ບັນດາທ່ານຜູ້ອ່ານອາດຈະເຄີຍໄດ້ຍິນຢູ່ເລື້ອຍໆ ຄຳວ່າ ‘’ອາດຍາສິດ ຫຼື ພະຍາດອາດຍາສິດ” ແຕ່ບາງທ່ານອາດຈະບໍ່ທັນເຂົ້າໃຈວ່າມີຄວາມໝາຍແນວໃດ ແລະ ເປັນພະຍາດແນວໃດ ແຕ່ຖ້າເປັນພະຍາດນີ້ ມີຄວາມອັນຕະລາຍຮ້າຍແຮງຫຼາຍສ່ຳໃດ ແລະ ສາມາດມີຢາປິ່ນປົວໄດ້ບໍ່ ?.
ມື້ນີ້ ຂ້າພະເຈົ້າຈະຂໍນຳສະເໜີຄວາມໝາຍ ຄວາມກະຈ່າງແຈ້ງ ແລະ ຜົນຮ້າຍຂອງ “ພະຍາດອາດຍາສິດ ຫຼື ອາດຍາສິດ”:
ຄຳວ່າ “ອາດຍາສິດ” ໝາຍເຖິງການໃຊ້ອຳນາດເກີນຂອບເຂດ ໃນການປະຕິບັດພາລະບົດບາດ ສິດ ແລະ ໜ້າທີ່ ຫຼື ການໃຊ້ອຳນາດຂອງຕົນເກີນຂອບເຂດ ຫຼື ໃຊ້ອຳນາດເດັດຂາດ ເພື່ອບັງຄັບຜູ້ອື່ນນຳເອົາເງິນຄຳຊັບສິນ ຫຼື ຊັບສົມບັດມອບໃຫ້ ຫຼື ຍົກໃຫ້ຕົນເອງ.
ອາດຍາສິດ ຫຼື ພະຍາດອາດຍາສິດ ເປັນພະຍາດໜຶ່ງທີ່ມີຄວາມອັນຕະລາຍຮ້າຍແຮງຫຼາຍທີ່ສຸດ ແລະ ກຳລັງແພ່ລະບາດຫຼາຍຢູ່ໃນສັງຄົມລາວປັດຈຸບັນ ພະຍາດນີ້ ສ່ວນຫຼາຍມັກຈະເກີດຂຶ້ນຫຼາຍກັບພະນັກງານ-ລັດຖະກອນ ທະຫານ ແລະ ຕຳຫຼວດ ຜູ້ທີ່ມີບົດບາດ ແລະ ຕຳແໜ່ງທາງດ້ານບໍລິຫານ ຊຶ່ງສາເຫດດັ່ງກ່າວແມ່ນເກີດຈາກຄວາມໂລບມາກໂລພາ ຄວາມເຫັນແກ່ຕົວຂອງບຸກຄົນດັ່ງກ່າວ ຈຶ່ງໄດ້ມີການນຳໃຊ້ບົດບາດ ອຳນາດ ສິດ ແລະ ໜ້າທີ່ເກີນຂອບເຂດ ກອບໂກຍເອົາເງິນຄຳ ຊັບສົມບັດ ຫຼື ຊັບສິ່ງຂອງ ເພື່ອສ້າງຄວາມຢາກຮັ່ງຢາກມີ.
ພະຍາດອາດຍາສິດ ແມ່ນບໍ່ສາມາດປິ່ນປົວໄດ້ ແລະ ບໍ່ສາມາດປົວ ຫຼື ຮັກສາດ້ວຍຢາຊະນິດແບບທຳມະດາໄດ້ ມັນຕ້ອງໄດ້ນຳໃຊ້ຢາທີ່ມີປະສິດທິພາບສູງສຸດ ແລະ ຂັ້ນເດັດຂາດ ຈຶ່ງສາມາດລະງັບ ປາບປາມການແຜ່ລະບາດພະຍາດນີ້ໄດ້ ດ້ວຍການນຳໃຊ້ມາດຕະການທາງດ້ານກົດໝາຍທີ່ເຂັ້ມງວດ ເພື່ອເຮັດໃຫ້ຜູ້ທີ່ເປັນພະຍາດອາດຍາສິດນີ້ ມີສະຕິ ຢາກປິ່ນປົວຕົນເອງ ຫຼື ຢ້ານກົວ ແລະ ປະພຶດຕົນຮັບໃຊ້ຊາດ ຮັບໃຊ້ປະຊາຊົນ ດ້ວຍຄວາມບໍລິສຸດ ເພື່ອບໍ່ໃຫ້ຕົນເອງຕິດເຊື້ອພະຍາດຊະນິດນີ້.
ຂຽນໂດຍ: ສ. ສາຍນ້ຳຊຳ