ຜ່ານມາ ຜູ້ຂຽນໄດ້ນຳສະເໜີກ່ຽວກັບການກະທຳຜິດບຸກຄົນເປັນສ່ວນໃຫຍ່ ເປັນຕົ້ນ ການກະທຳຜິດ ການລົງໂທດຕັດອິດສະຫຼະພາບຂອງບຸກຄົນຕາມຄຳຕັດສີນຂອງສານ ການເພີ່ມ ຫຼື ການຫຼຸດຜ່ອນໂທດ ຫຼື ການພົ້ນຈາກຄວາມຮັບຜິດຊອບທາງອາຍາຂອງຜູ້ກະທຳຜິດທີ່ເປັນບຸກຄົນ ຊຶ່ງກໍເປັນການສ້າງຄວາມຮັບຮູ້ ແລະ ເຂົ້າໃຈຕໍ່ເນື້ອໃນຈິດໃຈຂອງກົດໝາຍທີ່ໄດ້ກຳນົດກ່ຽວກັບການກະທຳຜິດທາງອາຍາ ໃຫ້ແກ່ທ່ານຜູ້ອ່ານຫຼາຍພໍສົມຄວນ ແຕ່ມື້ນີ້ຈະຂໍນຳສະເໜີກ່ຽວກັບການກະທຳຜິດຄວາມຮັບຜິດຊອບ ການວາງໂທດ ແລະ ການຍົກເລີກທຸລະກິດຂອງນິຕິບຸກຄົນ.
ປະມວນກົດໝາຍອາຍາໝວດທີ 9 ໄດ້ກຳນົດວ່າ ການກະທຳຜິດຂອງນິຕິບຸກຄົນ ແມ່ນການກະທຳຜິດຂອງການຈັດຕັ້ງ ຫຼື ຕົວແທນຂອງນິຕິບຸກຄົນ ຫຼາຍຄົນອາດຈະຄິດວ່າ ການຈັດຕັ້ງຈະໄປກະທຳຜິດໄດ້ແນວໃດ ຕົວຢ່າງ ບໍລິສັດວິສາຫະກິດ ຫຼື ສະຖາບັນການເງິນທີ່ໄດ້ຮັບອະນຸມັດສ້າງຕັ້ງຂຶ້ນ ຈາກອົງການຈັດຕັ້ງລັດທີ່ກ່ຽວຂ້ອງ ສະນັ້ນ ຕ້ອງເຂົ້າໃຈວ່າ ນິຕິບຸກຄົນມີຜູ້ຕາງໜ້າໃນນາມ ເຊັ່ນ: ປະທານ ຫຼື ຜູ້ອຳນວຍການໃຫຍ່.
ນິຕິບຸກຄົນ ຈະມີຄວາມຮັບຜິດຊອບທາງອາຍາຕໍ່ການກະທຳຜິດຂອງຕົນ ໃນກໍລະນີດັ່ງນີ້: 1. ການກະທຳຜິດນັ້ນເປັນການກະທຳໃນນາມນິຕິບຸກຄົນ ຕົວຢ່າງ: ທ້າວ ເຜືອກ ເຮັດວຽກຢູ່ສະຖາບັນການເງິນຈີ້ງໂຈ້ ຂອງເອກະຊົນແຫ່ງໜຶ່ງ ໄດ້ໂຄສະນາທັບຖົມໂຈມຕີສະຖາບັນການເງິນອື່ນ ຊຶ່ງເປັນຄູ່ແຂ່ງຂອງຕົນ ດ້ວຍວິທີການຕ່າງໆທີ່ບໍ່ຖືກຕ້ອງ ເຮັດໃຫ້ລູກຄ້າຂາດຄວາມໄວ້ເນື້ອເຊື່ອໃຈ ແລະ ບໍ່ໄປໃຊ້ບໍລິການຢູ່ສະຖາບັນການເງິນດັ່ງກ່າວ ໝາຍຄວາມວ່າ ທ້າວ ເຜືອກ ໄດ້ກະທຳໃນນາມສະຖາບັນການເງິນຈີ້ງໂຈ້ ດ້ວຍການເຫັນດີເຫັນພ້ອມຂອງປະທານ ຫຼື ຜູ້ອຳນວຍການໃຫຍ່ 2. ການກະທຳຜິດນັ້ນ ເປັນການກະທຳຜິດເພື່ອຜົນປະໂຫຍດຂອງນິຕິບຸກຄົນ ໝາຍຄວາມວ່າ ທ້າວ ເຜືອກ ກະທຳໄປນັ້ນ ເພາະຕ້ອງການດຶງດູດລູກຄ້າມາໃຊ້ບໍລິການຢູ່ສະຖາບັນຂອງຕົນ 3. ການກະທຳຜິດນັ້ນ ເປັນການກະທຳພາຍໃຕ້ການຊີ້ນຳ ການຄຸ້ມຄອງ ແລະ ການຕົກລົງຂອງນິຕິບຸກຄົນເອງ.
ຄວາມຮັບຜິດຊອບທາງອາຍາຂອງນິຕິບຸກຄົນ ຈະບໍ່ພາໃຫ້ຄວາມຮັບຜິດຊອບທາງອາຍາຂອງບຸກຄົນ ທີ່ກະທຳຜິດໃນນາມນິຕິບຸກຄົນນັ້ນຕົກໄປ.
ໂທດທີ່ວາງໃສ່ນິຕິບຸກຄົນ ແມ່ນໂທດປັບໃໝ ຊຶ່ງເປັນໂທດຕົ້ນຕໍ ໂທດປັບໃໝທີ່ວາງໃສ່ນິຕິບຸກຄົນນັ້ນ ແມ່ນສອງເທົ່າຂອງໂທດປັບໃໝທີ່ວາງໃສ່ບຸກຄົນ ສຳລັບນິຕິບຸກຄົນ ນອກຈາກໂທດປັບໃໝ ສານອາດຈະຕັດສິນໃຫ້ຍົກເລີກທຸລະກິດ ຫ້າມດຳເນີນທຸລະກິດບາງປະເພດ ຫ້າມລະດົມທຶນ ການຫ້າມນຳໃຊ້ແຊັກ ຫຼື ບັດເຄຣດິດ ຮີບວັດຖຸສິ່ງຂອງ ຫຼື ຟື້ນຟູຄືນ.
ການຍົກເລີກທຸລະກິດຂອງນິຕິບຸກຄົນ ແມ່ນມາດຕະການທີ່ສານວາງໃສ່ນິຕິບຸກຄົນທີ່ກະທຳຜິດ ໃຫ້ຢຸດເຊົາປະເພດທຸລະກິດ ຊຶ່ງສານເຫັນວ່າ ຖ້າຫາກປ່ອຍໃຫ້ສືບຕໍ່ດຳເນີນ ຈະສ້າງຄວາມເສຍຫາຍ ແລະ ເປັນອັນຕະລາຍຕໍ່ສັງຄົມ ແລະ ສິ່ງແວດລ້ອມ ຊຶ່ງກໍລະນີທີ່ໄດ້ຍົກຂຶ້ນມານີ້ ໃນໄລຍະຜ່ານມາ ພວກເຮົາກໍໄດ້ເຫັນມາແລ້ວ ບາງບໍລິສັດທີ່ໄດ້ມີການເຄື່ອນໄຫວບໍ່ຖືກຕ້ອງ ຕາມຈຸດປະສົງຕົ້ນຕໍທີ່ບໍລິສັດໄດ້ກຳນົດໄວ້ ໃນບົດວິພາກເສດຖະກິດນັ້ນ.
ໂດຍ: ໄມ້ງັດ