ການປາກົດຕົວຂອງໂທລະສັບສະຫຼາດ ຫຼື ໂທລະສັບມືຖື ໄດ້ປ່ຽນແປງການປະພຶດຂອງຄົນ ແວ່ນຕາທີ່ສະຫຼາດທີ່ວ່ານີ້ ຈະເປັນເຕັກໂນໂລຊີດ້ານສືບລັບຢ່າງໃຫຍ່ຫຼວງໃນຂັ້ນຕໍ່ໄປໄດ້ ຫຼື ບໍ່ ? ບໍລິສັດ ກູໂກລ (Google) ໄດ້ພະຍາຍາມທີ່ຈະເຮັດເຊັ່ນນັ້ນເປັນເວລາຫຼາຍກວ່າ 6 ປີ ໂດຍໃຊ້ Google Glass ຫຼື ແວ່ນຕາກູໂກລ ມັນບໍ່ຄືບໜ້າໄປໄດ້ ເຫດຜົນສ່ວນໃຫຍ່ກໍຍ້ອນຄວາມເປັນຫ່ວງກ່ຽວກັບຄວາມເປັນສ່ວນຕົວ ແຕ່ວ່າບັນດາບໍລິສັດທັງໃຫຍ່ ແລະ ນ້ອຍຢູ່ໃນຫຼາຍປະເທດ ລວມທັງບໍລິສັດ Facebook ກໍຍັງກຳລັງດຳເນີນງານເພື່ອເຮັດແວ່ນຕາສະຫຼາດຢູ່.
ທຳອິດກໍແມ່ນມີແປ້ນພິມຕົວໜັງສື ຫຼື Keyboard ຈາກນັ້ນ ກໍມີໜ້າຈໍທີ່ໃຊ້ມືສຳຜັດໄດ້ ບາງບໍລິສັດດ້ານເຕັກໂນໂລຊີ ເວົ້າວ່າ ແວ່ນຕາທີ່ສວມໃສ່ໄດ້ອາດຈະເປັນການກ້າວກະໂດດຂັ້ນໃນທາງເຕັກໂນໂລຊີຂັ້ນຕໍ່ໄປ ເຖິງແມ່ນວ່າມັນຈະບໍ່ສຳເລັດຜົນສຳລັບ Google Glass ຫຼື ແວ່ນຕາກູໂກລກໍຕາມ.
ທ່ານນາງ ລີສ ກູດໂນ (Liz Goodno) ຈາກພະແນກສື່ສານຂອງບໍລິສັດ ສະແນບ (Snap) ກ່າວວ່າ: “ໃນອະນາຄົດພວກເຮົາ ຈະບໍ່ໄດ້ຖືກຈຳກັດຢູ່ແຕ່ກັບໂທລະສັບສະຫຼາດ ຫຼື ໂທລະສັບມືຖືອີກ ເມື່ອເວົ້າເຖິງເລື່ອງຄວາມເຂົ້າໃຈກ່ຽວກັບໂລກທີ່ຢູ່ອ້ອມຕົວຂອງພວກເຮົາ ສະນັ້ນ ອັນນີ້ຄືການລົງທຶນແຕ່ຫົວທີເຂົ້າໃນອະນາຄົດທີ່ວ່ານັ້ນ.”
ການລົງທຶນຂອງບໍລິສັດ ສະແນບ (Snap) ທີ່ຕັ້ງຢູ່ໃນສະຫະລັດ ກໍຄືວ່າ ແວ່ນຕາກັນແດດ 3 ທີ່ຖ່າຍພາບໄດ້ ແວ່ນຕາລຸ້ນທີສາມແມ່ນສະຫຼາດກວ່າລຸ້ນກ່ອນໆ ມັນມີກ້ອງຖ່າຍວີດິໂອຢູ່ສອງຈຸດໄຟຢູ່ແຈຂອງແວ່ນຕາຈະຮຸ່ງຂຶ້ນ ເມື່ອມີການບັນທຶກວີດິໂອເກີດຂຶ້ນ ແລະ ເຮັດໃຫ້ຜູ້ໃສ່ແວ່ນຕານັ້ນ ສາມາດເອົາສິ່ງທີ່ເປັນພາບ 3 ມິຕິ ຫຼື 3D ຢູ່ໃນວີດິໂອນັ້ນໄດ້ຢູ່ນີ້ແມ່ນດອກໄມ້ຈຳນວນໜຶ່ງ.
