ພວກເຮົາມັກເຂົ້າໃຈຜິດກັບຄຳເວົ້າເດີມທີ່ວ່າ ກະສິກຳປອດສານພິດ ເຊິ່ງຄວາມຈິງຄຳວ່າ ກະສິກຳປອດສານພິດ ບໍ່ແມ່ນຄຳເວົ້າທີ່ທາງການໃຊ້ ແຕ່ເຮົາຈະໃຊ້ຄຳວ່າ ກະສິກຳອິນຊີ ຫຼື ກະສິກຳສະອາດ ເຊິ່ງມີຢູ່ 4 ຮູບແບບການຜະລິດ ເຊັ່ນ: (1) ກະສິກຳທີ່ດີ (2) ກະສິກຳບໍ່ໃຊ້ສານເຄມີ (3) ກະສິກຳອິນຊີ (4) ກະສິກຳຜະລິດແບບທຳມະຊາດ ເຊັ່ນ: ການປູກພືດຜັກແບບທຳມະຊາດ ຕົວ ຢ່າງ ໝາກລີ້ນໄມ້ ຜັກສະເມັກ…
ວັນສຸກອາທິດຜ່ານມາ ຜູ້ຂຽນໄດ້ມີໂອກາດເຂົ້າພົບທ່ານນາງ ພອນທິບ ສົມມະນີ ຫົວໜ້າພະແນກມາດຕະຖານ ກົມປູກຝັງ ກະຊວງກະສິກຳ ແລະ ປ່າໄມ້ ເພິ່ນໄດ້ໃຫ້ສຳພາດ ແລະ ຊີ້ແຈງຫຼາຍເຫດຜົນເຖິງແນວທາງນະໂຍບາຍວິທີເຮັດກະສິກຳອິນຊີ ແລະ ການກວດກາເພື່ອຜ່ານມາດຕະຖານຮອງຮັບຜົນຜະລິດ ຮັບປະກັນແກ່ຜູ້ບໍລະໂພກໃຫ້ປອດໄພຕໍ່ສຸຂະພາບ ເຊິ່ງປັດຈຸບັນນີ້ ທ່າອ່ຽງຂອງຜູ້ບໍລິໂພກໃນສັງຄົມສູງຂຶ້ນໃນການບໍລິໂພກພືດຜັກຈາກຜົນຜະລິດກະສິກຳອິນຊີ ຜູ້ຂຽນຖາມເພິ່ນວ່າ: ເວລາເປີດຕະຫຼາດກະສິກຳອິນຊີ ຖ້າວ່າພືດຜັກຫາກຖືກປົນມາກັບຜັກທີ່ໄດ້ມາດຕະຖານນັ້ນ ເຮົາຈະແກ້ໄຂແນວໃດ ? ເພິ່ນຕອບວ່ານັ້ນ ຄື: ບັນຫາການຄຸ້ມຄອງຂອງຕະຫຼາດໂດຍກົງ ເຊິ່ງທ່ານຜູ້ອ່ານ ຫຼື ຜູ້ບໍລິໂພກ ກໍສາມາດເຂົ້າໃຈໄດ້ໂລດທາງພະແນກມາດຕະຖານ ແມ່ນໄດ້ເຂັ້ມງວດກວດກາທຸກຂັ້ນຕອນ.
ພະແນກມາດຕະຖານຂອງກົມປູກຝັງຍັງມີສູນມາດຕະຖານກະສິກຳສະອາດ ທີ່ຊ່ວຍຊາວກະສິກອນໃນການປູກພືດຕ່າງໆ ເພື່ອຊ່ວຍໃຫ້ຊາວກະສິກອນມີຄວາມເຂັ້ມແຂງ ແລະ ເຂົ້າໃຈຈະແຈ້ງຕໍ່ວິທີການຜະລິດກະສິກຳອິນຊີ ການກວດກາຢັ້ງຢືນມາດຕະຖານ ແມ່ນໄດ້ອອກໃບຢັ້ງຢືນໄດ້ 2 ປີແລ້ວ ຜູ້ປະກອບການສາມາດຕໍ່ອາຍຸໄດ້ ຖ້າວ່າຫາກຍັງຮັກສາມາດຕະຖານໄດ້.
ການເຮັດກະສິກຳອິນຊີ ແມ່ນບ້ານເຮົາໄດ້ປະສານສົມທົບກັບນັກວິຊາການຕ່າງປະເທດ ບ້ານເຮົາຕ້ອງໄດ້ສ້າງມາດຕະຖານລະດັບອາຊຽນ ເພື່ອສ້າງຕະຫຼາດ ແລະ ໂອກາດໃຫ້ຜູ້ປະກອບການໄດ້ສົ່ງອອກຂາຍຕະຫຼາດຕ່າງປະເທດ ປັດຈຸບັນ ຜົນຜະລິດຈາກກະສິກຳອິນຊີ ແມ່ນມີບາງລາຍການກໍໄດ້ສົ່ງຂາຍຕະຫຼາດຕ່າງປະເທດແລ້ວ ເຊັ່ນ: ຊາ ແລະ ກາເຟ…ຖ້າວ່າສື່ມວນຊົນຊ່ວຍກັນເຜີຍແຜ່ຕື່ມໃຫ້ກວ້າງຂວາງ ບ້ານເຮົາກໍມີທ່າກ້າວໜ້າສູງຂຶ້ນ.