ສະຖາບັນວິໄຈດາລາສາດແຫ່ງຊາດ NARIT ເຜີຍວ່າ ນັກດາລາສາດຄົ້ນພົບຫຼັກຖານ ທີ່ອາດຈະບົ່ງຊີ້ເຖິງສິ່ງມີຊີວິດເທິງດາວສຸກ.
NARIT ສະຖາບັນວິໄຈດາລາສາດແຫ່ງຊາດ ໂພສຂໍ້ຄວາມລະບຸວ່າ ນັກດາລາສາດຄົ້ນພົບຫຼັກຖານ ທີ່ອາດຈະບົ່ງຊີ້ເຖິງສິ່ງມີຊີວິດເທິງດາວສຸກ.
ທີມນັກດາລາສາດ ນຳໂດຍ Jane Greaves ຈາກ Cardiff University ສະຫະລາຊະອານາຈັກອັງກິດ ເຜີຍເຖິງການຄົ້ນພົບໂມເລກຸນຂອງຟອສຟີນ ເຊິ່ງອາດຈະບົ່ງຊີ້ເຖິງຄວາມເປັນໄປໄດ້ ທີ່ອາດຈະເກີດຂຶ້ນຈາກສິ່ງມີຊີວິດທີ່ອາໄສຢູ່ໃນຊັ້ນບັນຍາກາດຂອງດາວສຸກ ໃນງານວິໄຈທີ່ລົງພິມໃນວາລະສານ Nature Astronomy ໃນວັນທີ 14 ກັນຍາ 2020 ຜ່ານມາ.
# ຊັ້ນບັນຍາກາດຂອງດາວສຸກ:
ດາວສຸກນັ້ນ ເປັນດາວເຄາະທີ່ໄດ້ຊື່ວ່າເປັນຄູ່ແຝດກັບໂລກ ເນື່ອງຈາກມີທັງຂະໜາດ ແລະ ໄລຍະຫ່າງຈາກດວງອາທິດທີ່ໃກ້ຄຽງກັບໂລກຫຼາຍທີ່ສຸດ ຢ່າງໃດກໍຕາມ ເຖິງແມ່ນວ່າດາວສຸກ ຈະຢູ່ໃກ້ດວງອາທິດກວ່າໂລກພຽງ 30% ແຕ່ສະພາວະເຮືອນແກ້ວ ເຮັດໃຫ້ດາວສຸກມີຊັ້ນບັນຍາກາດທີ່ໜາແໜ້ນ ແລະ ເກັບກັກຄວາມຮ້ອນເອົາໄວ້ມະຫາສານ ຈົນມີສະພາວະອຸນຫະພູມພື້ນຜິວຮ້ອນພໍທີ່ຈະຫຼອມຂີ້ກົ່ວໄດ້ ນອກຈາກນີ້ ໃນຊັ້ນບັນຍາກາດຍັງເຕັມໄປດ້ວຍແກ໊ສຂອງກົດກຳມະຖັນ ແຕ່ກໍຍັງມີຄວາມເປັນໄປໄດ້ ທີ່ຄັ້ງໜຶ່ງດາວສຸກອາດຈະເຄີຍມີມະຫາສະໝຸດ ແລະ ມີສະພາບອາກາດທີ່ເອື້ອຕໍ່ການດຳລົງຢູ່ຂອງສິ່ງມີຊີວິດຫຼາຍກວ່ານີ້.