ຢູ່ໃນແອັບທີ່ແຕກຕ່າງກັນຫຼາຍທີ່ສຸດແອມກລາສ (AMglass) ທີ່ຜະລິດໂດຍ ບໍລິສັດ ປາຊີຟິກ ຟີວເຈີ (Pacific Future) ທີ່ຕັ້ງຢູ່ໃນຮົງກົງ ເຮັດໃຫ້ພວກໄປຢ້ຽມຊົມສວນສະໜຸກໃຫຍ່ມີປະສົບການອັນຫຼາກຫຼາຍປະເພດ ໂດຍໃຊ້ຄວາມເປັນຈິງທີ່ມີຂໍ້ມູນເສີມຢູ່ໃນລະຫວ່າງການເລີ່ມເປີດໂຕ ຂອງແວ່ນຕາສະຫຼາດຢູ່ປະມານໄລຍະບຸນປ່ອຍຜີ ຫຼື Halloween ສວນສະໜຸກໃຫຍ່ແຫ່ງນີ້ ກັບກາຍເປັນບ່ອນໜ້າຢ້ານຢ່າງລົ້ນເຫຼືອ.
ທ້າວ ຄຽນ ລີ ຈາກບໍລິສັດ ປາຊີຟິກ ຟີວເຈີ (Pacific Future) ໃຫ້ຄຳເຫັນວ່າ: “ມີຜີຢູ່ທຸກຫົນທຸກແຫ່ງ ໂດຍປະສົມປະສານໃສກັນກັບຕຶກອາຄານທີ່ແທ້ຈິງ.”
ແວ່ນຕານີ້ໃຊ້ຢູ່ໃນສວນສະໜຸກໃຫຍ່ແຫ່ງຕ່າງໆຢູ່ໃນຈີນ ແລະ ມາເລເຊຍ ໂດຍທີ່ມີເຄື່ອງປະມວນຂໍ້ມູນຢູ່ຂ້າງໃນແວ່ນຕາ ຄວາມເປັນຈິງທີ່ມີຂໍ້ມູນເສີມເຫຼົ່ານີ້ ຖືກອອກແບບມາສຳລັບຄົນທີ່ມີອາຍຸ 12 ປີຂຶ້ນໄປ ຍ້ອນນ້ຳໜັກ ແລະ ຂະໜາດຂອງມັນ.
ແວ່ນຕາຄວາມເປັນຈິງທີ່ມີຂໍ້ມູນເສີມໃນດ້ານຮັກສາຄວາມສະຫງົບ ທີ່ຜະລິດໂດຍບໍລິສັດ ກູລທັນ (Goolton) ທີ່ຕັ້ງຢູ່ນະຄອນຫຼວງປັກກິ່ງ ສາມາດໃຊ້ໂດຍຕຳຫຼວດເພື່ອຊອກຫາຜູ້ຕ້ອງສົງໄສໄດ້.
ທ່ານນາງ ຊາຣາ ເຊັງ (Sarah Zheng) ຈາກບໍລິສັດ ກູລທັນ (Goolton) ກ່າວວ່າ: “ຕຳຫຼວດສາມາດທີ່ຈະຕັ້ງບັນຊີດຳ ແລະ ກວດເບິ່ງຄົນຢູ່ໃນຝຸງຊົນ ແລະ ກໍຊອກຫາຜູ້ກະທຳຜິດທາງອາຍາໄດ້ຢ່າງວ່ອງໄວຫຼາຍທີ່ສຸດ.”
ໂດຍປະກອບມີໂປຣແກຣມທີ່ຈື່ໜ້າຄົນໄດ້ ວີດິໂອ ແລະ ພາບທີ່ແວ່ນຕາສະຫຼາດພວກນີ້ຈັບໄດ້ ສາມາດສົ່ງໄປໃຫ້ເຈົ້າໜ້າທີ່ດ້ານການຮັກສາຄວາມສະຫງົບທີ່ບໍ່ຢູ່ໃນສະຖານທີ່ນັ້ນ ໃຫ້ວິໄຈຂໍ້ມູນໄດ້.
ແນ່ນອນມັນມີຄວາມເປັນຫ່ວງດ້ານຄວາມເປັນສ່ວນຕົວ ຢູ່ກັບທຸກອຸປະກອນທີ່ມີກ້ອງຖ່າຍພາບຢູ່ໃນຕົວນັ້ນ ເຊິ່ງເປັນເຫດຜົນອັນໜຶ່ງທີ່ພວກລູກຄ້າປະຕິເສດບໍ່ຊື້ Google Glass ຫຼື ແວ່ນຕາກູໂກລ.
ແຕ່ວ່າການແຂ່ງຂັນຂອງບໍລິສັດເຕັກໂນໂລຊີທັງໃຫຍ່ ແລະ ນ້ອຍ ທີ່ຈະຫັນເອົາສິ່ງຂອງທີ່ໃຊ້ໃນຊີວິດປະຈຳວັນ ເຊັ່ນ ແວ່ນຕາ ໃຫ້ກາຍເປັນບາງສິ່ງບາງຢ່າງທີ່ສະຫຼາດໄດ້ຍັງດຳເນີນໄປຢູ່.