ໃນບົດປະຈຳວັນນີ້ ຜູ້ຂຽນມີເລື່ອງກ່ຽວກັບການໃຊ້ຄວາມຮຸນແຮງຕໍ່ເພດຍິງທີ່ເກີດຂຶ້ນຢູ່ໃນບາງປະເທດ ເຊິ່ງລວມມີຄວາມຮຸນແຮງທາງດ້ານຮ່າງກາຍ ແລະ ຈິດໃຈ ທັງນີ້ ກໍເພື່ອໃຫ້ເຂົ້າກັບບັນຍາກາດລະລຶກວັນສາກົນເພື່ອຕ້ານການໃຊ້ຄວາມຮຸນແຮງຕໍ່ເພດຍິງທີ່ໄດ້ກຳນົດໃສ່ວັນທີ 25 ພະຈິກຂອງທຸກໆປີ.
ທີ່ ປະເທດຕັງຊານີ (ພາສາອັງກິດເອີ້ນ ວັນຕັນຊາເນຍ): ໄດ້ມີເຫດການບໍ່ໜ້າຈະເກີດຂຶ້ນກັບຍິງອາຍຸ 26 ປີ ທີ່ພວມຖືພາຄາທ້ອງ ຊື່ນາງ ອາມີນາ ຣາຟາເອນ ມະບຸນດາ ເລື່ອງມີຢູ່ວ່າ ໃນຄ່ຳຄືນວັນທີ 2 ມິຖຸນາ 2018 ເຈົ້າໜ້າທີ່ຕຳຫຼວດຕັງຊານີຈຳນວນໜຶ່ງໄດ້ເຂົ້າໄປປິດລ້ອມເຮືອນຂອງນາງ ອາມີນາ ເພື່ອຈັບກຸມຜົວຂອງນາງທີ່ເຈົ້າໜ້າທີ່ສົງໄສວ່າໄດ້ເຄື່ອນໄຫວຊື້ຕຽງນອນທີ່ໂຈນລັກມາຂາຍ ແຕ່ບັງເອີນຜົວຂອງນາງ ອາມີນາ ບໍ່ຢູ່ເຮືອນ ດັ່ງນັ້ນ ເຈົ້າໜ້າທີ່ເລີຍຈັບຜູ້ເປັນເມຍແທນ ໃນເວລານັ້ນ ນາງ ອາມີນາ ກຳລັງຖືພາແກ່ຄອງມື້ເກີດລູກ ດັ່ງນັ້ນ ນາງຈຶ່ງຂໍຮ້ອງໃຫ້ເຈົ້າໜ້າທີ່ເອົານາງໄປໂຮງໝໍ ແຕ່ຖືກປະຕິເສດ ເຈົ້າໜ້າທີ່ລາກນາງຂຶ້ນລົດ ແລະ ນຳຕົວໄປກັກໄວ້ຢູ່ເດີ່ນຫຍ້າດ້ານໜ້າຂອງຫ້ອງການເຈົ້າໜ້າທີ່ຕຳຫຼວດ ແລະ ໃນຄືນນັ້ນເອງນາງກໍໄດ້ເກີດລູກຢູ່ກັບເດີ່ນບ່ອນຖືກກັກຕົວ ຂ່າວນີ້ໄດ້ກາຍເປັນໝັດໄຟແຜ່ລາມໄປທົ່ວສັງຄົມຂອງຕັງຊານີ.
ທ່ານນາງ ເຮເລັນ ກີໂຈ ບີຊິມບາ ຫົວໜ້າສູນກົດໝາຍ ແລະ ສິດທິມະນຸດຂອງ ຕັງຊານີ ໄດ້ເອີ້ນເຫດການນີ້ວ່າ: “ແມ່ນຄວາມອັບອາຍຂາຍໜ້າທີ່ສຸດຂອງກຳລັງຕຳຫຼວດ” ທັງໄດ້ຕັ້ງຄຳຖາມຂຶ້ນວ່າ “ເຫດໃດຈຶ່ງຈັບກຸມຄົນບໍ່ມີຄວາມຜິດແທນຜູ້ທີ່ສົງໄສວ່າເຮັດຜິດ ? ເຫດໃດເຈົ້າໜ້າທີ່ຈຶ່ງຕາບອດບໍ່ຮູ້ວ່າຍິງຄົນນີ້ຖືພາແກ່ໃກ້ຈະເກີດລູກ ? ແລະ ຖ້າຍິງຄົນນີ້ເສຍຊີວິດເວລາເກີດລູກເດລະ ?” ສ່ວນອົງການແນວຮ່ວມແຫ່ງຊາດເພື່ອຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍນັ້ນກໍໄດ້ອອກຖະແຫຼງການກ່າວປະນາມການກະທຳຂອງເຈົ້າໜ້າທີ່ຕຳຫຼວດຄັ້ງນີ້ວ່າ ເປັນເລື່ອງຕ່ຳຊ້າປ່າເຖື່ອນ ແລະ ໜ້າອັບອາຍທີ່ສຸດ.
