ລັດກາລິຟໍເນຍ ຍູ້ດັນໂຄງການຜະລິດໄຟຟ້າພະລັງນ້ຳຮູບແບບໃໝ່ ເຊິ່ງເປັນສ່ວນໜຶ່ງຂອງໂຄງການທີ່ກາລິຟໍເນຍຕັ້ງເປົ້າ ຈະເພິ່ງພາໄຟຟ້າພະລັງງານທົດແທນ 60% ໃຫ້ໄດ້ພາຍໃນປີ 2030 ແລະ ຕັ້ງເປົ້າໃຊ້ໄຟຟ້າຈາກແຫຼ່ງພະລັງງານທີ່ບໍ່ກໍ່ໃຫ້ເກີດມົນລະພິດເລີຍ ພາຍໃນປີ 2045.
ໂຄງການຜະລິດໄຟຟ້າພະລັງນ້ຳຮູບແບບໃໝ່ ຈະອາໄສອ່າງເກັບນ້ຳ 2 ແຫ່ງທີ່ຢູ່ຕ່າງລະດັບກັນ ເພື່ອໃຊ້ຜະລິດໄຟຟ້າ ໂດຍອາໄສຫຼັກການໄຫຼຂອງແຫຼ່ງນ້ຳຈາກບ່ອນສູງລົງສູ່ບ່ອນຕ່ຳໂດຍທຳມະຊາດ ຜ່ານເຄື່ອງກົງຫັນນ້ຳເພື່ອໃຊ້ຜະລິດກະແສໄຟຟ້າ ເຊິ່ງຈະຫຼຸດການເພິ່ງພາການຜະລິດໄຟຟ້າຈາກເຊື້ອໄຟຟອສຊິລໄດ້.
ພະລັງງານໄຟຟ້າສ່ວນເກີນ ທີ່ໄດ້ຈະໃຊ້ເພື່ອສູບນ້ຳກັບໄປເກັບໄວ້ໃນອ່າງເກັບນ້ຳດ້ານເທິງ ສຳລັບຜະລິດກະແສໄຟຟ້າຊ້ຳ ແລະ ພະລັງງານໄຟຟ້າເຫຼົ່ານີ້ ຈະຖືກກັກເກັບໄວ້ໃຊ້ໃນຮູບຂອງເຄືອຂ່າຍກັກເກັບພະລັງງານໄຟຟ້າ ຫຼື Grid ຫາກຜະລິດໄຟຟ້າໄດ້ໃນປະລິມານຫຼາຍ ແລະ ຈະເກັບໃນແບດເຕີຣີຫາກຜະລິດໄດ້ໃນປະລິມານໜ້ອຍ ເຊິ່ງສາມາດໃຊ້ກັບລົດຂັບເຄື່ອນພະລັງງານໄຟຟ້າ ຫຼື ກັບອຸປະກອນເອເລັກໂຕຣນິກ ເພື່ອຫຼຸດການເພິ່ງພາພະລັງງານໄຟຟ້າທີ່ຜະລິດຈາກເຊື້ອໄຟຟອສຊິລ.