ອາລີບາບາຄລາວ ເສົາຫຼັກດ້ານເຕັກໂນໂລຊີດິຈິຕອນ ແລະ ຫຸ່ນຍົນອັດສະລິຍະ (AI) ຂອງອາລີບາບາ ກຣຸບ ໄດ້ເປີດຕົວຫຸ່ນຍົນໂລຈິສຕິກອັດຕະໂນມັດ ສຳລັບການຂົນສົ່ງພັດສະດຸໄມສຸດທ້າຍ (Last-mile delivery) ຫຼື ການຂົນສົ່ງໄປຫາຜູ້ຮັບປາຍທາງ ໃນກອງປະຊຸມປະຈຳປີ 2020 ເມື່ອວັນທີ 17 ກັນຍາທີ່ຜ່ານມາ.
ຫຸ່ນຍົນດັ່ງກ່າວ ພັດທະນາໂດຍສະຖາບັນ ອາລີບາບາ ດ໋າໂມ (Alibaba DAMO Academy) ເຊິ່ງເປັນໂຄງການລິເລີ່ມການວິໄຈລະດັບໂລກຂອງອາລີບາບາ ກຣຸບ ຫຸ່ນຍົນສາມາດບັນທຸກພັດສະດຸໄດ້ 50 ຊິ້ນໃນຄັ້ງດຽວ ແລະ ເດີນທາງໄດ້ເຖິງ 100 ກິໂລແມັດຕໍ່ການສາກໜຶ່ງຄັ້ງ.
ປະມານການວ່າຫຸ່ນຍົນຈະຈັດສົ່ງພັດສະດຸໄປຍັງເຂດຊຸມຊົນ ຫຼື ມະຫາວິທະຍາໄລໜຶ່ງແຫ່ງທີ່ກຳນົດໄດ້ 500 ຊິ້ນຕໍ່ວັນ ຕອບສະໜອງຄວາມຕ້ອງການດ້ານການຂົນສົ່ງໄປຍັງຜູ້ຮັບປາຍທາງອັນວ່ອງໄວ ທີ່ກຳລັງເພີ່ມຂຶ້ນໃນປະເທດຈີນ “ເຮົາຄາດວ່າຈະມີຄວາມຕ້ອງການໃນການຈັດສົ່ງເພີ່ມຂຶ້ນຢ່າງວ່ອງໄວຈາກທຸລະກິດຄ້າຍ່ອຍ ແລະ ທຸລະກິດບໍລິການໃນທ້ອງຖິ່ນໃໝ່ໆທີ່ເຟື່ອງຟູໃນໂລກ ທີ່ມີຄວາມເປັນດິຈິຕອນຫຼາຍຂຶ້ນ” ທ່ານ ເຈຟ ຈາງ ປະທານຂອງ ອາລີບາບາຄລາວ ອິນເທວລິເຈນ ກ່າວ.
ຫຸ່ນຍົນອັດສະລິຍະຕົວນີ້ ໄດ້ຮັບການສະໜັບສະໜູນດ້ວຍເຕັກໂນໂລຊີການຮຽນຮູ້ແບບລອງຜິດລອງຖືກ ສາມາດກຳນົດເສັ້ນທາງໄດ້ ເຖິງແມ່ນໃນສະພາບແວດລ້ອມທີ່ແອອັດ ແລະ ຍັງສາມາດເຮັດວຽກໄດ້ໃນບ່ອນທີ່ສັນຍານຈີພີເອສອ່ອນ ຫຼື ບໍ່ມີສັນຍານ ດ້ວຍເຕັກໂນໂລຊີການກຳນົດຕຳແໜ່ງຄວາມລະອຽດສູງ ທີ່ເປັນກຳມະສິດສະເພາະຂອງເຄື່ອງເທົ່ານັ້ນ.
ທ່ານ ເສິນຈິນໂປ ຜູ້ຊ່ຽວຊານດ້ານອັນກໍຣິທຶມອາວຸໂສຈາກຫ້ອງປະຕິບັດການ ການຂັບເຄື່ອນອັດຕະໂນມັດຂອງສະຖາບັນອາລີບາບາ ດ໋າໂມ ກ່າວວ່າ “ໃນໄລຍະທຳອິດ ເຮົາມີແຜນທີ່ຈະນຳຫຸ່ນຍົນຂົນສົ່ງໄປໃຊ້ໃນພື້ນທີ່ຫາກໍເປີດບາງແຫ່ງ ເຊັ່ນ: ຊຸມຊົນມະຫາວິທະຍາໄລ ເຂດອຸດສາຫະກຳ ແລະ ທຳເລທຸລະກິດເພື່ອໃຫ້ບໍລິການແກ່ລູກຄ້າ”.
ກອງປະຊຸມປະຈຳປີ 2020 ເຊິ່ງເດີມມີຊື່ວ່າກອງປະຊຸມນັກພັດທະນາລະບົບຄລາວອາລີ ເປັນເວທີທຳອິດທີ່ສະແດງນະວັດຕະກຳໃນປະເທດຈີນ ປະເດັນສຳຄັນຂອງກອງປະຊຸມປະຈຳປີ 2020 ວ່າດ້ວຍການ “ກ້າວກະໂດດສູ່ອະນາຄົດແຫ່ງຄວາມສະຫຼາດທາງດິຈິຕອນ” ຈະຫຍັບກວ້າງຂຶ້ນຈາກວິທະຍາສາດ ແລະ ເຕັກໂນໂລຊີ ມາເປັນອຸດສາຫະກຳເຕັກໂນໂລຊີ ແລະ ອຸປະກອນເອເລັກໂຕຣນິກສຳລັບຜູ້ບໍລິໂພກ.