ຄໍລຳພວກເຮົາເຄີຍຂຽນເຕືອນການບໍລິໂພກຂໍ້ມູນຈາກສື່ອອນລາຍມາແລ້ວ ໂດຍສະເພາະ ໃນຍຸກດີຈີຕອນ ໂດຍເນັ້ນໃຫ້ມີສະຕິໃນການຮັບຂໍ້ມູນດັ່ງບົດຄວາມໃນຫົວຂໍ້… ລະວັງຈະຕົກເປັນເຫຍື່ອຍຸດທະສາດຫັນປ່ຽນໂດຍສັນຕິ… ລົງພິມວັນທີ 8/7/2020.
ຫາກເພື່ອນຜູ້ອ່ານຕິດຕາມຂ່າວຈະເຫັນວ່າມໍ່ໆມານີ້ສື່ອອນລາຍໄດ້ມີການນຳຂໍ້ມູນຈາກບົດຂຽນ ພິທີກອນ ຫຼື ສຳນັກງານສື່ຕ່າງປະເທດມາເຜີຍແຜ່ຕໍ່ ເຊິ່ງເລື່ອງນີ້ກໍມີການອອກມາອະທິບາຍ ແລະ ໂຕ້ຕອບກັນແລ້ວໃນສື່ອອນລາຍ ເປັນຕົ້ນແມ່ນ ບົດຂຽນຂອງອະດີດນັກການທູດລາວກ່ຽວກັບບົດຂຽນຂອງອະດີດທູດສິງກະໂປ ໂດຍແມ່ນເວັບໄຊຂອງໜັງສືພິມລາວພັດທະນາເຜີຍແຜ່ ບົດຄວາມຈາກເວັບໄຊ ວິທະຍຸກະຈາຍສຽງແຫ່ງຊາດທີ່ເວົ້າເຖິງການພົວພັນຮ່ວມມືສອງປະເທດລາວ-ໄທ ໃນວາລະຄົບຮອບ 70 ປີ ວັນສ້າງຕັ້ງສາຍພົວພັນການທູດ ລາວ-ໄທ (19 ທັນວາ 1950-19 ທັນວາ 2020) ແລະ ຫຼ້າສຸດບົດຂຽນນັກຂ່າວອາວຸໂສທີ່ເຜີຍແຜ່ໂດຍ “ມີເດຍລາວ” ໃນວັນທີ 5 ພະຈິກ 2020 ພາຍໃຕ້ຫົວຂໍ້ “ຮອດຍາມເດັດຂາດແລ້ວ…”
ພຽງແຕ່ອ່ານສາມບົດຄວາມນີ້ ພວກເຮົາກໍພໍຈະຮູ້ວ່າຄວາມຈິງຂອງບັນຫາເຫຼົ່ານັ້ນເປັນແນວໃດ ? ຜູ້ຂຽນຂໍນຳສະເໜີບາງຈຸດຂອງບົດຄວາມນັກຂ່າວອາວຸໂສດັ່ງນີ້: ກໍລະນີບົດຂຽນຂອງອະດີດນັກການທູດສິງກະໂປນັ້ນແມ່ນສະແດງໃຫ້ເຫັນເຖິງການວາງແຜນສ້າງຄວາມແຕກແຍກພາຍໃນກຸ່ມອາຊຽນເພື່ອຮັບໃຊ້ມະຫາອຳນາດຕາເວັນຕົກໃນຍຸດທະສາດອິນໂດ-ປາຊີຟິກ ຊິ່ງກ່ອນໜ້ານີ້ຄືໃນວັນທີ 6 ຕຸລາ 2020 ທີ່ ກຸງໂຕກຽວ ໄດ້ມີກອງປະຊຸມແຝດສີ່ ໂດຍໄດ້ຍົກຫົວຂໍ້ວ່າ: ເພື່ອພາກພື້ນມະຫາສະໝຸດອິນເດຍ-ປາຊີຟິກ ທີ່ເສລີ ແລະ ເປີດກວ້າງບົນພື້ນຖານກົດໝາຍ… ທ່ານຜູ້ອ່ານທີ່ຕິດຕາມຈະຮູ້ໂລດວ່າ ມະຫາອຳນາດຂອງໂລກພວມຊອກທຸກວິທີທາງເພື່ອມີບົດບາດໃນພູມລັດຖະສາດຢູ່ຂົງເຂດນີ້… ຜູ້ເຄີຍມີບົດບາດມາຮອດດຽວນີ້ກໍຖືກຫຼຸດລົງ ສະນັ້ນ ເພື່ອຮັກສາບົດບາດກໍຕ້ອງມີການເຄື່ອນໄຫວ ໂດຍນຳໃຊ້ເຄື່ອງມືຕ່າງໆນັບທັງໃຊ້ບຸກຄົນເປັນຕົວເດີນເກມ.
