ຢູ່ໃນສະພາບການທີ່ມີຄວາມຫຍຸ້ງຍາກສັບສົນ ຍ້ອນການແບ່ງພັກແບ່ງພວກ ແບ່ງກຳລັງວັງຊາ ການແກ້ງແຍ່ງແຂ່ງຂັນລະຫວ່າງຂົ້ວບວກຂົ້ວລົບ ການລະແວງສົງໄສ ຈຶ່ງນຳໄປສູ່ການສອດການແນມ ຊອກເລື່ອງຊອກບັນຫາໃສ່ກັນ ແລະ ກັນ ເພື່ອຫວັງທຳລາຍມ້າງເພຜູ້ອື່ນ ໝາຍຄວາມວ່າ ກິນເຂົ້າໂຕໂສຄວາມຜູ້ອື່ນຂອງກຸ່ມຄົນບໍ່ດີ ຍ່ອມມີຄວາມຜິດຕາມປະມວນກົດໝາຍອາຍາ.
ສະນັ້ນເພື່ອເປັນການເດັດນິໄສ ແລະ ການເຄື່ອນໄຫວທີ່ບໍ່ເປັນມິດນັ້ນ ກົດໝາຍໄດ້ອະນຸຍາດໃຫ້ດຳເນີນຄະດີຕໍ່ບຸກຄົນດັ່ງກ່າວ ເນື້ອໃນຂອງການລົງໂທດຕໍ່ບຸກຄົນດັ່ງກ່າວ ໄດ້ກຳນົດໄວ້ໃນມາດຕາ 112 ດັ່ງນີ້: ຄົນຕ່າງປະເທດ ຄົນຕ່າງດ້າວ ຫຼື ຄົນບໍ່ມີສັນຊາດ ຜູ້ໃດຫາກໄດ້ເຄື່ອນໄຫວເກັບກຳຂ່າວຂໍ້ມູນ ວັດຖຸ ການດຳເນີນງານ ຫຼື ເອກະສານທາງຄອມພີວເຕີ ຫຼື ເອກະສານກ່ຽວກັບຄວາມລັບຂອງລັດ ຫຼື ຄວາມລັບທາງລັດຖະການ ເພື່ອກໍ່ຄວາມເສຍຫາຍ ຫຼື ມ້າງເພ ສປປ ລາວ ຈະຖືກລົງໂທດຕັດອິດສະລະພາບແຕ່ 10 ປີ ຫາ 20 ປີ ອາດຈະຖືກຮິບຊັບ ຖືກຈຳກັດທີ່ຢູ່ ຫຼື ຖືກເນລະເທດ ຫຼື ຕັດອິດສະຫຼະພາບຕະຫຼອດຊີວິດ ແລະ ຈະຖືກປັບໃໝແຕ່ 30.000.000 ຫາ 40.000.000 ກີບ ຫຼື ປະຫານຊີວິດ.
ບຸກຄົນໃດ ຫາກໄດ້ເຄື່ອນໄຫວເກັບກຳຂ່າວ ຂໍ້ມູນ ວັດຖຸ ການດຳເນີນງານ ຫຼື ເອກະສານທາງຄອມພີວເຕີ ຫຼື ເອກະສານກ່ຽວກັບຄວາມລັບຂອງລັດ ຫຼື ຄວາມລັບທາງລັດຖະການສົ່ງໃຫ້ພວກທໍລະຍົດ ຫຼື ກະບົດຕໍ່ຊາດ ເພື່ອມ້າງເພ ສປປ ລາວ ຈະຖືກລົງໂທດຕັດອິດສະລະພາບແຕ່ 5 ປີ ຫາ 10 ປີ ແລະ ຈະຖືກປັບໃໝແຕ່ 5.000.000 ຫາ 200.000.000 ກີບ ອາດຈະຖືກຮິບຊັບ ແລະ ອາດຈະຖືກຈຳກັດທີ່ຢູ່.
ພົນລະເມືອງລາວຜູ້ໃດ ທີ່ໄດ້ເຄື່ອນໄຫວເກັບກຳຂ່າວ ຂໍ້ມູນ ວັດຖຸ ການດຳເນີນງານ ຫຼື ເອກະສານທາງຄອມພີວເຕີ ຫຼື ເອກະສານກ່ຽວກັບຄວາມລັບຂອງລັດ ຫຼື ຄວາມລັບທາງລັດຖະການສົ່ງໃຫ້ຄົນຕ່າງປະເທດ ຫຼື ອົງການຈັດຕັ້ງຕ່າງປະເທດ ເພື່ອໃຊ້ເປັນຂໍ້ມູນ ເພື່ອກໍ່ຄວາມເສຍຫາຍ ຫຼື ມ້າງເພ ສປປ ລາວ ຈະຖືວ່າໄດ້ກະທຳຜິດໃນສະຖານທໍລະຍົດຕໍ່ຊາດ ແລະ ຈະຖືກລົງໂທດຕາມມາດຕາ 110 ໃນສະຖານການທໍລະຍົດຕໍ່ຊາດ ການກະກຽມໃຫ້ແກ່ການກະທຳຜິດ ຄວາມພະຍາຍາມກໍ່ການກະທຳຜິດ ກໍຈະຖືກລົງໂທດ.
ໂດຍ: ໄມ້ງັດ