ໃນແຕ່ລະປີ ບໍລິສັດຣາຊ-ລາວ ບໍລິການ ຈຳກັດ ໄດ້ຈັດກິດຈະກຳທັດສະນະສຶກສາສະ ຖານທີ່ທ່ອງທ່ຽວທັງພາຍໃນ ແລະ ຕ່າງປະເທດໃຫ້ກັບສື່ມວນຊົນລາວ ສະເພາະປີ 2020 ເປັນໄລຍະທີ່ເຝົ້າລະວັງການແຜ່ລະບາດຈາກເຊື້ອພະຍາດ COVID -19 ບໍລິສັດຈຶ່ງໄດ້ຈັດກິດຈະກຳ ທັດສະນະສຶກສາສະຖານທີ່ທ່ອງ ທ່ຽວຢູ່ແຂວງຈຳປາສັກ ສະ ຫວັນນະເຂດ ຄຳມ່ວນ ແລະ ແຂວງບໍລິຄຳໄຊ ໃຫ້ກັບສື່ສິ່ງ ພິມໜັງສືພິມວຽງຈັນໃໝ່ ແລະ ໜັງສືພິມເສດຖະກິດ-ສັງຄົມ ລະຫວ່າງວັນ 28 ຕຸລາ ຫາວັນທີ 1 ພະຈິກ 2020 ໂດຍການ ນຳພາຂອງ ທ່ານ ນາລົງວິດ ຄອງສິນ ຜູ້ຈັດການອົງກອນສຳ ພັນ ບໍລິສັດ ຣາຊ-ລາວ ບໍລິການ ຈຳກັດ ມີຈຸດປະສົງເພື່ອຊຸກຍູ້ສົ່ງເສີມລາວທ່ຽວລາວ ເປັນການ ຟື້ນຟູ ແລະ ກະຕຸ້ນການທ່ອງ ທ່ຽວໃຫ້ມີຄວາມຄຶກຄື້ນ ຫຼັງຈາກທີ່ໄດ້ຮັບຜົນກະທົບຈາກການລະບາດເຊື້ອພະຍາດ COVID-19.
ການທ່ອງທ່ຽວຄັ້ງນີ້ໄດ້ເລີ່ມ ອອກເດີນທາງຈາກນະຄອນ ຫຼວງວຽງຈັນ ແຕ່ເວລາ 6:30 ໂມງ ຂອງວັນທີ 28 ຕຸລາ 2020 ໂດຍເດີນທາງໄປຕາມເສັ້ນທາງເລກທີ 13 ໃຕ້ ເຊິ່ງຕະຫຼອດໄລ ຍະຂອງການເດີນທາງໄດ້ເຫັນ ແລະ ສຳຜັດກັບທິວທັດທຳມະ ຊາດທີ່ສວຍງາມຂອງສອງຟາກ ທາງທີ່ເຕັມໄປດ້ວຍຄວາມອຸດົມ ສົມບູນ ແລະ ມີອາກາດໂປດໂປ່ງ ພ້ອມນັ້ນ ຍັງໄດ້ແວ່ຊື້ຜົນລະປູກຂອງປະຊາຊົນທີ່ຂາຍລຽບຕາມທາງ ກ່ອນໄດ້ເດີນ ທາງຮອດນະຄອນປາກເຊ ໃນເວລາ 20:00 ໂມງ ເຖິງແມ່ນວ່າເສັ້ນທາງຂ້ອນຂ້າງໄກ ແຕ່ດ້ວຍທິວທັດຂອງສອງຟາກທາງແລະ ບັນຍາກາດຂອງການເດີນທາງ ເຮັດໃຫ້ບໍ່ຮູ້ສຶກອິດເມື່ອຍແຕ່ຢ່າງໃດ ໂດຍໄດ້ພັກແຮມຄືນທີ່ນະຄອນປາກເຊ ຕໍ່ມາໃນຕອນເຊົ້າຂອງວັນທີ 29 ຕຸລາ ທີມງາມສື່ມວນຊົນໄດ້ເດີນທາງອອກຈາກນະຄອນປາກເຊ ເວ ລາ 7:30 ໂມງ ໂດຍຂີ່ລົດເລາະອ້ອມຮອບທ່ຽວຊົມເທສະບານເມືອງປາກເຊ ກ່ອນສືບຕໍ່ເດີນ ທາງໄປຕາມເສັ້ນທາງບ້ານເວີນຄາມ-ໜອງນົກຂຽນ-ຫ້ວຍແມ່ສັງທີ່ມີໄລຍະທາງ 145 ກິໂລ ແມັດ ຈຶ່ງໄປຮອດທ່າເຮືອເພື່ອຂີ່ເຮືອຂ້າມບ້ານນາກະສັງ ເມືອງໂຂງ ແຂວງຈຳປາສັກ ຈາກນັ້ນ ກໍປ່ຽນຮູບແບບຂອງການເດີນ ທາງຈາກເດີນທາງດ້ວຍລົດ ກໍເດີນທາງດ້ວຍເຮືອ ເພື່ອຂ້າມໄປ ອີກປາຍທາງ ນັ້ນກໍຄື ດອນ ຄອນ-ດອນເດດ ຕະຫຼອດໄລຍະເສັ້ນທາງແມ່ນສຳຜັດໄດ້ເຖິງວິຖີຊີວິດຂອງປະຊາຊົນຢູ່ດອນດັ່ງກ່າວ ພິເສດ ແມ່ນໄດ້ແວ່ຢ້ຽມຢາມຖາມໄຖ່ປະຊາຊົນບ້ານດອນຊົມ ທີ່ເປັນທາງຜ່ານໄປຫາດອນເດດ-ດອນຄອນ ໃນນີ້ ມີສະຖານທີ່ທ່ອງທ່ຽວທາງທຳມະຊາດທີ່ຍັງບໍ່ທັນໄດ້ຮັບການພັດ ທະນາເທົ່າທີ່ຄວນ ປະກອບມີ ເຂື່ອນໄຟຟ້ານ້ຳຢອດ ເຫວຄອນ ລາດ ເຫວຊ້າງເຜືອກ ທີ່ມີລີງ ອາໄສຢູ່ປະມານ 70-80 ໂຕ ຈາກນັ້ນ ກໍໄດ້ພາກັນໄປກາບ ໄຫວ້ສັກກາລະບູຊາພະພຸດທະຮູບ ແລະ ຖວາຍເຄື່ອງສັງຄະ ທານທີ່ວັດບ້ານດັ່ງກ່າວ ພາຍ ຫຼັງສຳເລັດການເຮັດບຸນທີ່ບ້ານດອນຊົມແລ້ວ ກໍໄດ້ອອກເດີນ ທາງດ້ວຍເຮືອ ໂດຍໃຊ້ເວລາ 20 ນາທີ ກໍເດີນທາງຮອດດອນເດດ-ດອນຄອນ ພໍແຕ່ເດີນທາງໄປເຖິງ ທາງທີມງານກໍອົດການໄປສຳຜັດບັນຍາກາດອ້ອມຮອບດອນບໍ່ໄດ້ ຈຶ່ງໄດ້ເຊົ່າລົດຖີບເພື່ອຂີ່ເລາະອ້ອມຮອບບໍລິເວນບ້ານດັ່ງກ່າວ ເປັນຕົ້ນ ປັ່ນໄຕ່ຂົວຂ້າມນ້ຳຂອງ ແລະ ຊົມຫົວລົດໄຟເກົ່າ ທີ່ຝຣັ່ງໄດ້ສ້າງໄວ້ໃນສະໄໝເຂົ້າມາຮຸກຮານລາວ.
ຈາກນັ້ນໃນຕອນເຊົ້າຂອງວັນທີ 30 ຕຸລາ ພໍແຕ່ຄະນະໄດ້ຮັບປະທານອາຫານເຊົ້າຢ່າງເຕັມທີ່ ຜູ້ຮັບຜິດຊອບກໍໄດ້ເຊົ່າລົດບໍລິ ການທ່ອງທ່ຽວໄປທ່ຽວຊົມສະ ຖານທີ່ທ່ອງທ່ຽວທຳມະຊາດຕາດສົມພະມິດ ຫຼື ຫຼີຜີ ເປັນອີກສະຖານທີ່ທ່ອງທ່ຽວທີ່ສວຍສົດງົດງາມກາຍເປັນສະຖານທີ່ທ່ອງທ່ຽວຂຶ້ນຊື່ລືນາມຂອງບ້ານຄອນ ເມືອງໂຂງ ແຂວງຈຳປາສັກ.