ໃນຄວາມເປັນຈິງແລ້ວ ສປປ ລາວ ແລະ ກຳປູເຈຍ ຖືວ່າເປັນຜູ້ດຶງການລົງທຶນເຂົ້າອາຊຽນຫຼາຍກວ່າເພິ່ນ ເລື່ອງນີ້ສະຖານີຂ່າວ TNN ຊ່ອງ 16 ຂອງໄທ ທີ່ອອກອາກາດໃນວັນທີ 27 ກໍລະກົດ 2020 ໃນຄໍລຳອາຊຽນ 4.0 ໄດ້ຍົກໃຫ້ເຫັນຢ່າງຈະແຈ້ງເຖິງການດຶງການລົງທຶນຈາກຕ່າງປະເທດເຂົ້າອາຊຽນ ບໍ່ວ່າຈາກ ສປ ຈີນ ຍີ່ປຸ່ນ ມາເລເຊຍ ສິງກະໂປ ແລະ ໄທ ສຳລັບ ສປປ ລາວ ເຂົາບອກວ່າ: ກຳລັງເນື້ອຫອມຫຼັງໂຄວິດ-19 ວ່າຊັ້ນ ຍ້ອນເຫດຜົນລາວມີຄວາມໝັ້ນຄົງດ້ານການເມືອງ ມີນະໂຍບາຍດຶງດູດການລົງທຶນທີ່ໜ້າພໍໃຈໃນເຂດເສດຖະກິດຂອງລາວໂດດເດັ່ນສຳລັບນັກລົງທຶນຈາກໄທ ແມ່ນເຂດເສດຖະກິດພິເສດສະຫວັນ-ເຊໂນ ມີນັກລົງທຶນເຂົ້າໄປລົງທຶນເຖິງ 29 ໂຄງການ ຢູ່ແຂວງຈຳປາສັກແຮ່ງສູງມີເຖິງ 59 ໂຄງການ ເຊິ່ງສ່ວນຫຼາຍແມ່ນລົງທຶນໃນຂົງເຂດກະສິກຳ ຍ້ອນໜ້າເຈ້ຍຈຳກັດຈຶ່ງບໍ່ສາມາດເລົ່າລະອຽດ ຂໍໃຫ້ເພື່ອນຜູ້ອ່ານເຂົ້າໄປເບິ່ງເອົານໍ ? ສ່ວນຣາຊະອານາຈັກກຳປູເຈຍກໍເຊັ່ນກັນ ທຶນຕ່າງປະເທດຫຼັ່ງໄຫຼເຂົ້າຫຼາຍ… ເຫດຜົນນີ້ກໍເປັນສ່ວນໜຶ່ງເຮັດໃຫ້ເພື່ອນຂອງເຮົາຢູ່ກຸ່ມອາຊຽນເກີດມີຄວາມອິດສາຕາຮ້ອນກໍເລີຍປ່ອຍຄຳເວົ້າແບບບໍ່ສຶກສາຄວາມເປັນຈິງອອກມາເຫົ່າຫອນຄືດັ່ງກ່າວ.
