ພາຍຫຼັງທີ່ຄູ່ຄວາມຮ້ອງຟ້ອງກັນມາເປັນເວລາຫຼາຍເດືອນ ໃນທີ່ສຸດສານກໍຈະພິຈາລະນາຕັດສິນວ່າຝ່າຍໃດເປັນຜູ້ເສຍ ຫຼື ຊະນະ ໃຜມີເຫດຜົນ ຫຼື ບໍ່ມີເຫດຜົນ ໃຜມີຫຼັກຖານໜັກແໜ້ນ ຫຼື ບໍ່ໜັກແໜ້ນກໍຕ້ອງຮູ້ກັນ ໃນທີ່ປະຊຸມສານພາຍຫຼັງຄະນະສານ ໄດ້ມີການປະກາດຄຳຕັດສີນເປັນທີ່ຮຽບຮ້ອຍແລ້ວ ຖ້າຄຳຕັດສິນທີ່ຄະນະສານໄດ້ຮ່າງຢູ່ ໃນເວລາທີ່ພິຈາລະນາຄະດີໃນຫ້ອງປະຊຸມລັບນັ້ນ ຫາກຍັງບໍ່ທັນສົມບູນ ໂດຍສະເພາະແມ່ນການຂຽນ ການຮຽບຮຽງຄຳສັບ ກວດກາຄືນກ່ຽວກັບຫຼັກຖານທີ່ຄະນະສານ ໄດ້ນຳມາເປັນເຫດຜົນໃນການພິຈາລະນາຕັດສິນ ການປັບປຸງທາງດ້ານໄວຍະກອນ ຊຶ່ງການປັບປຸງນັ້ນແມ່ນຈະດັດແປງ ຫຼື ປັບປຸງທາງດ້ານຂີດຂຽນເທົ່ານັ້ນ ແຕ່ຈະບໍ່ໄດ້ດັດແກ້ເນື້ອໃນໃຈຄວາມຂອງຄຳຕັດສິນ ແຕ່ຢ່າງໃດ ຕາມຫຼັກການແລ້ວ ປະທານຄະນະສານຜູ້ທີ່ຂຶ້ນເປັນປະທານຄະນະສານຕັດສິນນັ້ນ ເປັນຜູ້ຮຽບຮຽງ ແລະ ປັບປຸງຄືນທັງໝົດ ຫຼັງຈາກຮຽບຮຽງ ແລະ ປັບປຸງຄຳຕັດສິນຄືນໃໝ່ສຳເລັດແລ້ວ ກໍສົ່ງຄຳຕັດສິນນັ້ນໃຫ້ຈ່າສານ ເພື່ອຈັດພິມໃຫ້ສຳເລັດຕາມກຳນົດເວລາທີ່ໄດ້ກຳນົດໄວ້ໃນກົດໝາຍ.
ຕົວຢ່າງ: ໃນທີ່ປະຊຸມສານ ປະທານຄະນະສານໄດ້ປະກາດຄຳຕັດສິນວ່າ ຄຳຮ້ອງຟ້ອງຂອງໂຈດບໍ່ມີເຫດຜົນ ແລະ ໄດ້ລົງຄຳຕັດສິນ ໃຫ້ຍົກເລີກຄຳຮ້ອງຟ້ອງຂອງໂຈດ ຖິ້ມທັງໝົດ ໃນເວລາທີ່ປັບປຸງຄຳຕັດສິນນັ້ນ ແມ່ນຈະບໍ່ໄດ້ມີການປ່ຽນແປງວ່າ ຄຳຮ້ອງຟ້ອງຂອງໂຈດມີເຫດຜົນ ແລະ ລົງຄຳຕັດສິນ ໃຫ້ຝ່າຍໂຈດຊະນະຄະດີແຕ່ຢ່າງໃດ ຖ້າຫາກມີການປັບປຸງ ຫຼື ປ່ຽນແປງເນື້ອໃນຄຳຕັດສິນດັ່ງກ່າວ ໂດຍຜູ້ໃດຜູ້ໜຶ່ງ ກໍຈະຖືວ່າເປັນການປອມແປງເອກະສານ ຊຶ່ງຈະມີໂທດຕາມກົດໝາຍໄດ້ກຳນົດໄວ້.
ໂດຍ: ໄມ້ງັດ