ໃນບົດນີ້ ບັນດາທ່ານຈະໄດ້ຮູ້ກັບກົດໝາຍແປກໃໝ່ ແຕ່ໜ້າສົນໃຈ ຢູ່ ສປ ຈີນ ແລະ ຟິລິບປິນ ເຊິ່ງບາງເລື່ອງກໍເຄີຍເລົ່າໃຫ້ຟັງມາແລ້ວ ແຕ່ຂໍທວນຄືນຄວາມຈຳອີກເທື່ອໜຶ່ງ.
ທີ່ ສປ ຈີນ: ຢູ່ ສປ ຈີນ ນັ້ນ ການພັດທະນາປະເທດຊາດທາງເສດຖະກິດ-ສັງຄົມນັ້ນ ເພິ່ນຖືເອົາຄົນເປັນກົກ ຄື: ກ່ອນຊິວາງນະໂຍບາຍ ຫຼື ມາດຕະການຕ່າງໆອອກມານັ້ນ ເພິ່ນຕ້ອງຢັ່ງຫາງສຽງ ຫຼື ເກັບກຳຄຳຄິດຄຳເຫັນຈາກພື້ນຖານປະຊາຊົນມາເປັນບ່ອນອີງ ຕົວຢ່າງ: ເລື່ອງກົດໝາຍເອົາໂທດຜູ້ອ່ານໜັງສືໜ້ອຍ ທີ່ພວມເວົ້າຮອດຢູ່ນີ້ນັ້ນ ໄດ້ຖືກສ້າງຂຶ້ນພາຍຫຼັງໄດ້ເກັບກຳສະຖິຕິກ່ຽວກັບອັດຕາການອ່ານໜັງສືພິມຂອງຈີນ.
ຂ່າວຈາກ ສປ ຈີນ ໃນຕົ້ນເດືອນສິງຫາ 2013 ບອກວ່າ: ລັດຖະບານຈີນໄດ້ຮ່າງກົດໝາຍ ບັງຄັບໃຫ້ພົນລະເມືອງຈີນອ່ານໜັງສືຫຼາຍຂຶ້ນ ພາຍຫຼັງມີສະຖິຕິໃນຊຸມປີກ່ອນໜ້າທີ່ຊີ້ອອກວ່າ ຄົນຈີນຍັງອ່ານໜັງສືໜ້ອຍ ສົມທຽບກັບຄົນໃນສະຫະລັດອາເມຣິກາ ຄື: ໃນປີ 2012 ຕົວເລກໄດ້ບົ່ງບອກໃຫ້ຮູ້ວ່າ: ຄົນຈີນອາຍຸລະຫວ່າງ 18-70 ປີ ອ່ານໜັງສືໂດຍສະເລ່ຍ 6,7 ເຫຼັ້ມຕໍ່ຄົນຕໍ່ປີ ໃນນັ້ນ ລວມທັງໜັງສືເປັນເຫຼັ້ມ ແລະ ແບບເອເລັກໂຕຣນິກ ຕົວເລກນີ້ໄດ້ເພີ່ມຂຶ້ນກວ່າປີ 2011 1 ເຫຼັ້ມ ແຕ່ຖ້າປຽບໃສ່ປະເທດທີ່ພັດທະນາແລ້ວ ກໍເຫັນວ່າຍັງຕ່ຳຫຼາຍ ຢູ່ສະຫະລັດອາເມຣິການັ້ນ ຄົນອ່ານໜັງສືໂດຍສະເລ່ຍແມ່ນ 15 ເຫຼັ້ມຕໍ່ຄົນຕໍ່ປີ ຕອນເລື່ອງນີ້ພວມເປັນຂ່າວຢູ່ນັ້ນ (ໜັງສືພິມລາວພັດທະນາ 12/08/2013) ຍັງບໍ່ມີລາຍລະອຽດ ກ່ຽວກັບການກຳນົດໂທດໃນກົດໝາຍສະບັບນີ້ຕໍ່ຜູ້ອ່ານໜັງສືໜ້ອຍ ກົດໝາຍສະບັບນີ້ ໄດ້ປະເຊີນກັບສຽງວິພາກວິຈານຈາກຄົນບາງກຸ່ມວ່າເປັນ “ກົດໝາຍທີ່ບໍ່ມີເຫດຜົນພຽງພໍ”.
ທີ່ ຟິລິບປິນ: ໃນປີ 2019 ຟິລິບປິນ ໄດ້ປະກາດໃຊ້ກົດໝາຍທີ່ເບິ່ງແລ້ວອ່າວແປກ ຄື: ກົດໝາຍຫ້າມຢອກຜູ້ສາວ ຄື: ການຢອກແນວເສຍໆຫາຍໆໄປໃນທາງລາມົກ ຫຼື ດ້ວຍຄຳເວົ້າກວນຊວນໂມໂຫ ການຫ້າມຢອກນີ້ ເນັ້ນໃສ່ການຢອກຕາມຖະໜົນຫົນທາງ ກໍຄື ສະຖານທີ່ສາທາລະນະ ເຊັ່ນ: ການຜິວປາກ ການສະແດງສັນຍານທ່າທີທີ່ເປັນການຢອກລໍ້ໝິ່ນປະໝາດ ລວມທັງການຢອກລໍ້ໃຫ້ເສຍຫາຍທາງສື່ສັງຄົມອອນລາຍ.
ຜູ້ລະເມີດກົດໝາຍສະບັບນີ້ ຈະໄດ້ຮັບໂທດເຖິງຂັ້ນຈຳຄຸກ ຫຼື ຖືກປັບໃໝເປັນເງິນແຕ່ 1 ແສນຫາ 5 ແສນເປໂຊ (ລະຫວ່າງ 16-58 ລ້ານກີບ) ຫຼື ທັງຕິດຄຸກ ທັງຖືກປັບໃໝ ຖ້າຜູ້ລະເມີດເປັນຄົນຕ່າງປະເທດ ຜູ້ກ່ຽວກໍຈະຖືກເນລະເທດພາຍຫຼັງໄດ້ຮັບໂທດ ແລະ ເສຍຄ່າປັບໃໝແລ້ວ ຖ້າເປັນການກະທຳຜິດຂອງສື່ສິ່ງພິມ ບັນນາທິການ ກໍຄື ນັກຂ່າວທີ່ກ່ຽວຂ້ອງຕ້ອງຮັບຜິດຊອບ ຖ້າເປັນໂທລະພາບ ຜູ້ອຳນວຍການ ບັນນາທິການ ແລະ ນັກຂ່າວຕ້ອງເປັນຜູ້ຮັບໂທດ.