື່ອບໍ່ໃຫ້ການດຳເນີນທຸລະກິດຂອງພວກເຂົາເຈົ້າ ສົ່ງຜົນກະທົບທາງລົບຕໍ່ສິດທິມະນຸດຂອງປະຊາຊົນ ພິເສດ ບັນດາບໍລິສັດຕ້ອງປະຕິບັດຕາມຫຼັກການສິດທິມະນຸດ ຕ້ອງກຳນົດຫຼັກການສິດທິມະນຸດ ເຂົ້າໃນລະບຽບພາຍໃນຂອງບໍລິສັດຕາມແຜນ ເບື້ອງຕົ້ນ ແຜນງານສົ່ງເສີມສິດທິມະນຸດໃນການດຳເນີນທຸລະກິດນີ້ ມີກຳນົດປະຕິບັດເລີ່ມແຕ່ປີ 2020 ນີ້ເອງ
ທີ່ ສິງກະໂປ: ແຫຼ່ງຂ່າວໜັງສືພິມ ເດິ ສະເຕຼດ ທາມ (The Straits Times) ໄດ້ໃຫ້ຮູ້ໃນຕົ້ນເດືອນພຶດສະພາ 2017 ວ່າ: ທາງການສິງກະໂປໄດ້ລິເລີ່ມນະໂຍບາຍດຶງດູດການລົງທຶນ ເຂົ້າໃນການຜະລິດກະສິກຳ ດ້ວຍເຕັກໂນໂລຊີລະດັບສູງ ເພື່ອຮັບປະກັນຄຸນນະພາບ ແລະ ປະລິມານຂອງຜົນຜະລິດຈາກເນື້ອທີ່ດິນທີ່ແສນຈຳກັດຂອງປະເທດ.
ລັດຖະບານສິງກະໂປມີຄວາມເຊື່ອໝັ້ນວ່າ ນະໂຍບາຍດຶງດູດດັ່ງກ່າວ ຈະສາມາດຄ້ຳປະກັນຄວາມໝັ້ນຄົງທາງດ້ານອາຫານໄດ້ໃນລະດັບອັນແນ່ນອນ ເພື່ອສຳຮອງໄວ້ໃນກໍລະນີການສະໜອງສະບຽງອາຫານຈາກຕ່າງປະເທດມີບັນຫາ ໃນໄລຍະກ່ອນໜ້ານັ້ນ ທາງການສິງກະໂປເຄີຍປະກາດໃຫ້ນັກລົງທຶນສາມາດເຊົ່າດິນ ເພື່ອເຮັດການຜະລິດໄດ້ເປັນເວລາຍາວເຖິງ 10 ປີ ແຕ່ກໍໄດ້ປັບເວລາໃຫ້ຍາວຂຶ້ນເປັນ 20 ປີ ເພື່ອໃຫ້ກຸ້ມຄ່າກັບການລົງທຶນນຳໃຊ້ເຕັກໂນໂລຊີທີ່ທັນສະໄໝ.
ແນວໃດກໍດີ ຍ້ອນເນື້ອທີ່ດິນມີຈຳກັດ ສິງກະໂປ ຈະບໍ່ສາມາດຜະລິດສະບຽງອາຫານເອົາເອງໄດ້ທັງໝົດ ແຕ່ການນຳໃຊ້ເຕັກໂນໂລຊີກະສິກຳທີ່ກ້າວໜ້າ ທັນສະໄໝ ກໍຈະຊ່ວຍຍົກລະດັບການຜະລິດໃຫ້ສູງຂຶ້ນຢ່າງຫຼວງຫຼາຍ ຜະລິດຕະພັນຈາກການປູກເອງ ລ້ຽງເອງ ຍັງຈະເຮັດໃຫ້ທຸລະກິດຂອງຊາວກະສິກອນເຕີບໃຫຍ່ຂະຫຍາຍຕົວຂຶ້ນ.