ພາຍຫຼັງທີ່ໄດ້ສຳຜັດກັບນ້ຳຕົກ ຕາດທຳມະຊາດຫຼີ່ຜີແລ້ວ ເພື່ອເຮັດໃຫ້ການທ່ອງທ່ຽວຄັ້ງນີ້ມີຫຼາຍສີສັນ ທາງຄະນະກໍເດີນ ທາງໄປສູ່ວັດພູຈຳປາສັກ ໂດຍເດີນທາງໄປຕາມເສັ້ນທາງ AH 11 ມາຮອດບ້ານຫຼັກ 30 ລ້ຽວຊ້າຍເຂົ້າໄປປະມານ 100 ກວ່າກິໂລກໍຈະເຖິງວັດພູ ແຕ່ໄລຍະການເດີນທາງນີ້ໄດ້ເຫັນເຖິງສະ ຖານທີ່ປັດຕະຍະກຳຂອງວັດວາ ອາຮາມທີ່ຕັ້ງຢູ່ຕາມແຕ່ລະບ້ານ ໂດຍມີໂຄງແບບການກໍ່ສ້າງດ້ານຮູບຊົງທີ່ແຕກຕ່າງກັນໄປພ້ອມນັ້ນ ຍັງໄດ້ເຫັນການດຳ ລົງຊີວິດຂອງປະຊາຊົນ ເມື່ອເດີນທາງໄປເຖິງບ້ານມ່ວງ ທີ່ເປັນຈຸດຂ້າມບັກ ອັນເປັນທີ່ຮູ້ຈັກ ກັນດີຂອງອາຫານທ້ອງຖິ່ນທີ່ຂຶ້ນຊື່ນັ້ນ ກໍຄື ກ້ອຍປາ ໂດຍໃຊ້ເວລາຂ້າມບັກປະມານ 15-20 ນາທີ ກໍໄປເຖິງທ່າບັກອີກຟາກ ແລະ ຈາກທ່າບັກຂຶ້ນໄປປະມານ 13 ກິໂລກໍຈະຮອດວັດພູຈຳປາສັກ ພາຍຫຼັງທີ່ເດີນທາງຮອດຈຸດໝາຍປາຍທາງດັ່ງກ່າວກໍໄດ້ພັກແຮມຢູ່ບ້ານຫົວປາຄໍ່ ເຊິ່ງເປັນອີກບ້ານໜຶ່ງທີ່ຕັ້ງຢູ່ລຽບຕາມແຄມຂອງ ແລະ ອ້ອມຮອບດ້ວຍພູຜາປ່າໄມ້ຂຽວງາມ ພິເສດ ໃນຕອນເຊົ້າເລີ່ມແຕ່ເວ ລາ 5:30-7:00 ໂມງ ຈະເຫັນປະຊາຊົນຂີ່ເຮືອເລາະຢາມລອບຕາມແຄມນ້ຳຂອງ ແລະ ເບິ່ງຕາເວັນຂຶ້ນໃນຕອນເຊົ້າ ໂດຍມີສີສັນທີ່ສວຍງາມ ແຕ່ກໍໜ້າເສຍດາຍການສຳຜັດເຖິງວິຖີຊີວິດຂອງປະຊາຊົນບ້ານດັ່ງກ່າວແມ່ນເວລາໜ້ອຍເກີນໄປ ເພາະທາງຄະນະມີອີກຫຼາຍສະຖານທີ່ຕ້ອງໄປສຳຜັດ ໃນຕອນເຊົ້າຂອງວັນດຽວກັນ ຄະນະໄດ້ເດີນທາງອອກຈາກບ້ານດັ່ງກ່າວໃຊ້ເວລາ 30 ນາທີ ຈຶ່ງໄປຮອດສະຖານທີ່ທ່ອງທ່ຽວວັດພູສ່າເຫຼົ້າ ວັດນີ້ໄດ້ມີພະພຸດທະຮູບໃຫຍ່ອົງໜຶ່ງ ແລະ ພະພຸດທະຮູບອົງນ້ອຍລຽນເປັນແຖວ ເປັນຊັ້ນ ເກືອບພັນອົງ ທີ່ເປັນສະຖານທີ່ສັກສິດອີກແຫ່ງໜຶ່ງທີ່ຫຼາຍຄົນໄດ້ໃຫ້ການເຄົາລົບ ແລະ ບູຊາ ສຳຄັນອີກແຫ່ງໜຶ່ງເມື່ອຂຶ້ນໄປຈຸດດັ່ງກ່າວເວລາຈະແນມລົງມາຈາກຈອມພູຈະເຫັນທິວທັດຂອງນະຄອນປາກເຊ ພາຍຫຼັງອອກຈາກສະຖານທີ່ທ່ອງທ່ຽວແຫ່ງນີ້ກໍໄດ້ຂີ່ລົດມາຕາມເສັ້ນ ທາງເລກທີ 13 ໃຕ້ ໃຊ້ເວລາປະ ມານ 3 