ກໍລະນີບຸກຄົນ ສື່ມວນຊົນຈາກປະເທດໄທ ທີ່ອອກມາເວົ້າພາດພິງປະເທດເຮົາ ມັນກໍບໍ່ແມ່ນເລື່ອງບັງເອີນ ຫຼື ຮູ້ເທົ່າບໍ່ເຖິງການດອກ ມັນແມ່ນການຈັດຕັ້ງຄັກແນ່ ? ຂອງກຸ່ມຄົນບໍ່ດີໃນໄທທີ່ຫວັງມ້າງເພຄວາມສຳພັນຮ່ວມມືລະຫວ່າງສອງປະເທດ ເຊິ່ງປີນີ້ແມ່ນມີວາລະຄົບຮອບ 70 ປີແຫ່ງວັນສ້າງຕັ້ງສາຍພົວພັນການທູດ ລາວ-ໄທ (19 ທັນວາ 1950-19 ທັນວາ 2020) ເຊິ່ງລັດຖະບານສອງປະເທດເພິ່ນມີແຜນສະຫຼອງໃຫ້ຄຶກຄື້ນ ເລີ່ມຕົ້ນການປະຕິບັດການຂອງກຸ່ມຄົນບໍ່ດີໃນປີສຳຄັນນີ້ ແມ່ນກໍລະນີ ທ້າວ ຈັດທິມະ ຜູ້ອ່ານຂ່າວຢູ່ໂທລະພາບຊ່ອງ ONE 31 ຂອງໄທ ໄດ້ນຳສະເໜີຂໍ້ມູນບໍ່ຖືກຕ້ອງກ່ຽວກັບການຮັບມືພະຍາດໂຄວິດ-19 ແລະ ວິພາກວິຈານແບບປາກສຸນັກຕໍ່ລະບົບສາທາລະນະສຸກຂອງລາວໃນເດືອນມີນາ 2020 ຕໍ່ມາໃນວັນທີ 4 ກັນຍາ 2020 ສື່ໄທ ໂດຍສະເພາະ ໂພສທູເດ ສະບັບວັນທີ 4 ກັນຍາ 2020 ກໍອອກຂ່າວໃນຫົວຂໍ້ “ລາວຍອມໃຫ້ຈີນຄຸມເຂື່ອນ” ແຊກແຊງເຂົ້າການລົງທຶນຮ່ວມມືລະຫວ່າງ ລາວ-ຈີນ ແລະ ຫຼ້າສຸດ ໃນວັນທີ 20 ຕຸລາ 2020 ໂທລະພາບຊ່ອງ 3 ຂອງໄທ ໄດ້ຍົກເອົາປະເດັນໃນສື່ອອນລາຍທີ່ອ້າງວ່າເປັນຂອງຄົນລາວ ມີເນື້ອໃນເປັນພາສາໄທໃນລັກສະນະວ່າ ຖ້າການເມືອງລາວດີ… ເປັນຫຍັງຈຶ່ງມີປາກົດການຫຍໍ້ທໍ້ຫຼາຍຢ່າງຢູ່ລາວ.
ກໍລະນີບຸກຄົນ ແລະ ສື່ໄທນີ້ເປັນເລື່ອງຊຳເຮື້ອບານປາຍມາຫຼາຍຄັ້ງ ແລະ ຫຼາຍປີຕິດຕໍ່ກັນ ສຸດທ້າຍ ພວກເຂົາກໍອອກມາຂໍໂທດ ແລ້ວເລື່ອງກໍມິດງຽບໄປ ຈາກຂໍ້ມູນບົດຄວາມດັ່ງກ່າວຂ້າງເທິງນັ້ນ ມັນສະແດງໃຫ້ເຮົາເຫັນວ່າມັນມີການບິດເບືອນ ສະນັ້ນ ຫາກຜູ້ບໍລິໂພກຂ່າວບໍ່ມີສະຕິ ບໍ່ເຂົ້າໃຈວ່າປະເທດທຶນນິຍົມ ຫຼື ລະບອບທຶນນິຍົມນັ້ນ ຂ່າວ-ບົດຄວາມຕ່າງໆທີ່ອອກຜ່ານສື່ຕ່າງໆ ໂດຍສະເພາະ ສື່ອອນລາຍນັ້ນ ມັນເປັນສິນຄ້າ… ແນ່ນອນພວກຂຽນ ພວກສະເໜີຂ່າວນັ້ນຍ່ອມມີຜົນປະໂຫຍດແອບແຝງ ເຕືອນກັນໄວ້ເນີ ! ບໍ່ຊັ້ນຖືກສື່ອອນລາຍປັ່ນຫົວ.
ໂດຍ: ແນວລາວ