ແຕ່ຫາກເຮົາພິຈາລະນາເທິງຊັ້ນບັນຍາກາດທີ່ສູງຂຶ້ນໄປແລ້ວ ເຮົາຈະພົບວ່າທີ່ຄວາມສູງປະມານ 50 ກິໂລແມັດເໜືອພື້ນຜິວດາວສຸກນັ້ນ ກັບມີສະພາບອາກາດທີ່ອ່ອນໂຍນ ມີອຸນຫະພູມພຽງ 30 ອົງສາເຊ ແລະ ອາດຈະມີສະພາບທີ່ພໍເໝາະກັບສິ່ງມີຊີວິດໄດ້ ມີການຄາດການກັນວ່າ ຊັ້ນເມກໃນບັນຍາກາດຂອງດາວສຸກ ອາດຈະມີອົງປະກອບທາງເຄມີພຽງພໍ ທີ່ຈະກະຕຸ້ນໃຫ້ເກີດປະຕິກິລິຍາ ທີ່ນຳໄປສູ່ການກຳເນີດຂອງສິ່ງມີຊີວິດ ມີການຄາດການກັນວ່າ ຫາກໃນຊັ້ນບັນຍາກາດຂອງດາວສຸກນັ້ນ ມີສິ່ງມີຊີວິດຢູ່ຈິງ ສິ່ງມີຊີວິດເຫຼົ່ານີ້ ອາດຈະອາໄສລັງສີຢູວີຈາກດວງຕາເວັນເປັນແຫຼ່ງພະລັງງານ ເຊິ່ງນີ້ອາດຈະເປັນຄຳອະທິບາຍໜຶ່ງ ເຖິງຕົວດູດກືນລັງສີຢູວີປິດສະໜາ ເທິງຊັ້ນບັນຍາກາດຂອງດາວສຸກ ທີ່ຈົນທຸກວັນນີ້ ເຮົາກໍຍັງບໍ່ຮູ້ຄຳຕອບເປັນທີ່ແນ່ນອນ.
# ນັກດາລາສາດ ສາມາດສຶກສາອົງປະກອບຂອງດາວທີ່ຢູ່ຫ່າງອອກໄປໄດ້ຢ່າງໃດ ?
ດາລາສາດນັ້ນ ເປັນສາດທີ່ສຶກສາວັດຖຸທີ່ເຮົາຍັງໄປບໍ່ເຖິງ ການຈະສຶກສາອົງປະກອບຂອງວັດຖຸໃດນັ້ນ ຈຶ່ງເຮັດໂດຍການສຶກສາສະເປກຕຣຳທີ່ວັດຖຸນັ້ນປົດປ່ອຍອອກມາ ໂມເລກຸນ ແຕ່ລະໂມເລກຸນນັ້ນ ຈະມີການດູດກືນ ຫຼື ເປັ່ງຄື້ນແມ່ເຫຼັກໄຟຟ້າ (ເຊັ່ນ: ແສງ) ອອກມາໃນໄລຍະຄື້ນທີ່ສອດຄ່ອງກັບລະດັບພະລັງງານຂອງໂມເລກຸນນັ້ນ ເຊິ່ງລະດັບພະລັງງານເຫຼົ່ານີ້ນັ້ນ ຈະມີລັກສະນະສະເພາະ ຂຶ້ນຢູ່ກັບທາດທີ່ປະກອບຂຶ້ນເປັນໂມເລກຸນນັ້ນໆ ດັ່ງນັ້ນ ຫາກເຮົາສາມາດສັງເກດສະເປກຕຣຳ ໃນການດູດກືນຂອງວັດຖຸທີ່ຢູ່ຫ່າງອອກໄປ ເຊິ່ງມີລັກສະນະ ແລະ ຮູບແບບໄລຍະການດູດກືນຄື້ນແມ່ເຫຼັກໄຟຟ້າ ທີ່ສອດຄ່ອງກັບໂມເລກຸນຂອງສານ ທີ່ເຮົາສາມາດວັດໄດ້ໃນຫ້ອງທົດລອງເທິງໂລກ ຈຶ່ງເທົ່າກັບເຮົາສາມາດຢືນຢັນໄດ້ວ່າ ໂມເລກຸນຊະນິດດຽວກັນນີ້ ຈະຕ້ອງມີຢູ່ເທິງດາວດວງທີ່ເຮົາເຮັດການສຶກສາຢູ່ໃນລັກສະນະດຽວກັນນີ້ ຫາກເຮົາພົບການດູດກືນຄື້ນແມ່ເຫຼັກໄຟຟ້າ ທີ່ກົງກັບໂມເລກຸນຂອງຟອສຟີນຈາກສະເປກຕຣຳ ທີ່ໄດ້ມາຈາກຊັ້ນບັນຍາກາດຂອງດາວສຸກ ຈຶ່ງເທົ່າກັບເປັນການຢືນຢັນວ່າ ໃນຊັ້ນບັນຍາກາດນັ້ນ ມີໂມເລກຸນຂອງຟອສຟີນຢູ່.