ໃນປັດຈຸບັນ ສະໜາມຮົບເພື່ອປຸກລະດົມໃຫ້ມີການຫຼຸດຜ່ອນ ແລະ ຍົກເລີກການໃຊ້ຖົງຢາງ (ຖົງປຼາສຕິກ) ໃນທົ່ວໂລກກຳລັງດຳເນີນໄປຢ່າງເປັນຂະບວນຟົດຟື້ນ ທັງນີ້ກໍເພື່ອແກ້ໄຂບັນຫາຂີ້ເຫຍື້ອຢາງທີ່ເປັນອັນຕະລາຍຮ້າຍແຮງ ສຳລັບສິ່ງແວດລ້ອມ ໃນບົດນີ້ ຜູ້ຂຽນໄດ້ສັງລວມເອົາບາງບົດຮຽນຈາກຕ່າງແດນ ກ່ຽວກັບມາດຕະການຫ້າມໃຊ້ຖົງຢາງ ກໍຄື ຜະລິດຕະພັນທີ່ເຮັດດ້ວຍຢາງ.
ທີ່ ປະເທດຝຣັ່ງ: ໃນປີ 2020 ນີ້ເອງ ຝຣັ່ງໄດ້ກາຍເປັນປະເທດທຳອິດໃນໂລກ ທີ່ໄດ້ປະກາດໃຊ້ກົດໝາຍຫ້າມນຳໃຊ້ພາຊະນະຕ່າງໆທີ່ເຮັດດ້ວຍຢາງ ເຊັ່ນ: ຖ້ວຍ ຈອກ ມີດ ບ່ວງ ສ້ອມ ແລະ ຈານ ກ່ອນໜ້ານັ້ນ ຄື: ໃນປີ 2016 ຝຣັ່ງໄດ້ອອກກົດໝາຍວ່າດ້ວຍການຫັນປ່ຽນການໃຊ້ພະລັງງານ ເພື່ອການເຕີບໂຕທີ່ເປັນມິດກັບສິ່ງແວດລ້ອມ ສ່ວນກົດໝາຍຫ້າມໃຊ້ພາຊະນະທີ່ເຮັດດ້ວຍຢາງນີ້ ແມ່ນສ່ວນໜຶ່ງຂອງກົດໝາຍກ່ຽວຂ້ອງໃນປີ 2016.
ຂ່າວບອກວ່າ: ການຫ້າມໃຊ້ຜະລິດຕະພັນທີ່ເຮັດດ້ວຍຢາງໃນຫຼາຍໆປະເທດນັ້ນ ຍັງເນັ້ນສະເພາະການຫ້າມໃຊ້ຖົງຢາງທີ່ໃຊ້ພຽງຄັ້ງດຽວເທົ່ານັ້ນ ໃນທ້າຍປີ 2015 ຝຣັ່ງໄດ້ເປັນເຈົ້າພາບຈັດກອງປະຊຸມສາກົນ ເພື່ອແກ້ໄຂບັນຫາໂລກຮ້ອນ ດ້ວຍວິທີການກຳນົດນະໂຍບາຍສະໜັບສະໜູນເສດຖະກິດໝູນວຽນ ທີ່ກວມເອົາທັງຂັ້ນຕອນ ການອອກແບບ ການຜະລິດ ຮອດຂັ້ນຕອນການນຳເອົາຜະລິດຕະພັນເກົ່າກັບມາໃຊ້ຄືນໃໝ່ (ຣີໄຊເຄີນ) ທ່ານ ຟຣັງຊົວໂອລອງ ປະທານາທິບໍດີຝຣັ່ງໃນເວລານັ້ນ ໄດ້ວາງຄາດໝາຍໃຫ້ຝຣັ່ງກາຍເປັນປະເທດຕົ້ນແບບ ໃນການຫຼຸດການປ່ອຍແກ໊ດເຮືອນແກ້ວ.
ທີ່ ອົດສະຕຣາລີ: ຂ່າວຕ່າງປະເທດໃນທ້າຍເດືອນມິຖຸນາ 2018 ໃຫ້ຮູ້ວ່າ: ກຸ່ມບໍລິສັດ ວູນເວີດ (Woolworth) ທີ່ເຮັດທຸລະກິດຂາຍຍ່ອຍລາຍໃຫຍ່ທີ່ສຸດຢູ່ອົດສະຕຣາລີ ໄດ້ງົດການສະໜອງຖົງຢາງໃຊ້ເທື່ອດຽວໃຫ້ລູກຄ້າ ນັບແຕ່ວັນທີ 20 ມິຖຸນາ ປີ 2018 ເປັນຕົ້ນມາ ໂດຍເລີ່ມປະຕິບັດໃນທົ່ວລະບົບຮ້ານຊັບພະສິນຄ້າ ແລະ ຮ້ານຂາຍຍ່ອຍອື່ນໆທີ່ຂຶ້ນກັບ Woolworth ແຜນຍົກເລີກການສະໜອງຖົງຢາງ ໄດ້ລິເລີ່ມຂຶ້ນແຕ່ເດືອນກໍລະກົດ 2017 ໂດຍໄດ້ວາງແຜນກຳຈັດຖົງຢາງ ໃຫ້ໄດ້ 3,2 ຕື້ຖົງຕໍ່ປີ ເພື່ອປະກອບສ່ວນຫຼຸດຜ່ອນຂີ້ເຫຍື້ອຢາງອອກຈາກສິ່ງແວດລ້ອມ ໄປພ້ອມໆກັບການພັດທະນາພື້ນຖານເສດຖະກິດສີຂຽວຢູ່ໃນອົດສະຕຣາລີ.
Woolworths ມີຂັ້ນຕອນຈັດການກັບຜະລິດຕະພັນທີ່ເຮັດດ້ວຍຢາງດັ່ງນີ້: ພາຍໃນປີ 2019 ໄດ້ທົດລອງບອກຍົກເລີກການໃຊ້ຖົງຢາງ ສຳລັບຫຸ້ມຫໍ່ທີ່ບໍ່ຈຳເປັນກັບຜະລິດຕະພັນກວ່າ 80 ລາຍການ ທີ່ແຕກຕ່າງກັນຂອງບໍລິສັດ ເຊິ່ງເຮັດໃຫ້ສາມາດລຶບລ້າງການໃຊ້ວັດຖຸຢາງທີ່ມີນ້ຳໜັກ 140 ໂຕນ ສຳລັບຫຸ້ມຫໍ່ໝາກໄມ້ ແລະ ຜັກສົດໃນແຕ່ລະປີ ນອກຈາກນັ້ນ ທາງບໍລິສັດກໍຍັງໄດ້ດຳເນີນການກຳຈັດການໃຊ້ທໍ່ດູດທີ່ເຮັດດ້ວຍຢາງ ໂດຍທົ່ວໄປແລ້ວ ບັນດາລັດຕ່າງໆໃນອົດສະຕຣາລີນັ້ນຕ່າງ ກໍໄດ້ມີມາດຕະການກຳຈັດຂີ້ເຫຍື້ອເປັນຂອງຕົນເອງໃນແຕ່ລະປີ ບັນດາຮ້ານຄ້າຢູ່ອົດສະຕຣາລີ ໄດ້ສ້າງຂີ້ເຫຍື້ອຖົງຢາງຈຳນວນກວ່າ 5 ຕື້ຖົງຕໍ່ປີ ໃນນັ້ນ ປະມານ 3% ເທົ່ານັ້ນທີ່ຖືກມາປຸງແຕ່ງເພື່ອນຳໃຊ້ຄືນໃໝ່.