ການນິນທາ ແລະ ການໃສ່ຮ້າຍຜູ້ອື່ນ ບັນດາທ່ານຜູ້ອ່ານບາງທ່ານອາດຈະເຄີຍໄດ້ຍິນຢູ່ເລື້ອຍໆ ແລະ ພົບເຫັນຫຼາຍໃນສັງຄົມ ແລະ ບາງທ່ານກໍຄິດວ່າເປັນການເຢາະເຢີ້ຍກັນແບບທຳມະດາຊ່າລືກັນໄປ ໂດຍຄິດວ່າຈະບໍ່ເປັນຜິດເປັນໄພ ແລະ ບໍ່ເປັນຜົນກະທົບຕໍ່ສັງຄົມທີ່ຮ້າຍແຮງ ກໍເລີຍເຮັດໃຫ້ບັນຫາດັ່ງກ່າວນັບມື້ ມີຄວາມຮຸນແຮງຫຼາຍຂຶ້ນເລື້ອຍໆ ແຕ່ຄວາມຈິງແລ້ວ ການນິນທາ ແລະ ການໃສ່ຮ້າຍຜູ້ອື່ນແມ່ນເປັນການກະທຳຜິດຕໍ່ກົດໝາຍ ກໍຄື ປະມວນກົດໝາຍອາຍາ ມື້ນີ້ຂ້າພະເຈົ້າຈະນຳສະເໜີໃຫ້ຮູ້ຄວາມໝາຍໂທດທາງອາຍາ ແລະ ການປັບໃໝຕໍ່ກັບການກະທຳຜິດໃນສະຖານ “ການນິນທາ ແລະ ການໃສ່ຮ້າຍຜູ້ອື່ນ” ຊຶ່ງລາຍລະອຽດດັ່ງນີ້:
ການນິນທາຜູ້ອື່ນ ແມ່ນການເຮັດໃຫ້ຜູ້ອື່ນເສື່ອມເສຍຊື່ສຽງ ກຽດສັກສີຢ່າງຮ້າຍແຮງ ດ້ວຍການເວົ້າຈາ ການຂີດຂຽນ ຫຼື ການກະທຳດ້ວຍຮູບການອື່ນໆ ການນິນທາຜູ້ອື່ນແມ່ນເປັນການກະທຳຜິດທາງອາຍາ ຊຶ່ງເປັນການກະທຳຜິດຕໍ່ມາດຕາ 205 ວັກທີ 1 ຂອງປະມວນກົດໝາຍອາຍາ ສະບັບເລກທີ 26/ສພຊ ລົງວັນທີ 17 ພຶດສະພາ 2017 ໄດ້ກຳນົດໄວ້ວ່າ “ບຸກຄົນໃດຫາກໄດ້ເຮັດໃຫ້ຜູ້ອື່ນເສື່ອມເສຍກຽດສັກສີຢ່າງຮ້າຍແຮງ ດ້ວຍການຂຽນ ການເວົ້າ ຫຼື ດ້ວຍຮູບການອື່ນນັ້ນ ຈະຖືກລົງໂທດຕັດອິດສະຫຼະພາບແຕ່ສາມເດືອນຫາໜຶ່ງປີ ຫຼື ດັດສ້າງໂດຍບໍ່ຕັດອິດສະລະພາບ ແລະ ຈະຖືກປັບໃໝ ແຕ່ 1.000.000 ກີບ ຫາ 5.000.000 ກີບ”.
ການໃສ່ຮ້າຍຜູ້ອື່ນ ແມ່ນການຫາຄວາມບໍ່ມີຈິງ ຫຼື ການໃສ່ຮ້າຍປ້າຍສີຜູ້ອື່ນດ້ວຍ ການເວົ້າຈາ ການຂີດຂຽນ ຫຼື ການກະທຳດ້ວຍຮູບການອື່ນໆ ເພື່ອເຮັດໃຫ້ຜູ້ອື່ນເສື່ອມເສຍຊື່ສຽງ ກຽດສັກສີຢ່າງຮ້າຍແຮງ ການໃສ່ຮ້າຍຜູ້ອື່ນແມ່ນເປັນການກະທຳຜິດທາງອາຍາ ຊຶ່ງເປັນການກະທຳຜິດຕໍ່ມາດຕາ 205 ວັກທີ 2 ຂອງປະມວນກົດໝາຍອາຍາ ສະບັບເລກທີ 26/ສພຊ ລົງວັນທີ 17 ພຶດສະພາ 2017 ໄດ້ກຳນົດໄວ້ວ່າ “ບຸກຄົນໃດຫາກໄດ້ໃສ່ຮ້າຍປ້າຍສີຜູ້ອື່ນໂດຍບໍ່ມີຄວາມຈິງ ດ້ວຍການຂຽນ ການເວົ້າ ຫຼື ດ້ວຍຮູບການອື່ນ ຊຶ່ງເຮັດໃຫ້ເສື່ອມເສຍກຽດສັກສີຢ່າງຮ້າຍແຮງ ຈະຖືກລົງໂທດຕັດອິດສະຫຼະພາບແຕ່ສາມເດືອນຫາໜຶ່ງປີ ຫຼື ດັດສ້າງໂດຍບໍ່ຕັດອິດສະລະພາບ ແລະ ຈະຖືກປັບໃໝ ແຕ່ 1.000.000 ກີບ ຫາ 5.000.000 ກີບ”.
ໂດຍ: ສ. ສາຍນ້ຳຊຳ