ຄວາມທຸກຍາກແມ່ນສິ່ງທ້າທາຍ ແລະ ເປັນບັນຫາໜັກໃຈທີ່ລັດຖະບານຂອງແຕ່ລະປະເທດ ຕ້ອງໄດ້ສຸມໃສ່ແກ້ໄຂ ໃນນັ້ນ ລວມທັງ ສປປ ລາວ ພວກເຮົາ ວ່າກັນວ່າ ເປົ້າໝາຍການພັດທະນາແບບຍືນຍົງຂອງອົງການສະຫະປະຊາຊາດ ທີ່ທຸກປະເທດມີຂອບເວລາຜັນຂະຫຍາຍ ແຕ່ປີ 2015-2030 ນັ້ນ ໃນເນື້ອແທ້ກໍແມ່ນເພື່ອໃຫ້ຄົນຢູ່ດີກິນດີ ຜ່ານຂະບວນການຫຼຸດຜ່ອນ ແລະ ລຶບລ້າງຄວາມທຸກຍາກນັ້ນເອງ ດັ່ງຈະຂໍຍົກຕົວຢ່າງຕໍ່ໄປນີ້:
ຢູ່ ອິນໂດເນເຊຍ: ນອກຈາກເປົ້າໝາຍລຶບລ້າງຄວາມທຸກຍາກລວມແລ້ວ ທາງການຂອງອິນໂດເນເຊຍ ຍັງໄດ້ກຳນົດແຜນຊ່ວຍເຫຼືອຊາວໜຸ່ມທີ່ຕ້ອງການມີເຮືອນຢູ່ຫຼັງທຳອິດເປັນຂອງຕົນເອງ ຄຳໝັ້ນສັນຍາດັ່ງກ່າວ ມີຂຶ້ນໃນຂະນະທີ່ມີການກະກຽມການເລືອກຕັ້ງປະທານາທິບໍດີ ອິນໂດເນເຊຍ ໃນປີ 2019 ເຊິ່ງທ່ານປະທານາທິບໍດີ ໂຈໂກ ວິໂດໂດ (ໂຈໂກວີ) ໄດ້ສືບຕໍ່ລົງສະໝັກ ແລະ ໄດ້ຮັບໄຊຊະນະ.
ໃນການຖະແຫຼງຂ່າວຜ່ານທາງໂທລະພາບ ຕົ້ນເດືອນມັງກອນ 2019 ນັ້ນ ທາງ ໂຈໂກວີ ໄດ້ບອກວ່າ: ທ່ານໄດ້ກຳນົດນະໂຍບາຍຫຼຸດດອກເບ້ຍການຈ່າຍຜ່ອນ ເພື່ອຊື້ເຮືອນຢູ່ໃຫ້ກຸ່ມຄົນຈຳນວນໜຶ່ງ ແລະ ວ່ານະໂຍບາຍນີ້ ຈະຊ່ວຍໃຫ້ຄອບຄົວຄົນໜຸ່ມໄດ້ຮັບຄວາມສະດວກສະບາຍຂຶ້ນຕື່ມ ເມື່ອຕ້ອງການຊື້ເຮືອນຢູ່ເປັນຂອງຕົນເອງ ເພາະຈະມີການສະໜັບສະໜູນດ້ານການເງິນຈາກລັດ (ໜັງສືພິມ The Nation 16 ມັງກອນ 2019) ຄົນໃນເກນໄວໜຸ່ມທີ່ຈະໄດ້ຮັບຜົນປະໂຫຍດຈາກນະໂຍບາຍນີ້ ແມ່ນກຸ່ມຄົນທີ່ເກີດລະຫວ່າງປີ 1980 ຫາປີ 2.000.
ທ່ານປະທານາທິບໍດີ ອິນໂດເນເຊຍ ຍັງໃຫ້ຮູ້ຕື່ມອີກວ່າ: ໃນໄລຍະຜ່ານມາ ລັດຖະບານຂອງທ່ານ ໄດ້ສຸມໃສ່ກໍ່ສ້າງທີ່ພັກພາອາໄສຫຼັງໃໝ່ ໄດ້ປະມານ 1 ລ້ານຫົວໜ່ວຍໃນທົ່ວປະເທດ ນັບແຕ່ປີ 2014 ຫາປີ 2019 ເວົ້າໄດ້ວ່າ ນະໂຍບາຍຊ່ວຍຄູ່ຜົວເມຍໜຸ່ມໃຫ້ມີທີ່ພັກເປັນຂອງຕົນເອງນັ້ນ ກໍແມ່ນການແກ້ໄຂຄວາມທຸກຍາກ ເພາະຊາວໜຸ່ມນັ້ນຍັງຂາດພື້ນຖານທາງດ້ານເສດຖະກິດ.
