ການຄ້າມະນຸດ ແມ່ນອາຊະຍາກຳທີ່ແຜ່ຫຼາຍໃນລະດັບຕົ້ນໆຂອງໂລກ ຄຽງຄູ່ກັບອາຊະຍາກຳຄ້າຢາເສບຕິດ ແລະ ການຄ້າສັດປ່າ ການຄ້າມະນຸດນີ້ ດຳເນີນໄປໃນຫຼາຍຮູບແບບ ແລະ ຫຼາຍລະດັບ ສຳລັບມື້ນີ້ຂໍເວົ້າສະເພາະການຄ້າມະນຸດໃນຮູບແບບການຄ້າປະເວນີ ເພື່ອເບິ່ງວ່າໃນບາງປະເທດນັ້ນ ເຂົາມີມາດຕະການແກ້ໄຂປາກົດການຫຍໍ້ທໍ້ນີ້ແນວໃດ.
ທີ່ ສ ເກົາຫຼີ: ໃນທ້າຍເດືອນມີນາ 2016 ສານລັດຖະທຳມະນູນ ສ ເກົາຫຼີ ໄດ້ຕັດສິນໃຫ້ກົດໝາຍລົງໂທດການຄ້າປະເວນີ ຍັງມີຜົນບັງຄັບໃຊ້ຢ່າງເຂັ້ມງວດຕໍ່ໄປ ທີ່ຕ້ອງໄດ້ອອກຄຳຕັດສິນນີ້ ກໍເພາະວ່າກ່ອນໜ້ານັ້ນ ຍິງເກົາຫຼີທີ່ຄ້າປະເວນີຄົນໜຶ່ງໄດ້ຍື່ນຄຳຮ້ອງຟ້ອງຂຶ້ນສານ ໂດຍໄດ້ທວງໃຫ້ພົນລະເມືອງມີສິດເສລີພາບ ໃນການເລືອກປະກອບອາຊີບໄດ້ (ລວມທັງອາຊີບຄ້າປະເວນີ) ແຕ່ເລື່ອງນີ້ ທາງສານລັດຖະທຳມະນູນ ສ ເກົາຫຼີ ໄດ້ຕອບໂຕ້ດ້ວຍການປະຕິເສດ.
ສ ເກົາຫຼີ ມີກົດໝາຍຫ້າມການຄ້າປະເວນີທີ່ເຄັ່ງຄັດທີ່ສຸດ ຄື: ໄດ້ກຳນົດບົດລົງໂທດທັງຜູ້ຊື້ ແລະ ຜູ້ຂາຍ ດ້ວຍໂທດຕິດຄຸກສູງສຸດເປັນເວລາ 1 ປີ ແລະ ປັບໄໝເປັນເງິນ ຈຳນວນ 3 ລ້ານວອນ (ປະມານ 2.600 ໂດລາສະຫະລັດ) ທາງການ ສ ເກົາຫຼີ ໄດ້ອ້າງເຫດຜົນກ່ຽວກັບການສືບຕໍ່ຫ້າມການຄ້າປະເວນີວ່າ: ເພື່ອປ້ອງກັນການຫາປະໂຫຍດໂດຍບໍ່ຖືກຕ້ອງ ແລະ ທັງເປັນການປົກປ້ອງສິລະທຳຂອງສັງຄົມ ການເຮັດໃຫ້ການຄ້າປະເວນີຖືກຕ້ອງຕາມກົດໝາຍນັ້ນ ຈະຍິ່ງເປັນການເຮັດໃຫ້ທຸລະກິດຄ້າປະເວນີຂະຫຍາຍຕົວຢ່າງວ່ອງໄວ ເຊິ່ງຈະສົ່ງຜົນກະທົບຕໍ່ສະຖຽນລະພາບຂອງສັງຄົມ ແລະ ເສດຖະກິດຂອງປະເທດ ລວມທັງພຶດຕິກຳທາງເພດທີ່ບໍ່ຖືກຕ້ອງ.
ສ່ວນຫາງສຽງທີ່ສະໜັບສະໜູນຈາກສັງຄົມນັ້ນ ກໍບອກວ່າ ການຄ້າປະເວນີ ຈະກໍ່ຊະນວນໃຫ້ມີການໃຊ້ຄວາມຮຸນແຮງ ການຫຼອກລວງເຫຍື່ອທີ່ເປັນຍິງສາວເພີ່ມຂຶ້ນ ສ່ວນສຽງຄັດຄ້ານກົດໝາຍຫ້າມຄ້າປະເວນີນັ້ນ ກໍອ້າງວ່າກົດໝາຍສະບັບນີ້ ຈຳກັດສິດເສລີພາບທາງຮ່າງກາຍຂອງແມ່ຍິງ ແລະ ເຮັດໃຫ້ຊີວິດຂອງຍິງຄ້າບໍລິການມີຄວາມສ່ຽງຂຶ້ນຕື່ມ.
ທີ່ ກຳປູເຈຍ: ແຫຼ່ງຂ່າວ ເດິ ພະນົມເປັນ ໂພສ (The Phnom Penh Post) ໃຫ້ຮູ້ເມື່ອກາງປີ 2019 ວ່າ: ໃນ 6 ເດືອນຕົ້ນປີ 2019 ທາງການກຳປູເຈຍທັບມ້າງກຸ່ມແກ້ງຄ້າມະນຸດ ເພື່ອເປົ້າໝາຍຂູດຮີດທາງເພດໄດ້ 78 ກໍລະນີ ສາມາດຊ່ວຍເຫຼືອຜູ້ທີ່ຕົກເປັນເຫຍື່ອໄດ້ຈຳນວນ 263 ຄົນ ເພີ່ມຂຶ້ນ 25% (ສຳລັບການຄ້າມະນຸດທົ່ວໄປ) ແລະ 148% ສຳລັບການຄ້າມະນຸດ ເພື່ອເປົ້າໝາຍຂູດຮີດທາງເພດ ທຽບກັບເວລາດຽວຂອງປີ 2018.
ຈາກສອງຂ່າວທີ່ເວົ້າມາຂ້າງເທິງນີ້ ພໍສະຫຼຸບໄດ້ວ່າ ການຄ້າມະນຸດເພື່ອເປົ້າໝາຍຂູດຮີດທາງເພດນັ້ນ ຍັງມີເປີເຊັນສູງ ດັ່ງນັ້ນ ຈຶ່ງບໍ່ແປກທີ່ຜູ້ຕົກເປັນເຫຍື່ອສ່ວນໃຫຍ່ ຈຶ່ງເປັນແມ່ຍິງ ແລະ ເດັກຍິງ.