ມື້ກ່ອນໄດ້ເວົ້າກ່ຽວກັບເລື່ອງລູກລ້ຽງ ການເອົາເດັກໄປເປັນລູກລ້ຽງ ກົດໝາຍໄດ້ກຳນົດໄວ້ຄືແນວໃດແດ່ ປະຕິບັດຕາມຂັ້ນ ຕາມຕອນແນວໃດແດ່ ທ່ານຜູ້ອ່ານກໍພໍຈະເຂົ້າໃຈໃນທາງປະຕິບັດແລ້ວເນາະ ແຕ່ມື້ນີ້ຈະເວົ້າກ່ຽວກັບເລື່ອງລູກນ້າ ສັງລວມແລ້ວກໍມີແຕ່ເວົ້າເລື່ອງລູກໆທັງນັ້ນ ຄວາມຈິງມັນເປັນເລື່ອງສຳຄັນ ເພາະເວົ້າເລື່ອງລູກໆກໍແມ່ນເວົ້າເລື່ອງການປົກປ້ອງສິດ ແລະ ຜົນປະໂຫຍດຂອງເດັກ ເພື່ອບໍ່ໃຫ້ພວກເຂົາເຈົ້າໄປຕົກເປັນເຫຍື່ອຂອງກຸ່ມຄົນບໍ່ດີ ໂດຍແອບອ້າງການເອົາເດັກໄປເປັນລູກລ້ຽງ ເອົາເດັກເປັນລູກນ້າ ຫຼື ລູກອື່ນໆ ສຸດທ້າຍເດັກຕ້ອງຕົກລະກຳລຳບາກ ຊຶ່ງພວກເຮົາອາດຈະເຫັນສະພາບຕົວຈິງທີ່ເດັກບາງກຸ່ມປະເຊີນຢູ່ເຊັ່ນ ຖືກໃຊ້ແຮງງານ ຖືກຂູດຮີດທາງເພດເປັນຕົ້ນ.
ຕາມຄວາມເຂົ້າໃຈແມ່ນວ່າ ລູກນ້າ ເປັນລູກທີ່ຕິດມານຳຜົວ ຫຼື ເມຍທີ່ໄດ້ຢ່າຮ້າງ ຫຼື ຍ້ອນສາເຫດອື່ນທີ່ພາໃຫ້ເດັກຕົກສູ່ສະພາບມີພໍ່ ແຕ່ຂາດແມ່ແທ້ ຫຼື ມີແມ່ ແຕ່ຂາດພໍ່ແທ້ ເມື່ອໄປແຕ່ງງານຊາຍ ຫຼື ຍິງຄົນອື່ນເດັກຈຶ່ງກາຍເປັນລູກນ້າ ສຳລັບພໍ່ນ້າ ຫຼື ແມ່ນ້າ ຕາມກົດເກນທີ່ສັງຄົມຂະໜານນາມໃຫ້ ແລະ ກໍມີກົດໝາຍຮອງຮັບວ່າ ລູກນ້າ ຕ້ອງກໍມີສິດຕ່າງໆຕາມທີ່ກົດໝາຍໃຫ້ມີ.
ລູກນ້າ ມີຖານະຄືກັນກັບລູກຄີງ ແລະ ລູກລ້ຽງ ເວັ້ນເສຍ ກົດໝາຍຫາກໄດ້ກຳນົດໄວ້ຢ່າງອື່ນ ນອກຈາກນີ້ ປະມວນກົດໝາຍແພ່ງຍັງໄດ້ກຳນົດໄວ້ວ່າ: ຖ້າເຈົ້າມູນມໍລະ ດົກ ຫາກມີລູກຄີງ ລູກລ້ຽງ ແລະ ລູກນ້າ ມູນມໍລະດົກທີ່ເປັນພູດສິນສົມສ້າງຂອງຜູ້ ກ່ຽວ ໃຫ້ແບ່ງປັນເປັນພູດສະເໝີກັນ.
ຕົວຢ່າງ: ທ້າວ ເສີຍ ເປັນພໍ່ຮ້າງ ຫຼື ພໍ່ ໝ້າຍ ມີລູກຕິດມານຳ 1 ຄົນ ແລ້ວໄປແຕ່ງ ງານກັບນາງ ຈ້ວຍ ພາຍຫຼັງແຕ່ງງານແລ້ວ ກໍມີຊັບທີ່ເປັນສິນສົມສ້າງຮ່ວມກັນ ເຮືອນ 1 ຫຼັງ ດິນ 1 ຕອນ ແລະ ມີລູກນຳກັນ 1 ຄົນ 5 ປີຕໍ່ມາ ທ້າວ ເສີຍ ກໍເສຍຊີວິດ ໃນກໍລະນີນີ້ກົດໝາຍໄດ້ກຳນົດວ່າ ຖ້າຜົວ ຫຼື ເມຍຫາກໄດ້ເສຍຊີວິດ ໂດຍໄດ້ປະເມຍ ຫຼື ຜົວ ແລະ ລູກ (ລູກຄີງ ລູກນ້າ) ໄວ້ສິນສົມສ້າງນັ້ນ ໃຫ້ແບ່ງເຄິ່ງ ຄື ເຄິ່ງໜຶ່ງໃຫ້ເມຍ ຫຼື ຜົວທີ່ຍັງມີຊີວິດຢູ່ ແລະ ອີກເຄິ່ງໜຶ່ງໃຫ້ແບ່ງປັນແກ່ພວກລູກ ເປັນພູດສະເໝີກັນ.
ລູກຄີງ ລູກລ້ຽງ ລູກນ້າ ທີ່ໄດ້ລ້ຽງດູ ເບິ່ງແຍງ ແລະ ປິ່ນປົວພໍ່ແມ່ຕະຫຼອດຮອດເສຍຊີວິດ ແລະ ມ້ຽນຄາບສົ່ງສະການ ດ້ວຍຕົນເອງ ຫຼື ໂດຍໃຊ້ຊັບຂອງຕົນເອງ ຫຼື ປະກອບສ່ວນໃນການປົກປັກຮັກສາ ແລະ ເຮັດໃຫ້ຊັບຂອງເຈົ້າມູນມໍລະດົກເພີ່ມຂຶ້ນ ກໍຈະໄດ້ຮັບສ່ວນແບ່ງມູນມໍລະດົກຂອງເຈົ້າມູນຫຼາຍກວ່າຜູ້ສືບທອດອື່ນ ໜຶ່ງພູດ.
ສິ່ງທີ່ກ່າວມານີ້ ແມ່ນເນື້ອໃນທີ່ສຳຄັນຈຳນວນໜຶ່ງໄດ້ກຳນົດໄວ້ຢູ່ໃນປະມວນກົດ ໝາຍແພ່ງ ໂດຍສະເພາະ ເວົ້າເລື່ອງລູກນ້າ ລູກນ້າກັບມູນມໍລະດົກຂອງຜູ້ເສຍຊີວິດ ຊຶ່ງພົນລະເມືອງລາວທຸກຄົນຕ້ອງຮັບຮູ້ ເຂົ້າ ໃຈ ແລະ ພ້ອມກັນປະຕິບັດ ເພື່ອບໍ່ໃຫ້ຖືກຮ້ອງ ຖືກຟ້ອງ ຍ້ອນຄວາມລຳອ່ຽງຂອງຜູ້ຍັງມີຊີວິດ ຄື ພໍ່ນ້າ ຫຼື ແມ່ນ້າ ນັ້ນເອງ.
ໂດຍ: ໄມ້ງັດ