ທີ່ ປະເທດໄທ: ໜັງສືພິມວຽງຈັນທາມ ສະ ບັບວັນທີ 9 ເດືອນກໍລະກົດ ປີນີ້ ໂດຍອີງໃສ່ແຫຼ່ງ ຂ່າວໜັງສືພິມ The Nation ໄດ້ໃຫ້ຮູ້ກ່ຽວກັບເຫດການແມ່ເຖົ້າ ອາຍຸ 76 ປີ ຜູ້ເປັນແມ່ຖືກລູກຊາຍ ຊື່ທ້າວ ຊູຈິດ ອາຍຸ 47 ປີ ທຳຮ້າຍຮ່າງກາຍຈົນແຂ້ວຫັກຈຳນວນຫຼາຍເຫຼັ້ມ.
ເຫດການນີ້ເກີດຂຶ້ນຢູ່ເມືອງນາງຣອງ ແຂວງບຸລິລຳ ຂ່າວໃຫ້ລາຍລະອຽດພຽງວ່າ: ເຫດເກີດຂຶ້ນເມື່ອຝ່າຍລູກຊາຍຖືກບັນຊາດ້ວຍລິດນ້ຳຕາຜີເຜດ (ເມົາ) ຈົນຂາດສະຕິ ແລ້ວລົງມືຕ່ອຍຕີທັງຜູ້ເປັນແມ່ ແລະ ນ້ອງສາວ ຈົນຜູ້ເຄາະຮ້າຍທັງສອງໄດ້ເຂົ້າປິ່ນປົວຢູ່ໂຮງໝໍ ຂ່າວເລື່ອງຄວາມຮຸນແຮງໃນຄອບຄົວແບບນີ້ຢູ່ລາວພວກເຮົາກໍເກີດຂຶ້ນອ່າວຖີ່ໃນໄລຍະຫຼັງໆມານີ້ ເຊິ່ງມີສາເຫດມາຈາກການດື່ມເຫຼົ້າເມົາ ກໍຄື ການເສບຢາບ້າ ສ່ວນຜູ້ທີ່ຕົກເປັນເຫຍື່ອສ່ວນໃຫຍ່ກໍແມ່ນແມ່ຍິງໃນຄອບຄົວນັ້ນເອງ.
ທີ່ ເນປານ: ຂ່າວດີສຳລັບແມ່ຍິງເນປານ ໄດ້ມີຂຶ້ນໃນເດືອນສິງຫາ 2017 ເມື່ອລັດຖະສະພາຂອງປະເທດນີ້ໄດ້ອອກກົດໝາຍຍົກເລີກປະເພນີທີ່ເອີ້ນວ່າ “ຈໍປາດີ” (Chhaupadi) ທີ່ບັງຄັບໃຫ້ແມ່ຍິງອອກຈາກເຮືອນເມື່ອມີຮອບເດືອນ ແລະ ເວລາເກີດລູກ ເພາະຖືວ່າເປັນເລື່ອງຄະລຳ ຈະນຳເຄາະຮ້າຍມາສູ່ຄອບຄົວ ປະເພນີນີ້ປະຕິບັດມາໄດ້ຫຼາຍເຊັ່ນຄົນແລ້ວ ແມ່ຍິງທີ່ມີຮອບເດືອນ ແລະ ເກີດລູກຕ້ອງໄດ້ໄປເກີດຢູ່ຕາມຄອກສັດ ເຊິ່ງປະເຊີນກັບຄວາມສ່ຽງນາໆປະການ ເຖິງຂັ້ນເສຍຊີວິດກໍມີຕົວຢ່າງຫຼາຍກໍລະນີມາແລ້ວ.
ໃນໄລຍະຜ່ານມາ ທາງສານສູງສຸດເນປານກໍເຄີຍອອກຄຳສັ່ງຍົກເລີກປະເພນີດັ່ງກ່າວມາຫຼາຍເທື່ອ ແຕ່ກໍບໍ່ໄດ້ຜົນ ດັ່ງນັ້ນ ທາງລັດ ຖະສະພາຈຶ່ງໄດ້ຮ່າງເປັນກົດໝາຍບັງຄັບໃຊ້ ໂດຍມີການກຳນົດໂທດຕິດຄຸກເປັນເວລາ 3 ເດືອນ ຫຼື ຖືກປັບໃໝເປັນເງິນ 3.000 ຣູເປຍ ສຳລັບຜູ້ບັງຄັບແມ່ຍິງໃຫ້ອອກຈາກເຮືອນຕາມປະເພນີທີ່ລ້າສະໄໝດັ່ງກ່າວ.