ພົບກັນປະຈຳວັນນີ້ ຂໍເວົ້າເລື່ອງສິດທິຂອງສັດ ເຊິ່ງຫຼາຍໆປະເທດໄດ້ມີມາດຕະການທາງກົດໝາຍປ້ອງກັນຄັກແນ່ ເຊັ່ນ:
ທີ່ ມາເລເຊຍ: ກົດໝາຍສະບັບໃໝ່ເພື່ອປົກປ້ອງສິດທິຂອງສັດ ແລະ ເພື່ອລົງໂທດຜູ້ທໍລະມານສັດ ໄດ້ລິເລີ່ມຮ່າງຂຶ້ນໃນປີ 2016 ເພື່ອໃຫ້ລັດຖະສະພາຮັບຮອງເອົາໃນຂັ້ນຕໍ່ມາ ກົດໝາຍສະບັບນີ້ໃສ່ຊື່ວ່າ “ກົດໝາຍເພື່ອສະຫວັດດີພາບຂອງສັດ” ທີ່ໜ້າສົນໃຈເປັນພິເສດ ກໍຄື ກົດໝາຍໄດ້ກຳນົດໂທດຕໍ່ຜູ້ທໍລະມານສັດໄວ້ດັ່ງນີ້: ຜູ້ລະເມີດກົດໝາຍເປັນຄັ້ງທຳອິດ ຈະຖືກປັບໃໝເປັນເງິນລະຫວ່າງ 20.000-100.000 ຣິງກິດ ຫຼື ລະຫວ່າງ 6.400 ຫາ 32.000 ໂດລາສະຫະລັດ ຫຼື ຖືກໂທດຕິດຄຸກສູງສຸດ 3 ປີ ຖ້າລະເມີດເປັນຄັ້ງທີ 2 ຈຳນວນເງິນປັບໃໝຈະເພີ່ມຂຶ້ນທົບເທົ່າ ພ້ອມໆກັບໂທດຕິດຄຸກຢ່າງໜ້ອຍ 3 ເດືອນ.
ຂ່າວບອກວ່າ: ກົດໝາຍສະບັບນີ້ໄດ້ຮ່າງຂຶ້ນດ້ວຍການຮ່ວມມືຈາກຫຼາຍພາກສ່ວນ ທີ່ມີຄວາມຮັບຜິດຊອບທາງສັງຄົມ ເພື່ອເຮັດໃຫ້ກົດໝາຍສາມາດປະຕິບັດໄດ້ຢ່າງເລິກເຊິ່ງ ແລະ ກວ້າງຂວາງໃນທົ່ວສັງຄົມມາເລເຊຍ.
ທີ່ ເກາະໄຕ້ຫວັນ: ໃນເດືອນທັນວາ ປີ 2014 ຊ້າງເພດຜູ້ໂຕໜຶ່ງໃນສວນສັດແຫ່ງໜຶ່ງ ທີ່ເກາະໄຕ້ຫວັນ ໄດ້ຕົກລົງຈາກລົດໃນຂະນະຖືກຂົນຍ້າຍ ເຊິ່ງເຮັດໃຫ້ຂາມັນຫັກ ແລະ ບາດເຈັບ ຈາກເຫດການດັ່ງກ່າວ ທາງການຂອງໄຕ້ຫວັນ ຈຶ່ງໄດ້ປັບປຸງກົດໝາຍຕໍ່ຕ້ານການທໍລະມານສັດໃຫ້ເຂັ້ມງວດກວ່າເກົ່າ ໃນຄັ້ງວັນທີ 24 ມັງກອນ 2015.
ກົດໝາຍໄດ້ເພີ່ມໂທດໜັກຂຶ້ນທົບເທົ່າ ສຳລັບການເຮັດໃຫ້ສັດບາດເຈັບ ຫຼື ລົ້ມຕາຍ ດ້ວຍໂທດປັບໃໝເປັນເງິນ 1 ລ້ານໂດລາໄຕ້ຫວັນ ຫຼື ປະມານ 260 ລ້ານກີບ ບວກກັບໂທດຕິດຄຸກອີກ 1 ປີ ສ່ວນເຈົ້າຂອງສັດທີ່ນຳໃຊ້ສັດລ້ຽງຂອງຕົນເຄື່ອນໄຫວສະແດງເພື່ອການບັນເທີງ ໂດຍບໍ່ໄດ້ຮັບອະນຸຍາດນັ້ນ ກໍຈະຖືກປັບໃໝເປັນເງິນ 150.000 ໂດລາໄຕ້ຫວັນ (1 ໂດລາໄຕ້ຫວັນ ປະມານ 260 ກີບ).
ສ່ວນຜູ້ທີ່ປ່ອຍປະລະເລີຍສັດລ້ຽງຂອງຕົນໃຫ້ຢູ່ແບບຕາມມີຕາມເກີດ ເຮັດໃຫ້ສັດຂາດນ້ຳ ຂາດອາຫານ ອຶດຫິວ ຈ່ອຍຜອມ ຫຼື ລ້ຽງສັດໄວ້ສະຖານທີ່ຄັບແຄບ ແອອັດ ກໍຈະຖືກປັບໃໝເປັນເງິນຈຳນວນ 15.000 ໂດລາໄຕ້ຫວັນ ໃນໂລກປັດຈຸບັນ ນອກຈາກເອົາໃຈໃສ່ສິດທິ ກໍຄື ສະຫວັດດີພາບຂອງມະນຸດແລ້ວ ປະຊາຄົມໂລກຍັງເອົາໃຈໃສ່ເລື່ອງການປົກປ້ອງສິດທິຂອງສັດ ຈາກການຖືກທໍລະມານແບບບໍ່ມີຄວາມຈຳເປັນ ດ້ວຍນ້ຳມືຂອງມະນຸດອີກດ້ວຍ.