ສາຍໄຟຟ້າຢູ່ນະຄອນຫຼວງວຽງຈັນຂອງພວກເຮົາ ກໍຄືຢູ່ໃນຕົວເມືອງອື່ນໆ ຍັງມະຍຸມະຍະຢັ່ງຢາຍບໍ່ເປັນລະບຽບ ຢູ່ເມືອງໃຫຍ່ໆໃນຕ່າງປະເທດ ເຂົາມີລະບົບຝັງສາຍໄຟຟ້າລົງດິນ ບໍ່ມີສາຍໄຟຟ້າເປັນປຸ້ມ ປິດບັງຄວາມງາມຂອງເຮືອນຊານບ້ານຊ່ອງ ຍ້ອນແນວນີ້ ພວກເຮົາທຸກຄົນຕ້ອງເອົາໃຈຊ່ວຍກັນ ຢ່າໃຫ້ມີເຄືອໄມ້ ຖົງຢາງ ຫຼື ເຄື່ອງເສດເຫຼືອ ຂີ້ເຫຍື້ອ ໄປເກາະຫ້ອຍຢູ່ຕາມສາຍໄຟ ເພາະມັນເປັນອັນຕະລາຍ ຈະເຮັດໃຫ້ສາຍໄຟຊຸດໂຊມ ໂຢດລົງມາໄດ້ ແລະ ເບິ່ງບໍ່ງາມຕາ ສຳຄັນກວ່ານັ້ນ ຢ່າສຸມໄຟກ້ອງສາຍໄຟ ເພາະເປັນອັນຕະລາຍເຖິງແກ່ຊີວິດ ແລະ ທັງຈະສ້າງຄວາມເສຍຫາຍໃຫ້ສາຍໄຟ ທີ່ເປັນສົມບັດລວມຂອງລັດ ອີກດ້ວຍ.