ຊົ່ວໂມງ ຄະນະກໍໄດ້ແວ່ກາບໄຫວ້ພະທາດໂຜ່ນ ຢູ່ບ້ານໂພນທາດ ເມືອງໄຊພູທອງ ແຂວງສະຫວັນນະເຂດ ແລະ ໄດ້ເດີນທາງອອກຈາກວັດພະທາດໂຜ່ນ ຈາກນັ້ນ ໄດ້ເດີນທາງມາຮອດແຂວງຄຳມ່ວນໃນຕອນຄ່ຳ ແລະ ໄດ້ພັກແຮມຄືນທີ່ແຂວງຄຳມ່ວນ ພໍມາຮອດແຂວງນີ້ຖືວ່າເປັນໂອກາດອັນດີໄດ້ສຳຜັດເຖິງຮີດຄອງປະເພນີ້ທີ່ຊາວເມືອງທ່າແຂກ ແຂວງຄຳມ່ວນປະຕິບັດມາໄດ້ຫຼາຍກວ່າ 10 ປີນັ້ນ ກໍຄືປະເພນີລອຍກະໂທງ ໃນ ວັນມື້ຂຶ້ນ 15 ຄ່ຳ ເດືອນ 12 ລາວ ໂດຍມີມວນຊົນເຂົ້າຮ່ວມເປັນຈຳນວນຫຼວງຫຼາຍ ແລະ ໃນຕອນເຊົ້າຂອງວັນທີ 1 ພະຈິກ ກ່ອນຈະເດີນທາງກັບສູ່ນະຄອນ ຫຼວງວຽງຈັນ ທາງຄະນະກໍໄດ້ເດີນທາງໄປກາບໄຫວ້ພະທາດສີໂຄດຕະບອງ ເຊິ່ງເປັນອີກສະ ຖານທີ່ທ່ອງທ່ຽວທາງດ້ານວັດ ທະນະທຳອັນເປັນທີ່ຮູ້ຈັກກັນດີຂອງແຂວງຄຳມ່ວນ ທີ່ຕັ້ງຕິດແຄມນ້ຳຂອງມີທິວທັດທີ່ສວຍງາມ ແລະ ອາກາດປອດໂປ່ງ ແລະ ກໍໄດ້ພ້ອມກັນແວ່ທ່ຽວຊົມສະຖານທີ່ທ່ອງທ່ຽວວັດທ່າໂພນສັນ ເມືອງທ່າພະບາດ ແຂວງບໍລິຄຳໄຊ ຕື່ມອີກ.
ເຖິງຢ່າງໃດກໍຕາມ ຕະຫຼອດໄລຍະການທ່ອງທ່ຽວ 5 ມື້ 4 ຄືນ ໃນສາມແຂວງທີ່ບໍລິສັດ ຣາຊ-ລາວ ບໍລິການ ຈຳກັດ ໄດ້ຈັດ ກິດຈະກຳທ່ອງທ່ຽວໃຫ້ກັບສື່ສິ່ງພິມ 2 ສຳນັກຄັ້ງນີ້ ເປັນກິດ ຈະກຳທີ່ດີທີ່ສຸດ ເຊິ່ງໄດ້ສ້າງຄວາມສາມັກຄີຮັກແພງໃຫ້ການຊ່ວຍເຫຼືອເຊິ່ງກັນ ແລະ ກັນ ລະຫວ່າງສື່ມວນຊົນ ແລະ ບໍລິສັດ ດັ່ງກ່າວໃຫ້ມີຄວາມແໜ້ນແຟ້ນ ຍິ່ງໆຂຶ້ນ ພ້ອມນັ້ນ ຍັງເປັນການປະກອບສ່ວນຊຸກຍູ້ສົ່ງເສີມກິດຈະກຳລາວທ່ຽວລາວໃຫ້ມີຄວາມຄຶກຄື້ນຕື່ມອີກ ໂດຍສະ ເພາະ ຜູ້ຂຽນເອງຂໍສະແດງຄວາມຂອບໃຈທີ່ບໍລິສັດໄດ້ໃຫ້ ຄວາມສຳຄັນ ແລະ ສະໜັບສະໜູນການທ່ອງທ່ຽວຄັ້ງນີ້ ເຊິ່ງຜ່ານການທັດສະນະທ່ອງທ່ຽວເຫັນວ່າປະເທດລາວ ຍັງເປັນປະເທດທີ່ມີຄວາມອຸດົມສົມບູນມີສະຖານທີ່ທ່ອງທ່ຽວປະຫວັດສາດ ທຳມະຊາດຫຼາຍແຫ່ງທີ່ ຕິດພັນກັບວິຖີການດຳລົງຊີວິດ ຂອງປະຊາຊົນບັນດາເຜົ່າ ກາຍ ເປັນທ່າແຮງບົ່ມຊ້ອນດຶງດູດນັກທ່ອງທ່ຽວເຂົ້າມາທ່ຽວປະເທດລາວ ໃຫ້ນັບມື້ນັບຫຼາຍຂຶ້ນ.