ລູກ ອາດຈະເກີດມາຈາກການແຕ່ງດອງທີ່ຖືກຕ້ອງ ຫຼື ບໍ່ຖືກຕ້ອງຕາມກົດໝາຍຂອງຜູ້ເປັນພໍ່ ແລະ ແມ່ ລູກອາດຈະເກີດກ່ອນການແຕ່ງດອງ ຫຼື ຫຼັງການແຕ່ງດອງ ເກີດມາຈາກຊາຍຊູ້ ແລະ ຍິງຊູ້ໄດ້ສົມສູ່ຢູ່ຮ່ວມກັນແບບສິດທິສ່ວນບຸກຄົນ ຄວາມຈິງສູ່ມື້ນີ້ໄວໜຸ່ມມັກຖືຄວາມຮັກເປັນໃຫຍ່ ກ່ອນການເຄົາລົບນ້ອບນ້ອມຕໍ່ພໍ່ແມ່ ພີ່ນ້ອງ ພໍ່ແມ່ບອກ ພໍ່ແມ່ສັ່ງສອນຍາກຈະເຊື່ອຟັງ ແຕ່ຖ້າແຟນບອກຊູ້ບອກຍາກປານໃດກໍຮັບກໍສູ້ ແມ່ນແຕ່ການແລກດ້ວຍຊີວິດແລກດ້ວຍຂອງຫວງຂອງແຫນກໍຍອມເຮັດຕາມ ໄປຕາມ ຫາກເຮັດຕາມໄປ ຕາມໃນທາງທີ່ດີ ມີປະໂຫຍດກໍບໍ່ມີວ່າຫຍັງແຕ່ຖ້າເຮັດຕາມ ໄປຕາມໃນສິ່ງທີ່ບໍ່ດີມັນ ຈະເປັນເລື່ອງ ເປັນຄວາມ ເມື່ອເກີດຖືພາຄາທ້ອງຂຶ້ນມາບາງຄູ່ກໍຍອມຮັບຮູ້ກັນດ້ວຍດີ ແຕ່ບາງຄູ່ຊ້ຳພັດຖືກຝ່າຍຊາຍປະຕິເສດແບບໜ້າຕາເສີຍໆ ວ່າບໍ່ແມ່ນລູກເຕົ້າເລົ່າ ກໍຂອງຕົນ ອັນນີ້ຄືບັນຫາຕາມມາ ຜູ້ທີ່ຮັບກຳກໍແມ່ນແມ່ ແມ່ນລູກ ຫຼື ຮ້າຍກວ່ານັ້ນ ແມ່ນເອົາລູກໄປຖີ້ມໄປປະ ດັ່ງນັ້ນ ກົດໝາຍຈຶ່ງຕ້ອງໄດ້ກຳນົດມາດຕະການໃນການປົກປ້ອງສິດ ແລະ ຜົນປະໂຫຍດຂອງເດັກນັ້ນ ຄືການຮັບຮູ້ການເປັນພໍ່.
ການຮັບຮູ້ການເປັນພໍ່ ຈະເຮັດຂຶ້ນໄດ້ໃນ ກໍລະນີທີ່ລູກຫາກເກີດຈາກພໍ່ ແມ່ທີ່ບໍ່ໄດ້ແຕ່ງດອງນຳກັນ ເມື່ອມີການຮັບຮູ້ການເປັນພໍ່ ສາຍພົວພັນພໍ່ລູກເກີດຂຶ້ນນັບແຕ່ເວລາເດັກເກີດ ຕົວຢ່າງ ທ້າວ ເປີດ ໄດ້ມັກຮັກກັບ ນາງ ຈອດ ແລະ ໄດ້ຫຼັບນອນ ຫຼື ໄດ້ຮ່ວມປະເວນີກັນຫຼາຍຄັ້ງ ຕໍ່ມານາງໄດ້ຖືພາຄາທ້ອງຍ້ອນຄວາມຮູ້ເທົ່າບໍ່ເຖິງການ ເມື່ອເປັນເຊັ່ນນັ້ນ ທ້າວ ເປີດ ຈຶ່ງປະຕິເສດວ່າເດັກທີ່ຢູ່ໃນທ້ອງຂອງນາງ ຈອດ ບໍ່ແມ່ນລູກຕົນ.
