ບໍລິສັດ ໂອລິມປັສ (Olympus) ຂອງ ຍີ່ປຸ່ນ ປິດຕຳນານທຸລະກິດກ້ອງຖ່າຍຮູບທີ່ດຳເນີນການມາກວ່າ 84 ປີ ຫຼັງຂາຍກິດຈະການໃຫ້ກັບກຸ່ມທຶນຮ່ວມຊາດ ເຊິ່ງເຂົ້າຊື້ຍີ່ຫໍ້ ໄວໂອ ຈາກໂຊນີໄປເມື່ອ 6 ປີກ່ອນ.
ໂອລິມປັສ ເລີ່ມຕົ້ນທຸລະກິດຖ່າຍຮູບຕັ້ງແຕ່ 1936 ດ້ວຍການຂາຍກ້ອງພ້ອມເລນສ໌ Zuiko ກ່ອນຈະພັດທະນາກ້ອງຖ່າຍຮູບແບບພົກພາ Pen Series ເມື່ອປີ 1959 ທີ່ໄດ້ຮັບຄວາມນິຍົມຢ່າງສູງ ແຕ່ການຄືບຄານເຂົ້າມາຂອງສະມາດໂຟນ ທີ່ໂອລິມປັສ ບໍ່ສາມາດຢືນຢັດຢູ່ໃນຖານະເຈົ້າແຫ່ງກ້ອງຖ່າຍຮູບໄດ້ ສະທ້ອນຈາກຜົນປະກອບການທີ່ຂາດທຶນໃນທຸລະກິດກ້ອງຖ່າຍຮູບຕໍ່ເນື່ອງ 3 ປີຊ້ອນ.
ໂອລິມປັສ ເປີດເຜີຍຂໍ້ຕົກລົງ MOU ກັບທາງບໍລິສັດ Japan Industrial Partners ທີ່ເຂົ້າຊື້ກິດຈະການຖ່າຍຮູບຂອງໂອລິມປັສ ເມື່ອມໍ່ໆມານີ້ ເຊິ່ງ JIP ເປັນທີ່ຮູ້ຈັກຈາກການເຂົ້າຊື້ຍີ່ຫໍ້ ໄວໂອ ຂອງໂຊນີ ເມື່ອປີ 2014 ກ່ອນຈະພັດທະນາມາເປັນຄອມພິວເຕີແລບທອບ ພາຍໃຕ້ຊື່ດັ່ງກ່າວ ແຕ່ຍັງບໍ່ໄດ້ຮັບການເປີດເຜີຍວ່າທິດທາງຂອງກ້ອງໂອລິມປັສ ຈະເປັນໄປໃນຮູບແບບໃດ.
ຢ່າງໃດກໍຕາມ ບໍລິສັດ Olympus Corporation ຍັງດຳເນີນກິດຈະການໃນອຸດສາຫະກຳອື່ນໆ ທັງໃນຕະຫຼາດ ອຸປະກອນຜ່າຕັດ ອຸປະກອນການແພດ ແລະ ເຄື່ອງມືອຸດສາຫະກຳອື່ນໆ ເຊິ່ງເປັນລາຍໄດ້ຫຼັກຂອງບໍລິສັດ ແລະ ມີອັດຕາສ່ວນການຕະຫຼາດໃຫຍ່ໃນລະດັບໂລກ ຫຼາຍກວ່າການຂາຍກ້ອງຖ່າຍຮູບຢ່າງສູງ.