ທີ່ ສປ ຈີນ: ການແກ້ໄຂຄວາມທຸກຍາກດ້ວຍວິທີສະໜອງເຮືອນຢູ່ໃຫ້ຊາວກະສິກອນ ແລະ ຄົນລ້ຽງສັດນັ້ນ ສປ ຈີນ ຖືເປັນນະໂຍບາຍສຳຄັນ ຕົວຢ່າງທີ່ຂໍຍົກມາໃຫ້ເຫັນ ກໍຄື ທາງການໃນເຂດສິນຈຽງ ຢູ່ພູຈິງ ເຊິ່ງເປັນເຂດປົກຄອງຕົນເອງ ໄດ້ປຸກສ້າງ ແລະ ແຈກເຮືອນຈຳນວນຫຼາຍກວ່າ 140.000 ຫຼັງ ໃຫ້ຊາວກະສິກອນ ແລະ ຄົນລ້ຽງສັດ.
ຂ່າວຕ່າງປະເທດໃນຕົ້ນເດືອນກັນຍາ 2019 ໃຫ້ຮູ້ຕື່ມວ່າ: ຊາວກະສິກອນ ແລະ ຄົນລ້ຽງສັດໃນເຂດສິນຈຽງນັ້ນ ອາໄສຢູ່ພື້ນທີ່ຫ່າງໄກສອກຫຼີກເຕັມໄປດ້ວຍພູເຂົາ ແລະ ທະເລຊາຍ ດັ່ງນັ້ນ ທາງການຈຶ່ງໄດ້ຈັດສັນທີ່ຢູ່ໃໝ່ໃນບໍລິເວນທົ່ງພຽງ ເພື່ອໃຫ້ພວກເຂົາເຈົ້າມີຊີວິດການເປັນຢູ່ດີຂຶ້ນ ຂະບວນການຍົກຍ້າຍທີ່ຢູ່ໃໝ່ໃນເຂດນີ້ ໄດ້ມີຂຶ້ນນັບແຕ່ປີ 2018 ເປັນຕົ້ນມາ.
ທີ່ ຣັດເຊຍ: ສະຫະພັນຣັດເຊຍ ເປັນປະເທດອຸດສາຫະກຳທີ່ກ້າວໜ້າ ແລະ ພັດທະນາ ແຕ່ຢ່າງໃດກໍດີ ທ່ານປະທານາທິບໍດີ ວະລາດີເມຍ ປູຕິນ ກໍຍັງໃຫ້ບຸລິມະສິດຕໍ່ກັບນະໂຍບາຍປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ຕົວຢ່າງ ທ່ານປະທານາທິບໍດີ ໄດ້ສະເໜີໃຫ້ຫຼຸດພາສີອະສັງຫາລິມະຊັບໃຫ້ຄອບຄົວທີ່ມີລູກຫຼາຍຄົນ ຄື: ຄອບຄົວທີ່ມີລູກແຕ່ 3 ຄົນຂຶ້ນໄປ ຈະໄດ້ຮັບການຊ່ວຍເຫຼືອເພີ່ມຕື່ມຈາກງົບປະມານຂອງສ່ວນກາງລັດຖະບານ ແລະ ທະນາຄານກາງຣັດເຊຍ ເພື່ອຊື້ ຫຼື ປຸກເຮືອນຢູ່ເປັນຂອງຕົນເອງ ຂ່າວບອກວ່າ: ທາງການຣັດເຊຍ ໄດ້ປະຕິບັດແຜນສ້າງເຮືອນລ້ຽງເດັກຕື່ມເປັນຈຳນວນ 90.000 ຫົວໜ່ວຍ ພາຍໃນປີ 2019 ນັ້ນເອງ.