ການຮັບຮູ້ການເປັນພໍ່ດ້ວຍຄວາມສະໝັກໃຈຕ້ອງໃຫ້ຜູ້ເປັນພໍ່ ແມ່ຂອງເດັກຍື່ນຄຳຮ້ອງຮ່ວມກັນຕໍ່ອົງການທະບຽນຄອບຄົວເມືອງ ເທສະບານ ນະຄອນ ຊຶ່ງໃນຄຳຮ້ອງນັ້ນ ພໍ່ຂອງເດັກໄດ້ຮັບຮູ້ວ່າຕົນເປັນພໍ່ ແລະ ແມ່ກໍເຫັນດີນຳຄຳຮ້ອງນັ້ນ ຖ້າແມ່ຫາກເສຍຊີວິດແລ້ວ ການຮັບຮູ້ການເປັນພໍ່ນັ້ນຈະເຮັດຄຳຮ້ອງແຕ່ຝ່າຍດຽວກໍໄດ້.
ໃນກໍລະນີທີ່ເດັກຫາກພົ້ນກະສຽນອາຍຸແລ້ວ ການຮັບຮູ້ການເປັນພໍ່ຈະເຮັດຂຶ້ນໄດ້ ກໍຕໍ່ເມື່ອຫາກມີຄວາມເຫັນດີຂອງເດັກເທົ່ານັ້ນ ການທີ່ພໍ່ແມ່ເດັກໄດ້ແຕ່ງດອງກັບຜູ້ຍິງຄົນອື່ນແລ້ວນັ້ນ ບໍ່ໃຫ້ເປັນອຸປະສັກຕໍ່ການຮັບຮູ້ການເປັນພໍ່ແຕ່ຢ່າງໃດ ເມື່ອຜູ້ເປັນພໍ່ຫາກຮັບຮູ້ວ່າຕົນເປັນພໍ່ຂອງເດັກແລ້ວ ຜູ້ເປັນແມ່ ຜູ້ປົກຄອງເດັກ ຫຼື ເດັກທີ່ພົ້ນກະສຽນອາຍຸແລ້ວ ກໍມີສິດເຮັດຄຳຮ້ອງເຊັ່ນດຽວກັນ ເພື່ອໃຫ້ສານພິຈາລະນາຕັດສີນໃຫ້ຮັບຮູ້ການເປັນພໍ່.
ສານຈະຕັດສີນໃຫ້ຮັບຮູ້ການເປັນພໍ່ໄດ້ ກໍຕໍ່ເມື່ອຫາກມີກໍລະນີດັ່ງນີ້: 1. ການຢູ່ຮ່ວມກັນ ແລະ ການສ້າງເສດຖະກິດລວມລະຫວ່າງແມ່ຂອງເດັກກັບຜູ້ຈະຮັບຮູ້ການເປັນພໍ່ກ່ອນເດັກເກີດ 2. ການເອົາໃຈໃສ່ເບິ່ງແຍງລ້ຽງດູລູກ ຫຼື ການສຶກສາອົບຮົມລູກຮ່ວມກັນ 3. ມີຫຼັກຖານຢັ້ງຢືນວ່າຜູ້ກ່ຽວເປັນພໍ່ ເຊັ່ນ: ຫຼັກຖານທາງດ້ານວິທະຍາສາດການແພດ ໂດຍສະເພາະແມ່ນເລືອດ.
ເມື່ອຜູ້ເປັນຜົວຫາກສາມາດພິສູດໄດ້ວ່າ ເດັກບໍ່ແມ່ນລູກຂອງຕົນ ກໍມີສິດຮ້ອງຟ້ອງຕໍ່ສານ ເພື່ອປະຕິເສດຄວາມເປັນພໍ່ ການຮ້ອງຟອ້ງເພື່ອປະຕິເສດການເປັນພໍ່ໃຫ້ດຳເນີນພາຍໃນໄລຍະເວລາ 1 ປີ ນັບແຕ່ວັນເດັກເກີດ ສັງລວມແລ້ວການກຳນົດບັນຫາດັ່ງກ່າວ ຈຸດປະສົງຫຼັກກໍແມ່ນເພື່ອປົກປ້ອງສິດ ແລະ ຜົນປະໂຫຍດຂອງເດັກ ການປົກປ້ອງເດັກເພື່ອບໍ່ໃຫ້ຕົກເປັນເຫຍື່ອຂອງກຸ່ມຄົນບໍ່ດີ ເປັນການປ້ອງກັນ ແລະ ສະກັດກັ້ນບັນຫາການຕົກຢູ່ໃນສະພາບເດັກກຳພ້າ ກຳພອຍ ແຕ່ພໍ່ແມ່ຍັງໝົດ.
ໂດຍ: ໄມ້ງັດ