ສອງເລື່ອງອ່າວແປກຈາກ ບັງກະລາເທດ ແລະ ມາເລເຊຍ ທີ່ເລືອກສັນກັ່ນຕອງເອົາມາສະເໜີໃນວັນນີ້ນັ້ນ ເປັນເລື່ອງເກົ່າທີ່ເຄີຍເລົ່າມາແລ້ວ ແຕ່ຕ້ອງການໃຫ້ຜູ້ອ່ານຮູ້ຕື່ມເພື່ອເປັນອຸທາຫອນສອນໃຈວ່າ ການຕົ້ມຕົວະຫຼອກລວງນັ້ນເດັດຂາດຈະບໍ່ລອດມືກົດໝາຍໄປໄດ້ ເຊັ່ນ:
ທີ່ ບັງກະລາເທດ: ກ່ອນໜ້ານີ້ 3 ປີ ຂ່າວຕ່າງປະເທດໃນຕົ້ນເດືອນກຸມພາ 2017 ໄດ້ສະເໜີເລື່ອງແປກໆທີ່ເຮັດໃຫ້ສັງຄົມບັງກະລາເທດ ແຕກຕື່ນຫຼາຍພໍສົມຄວນ ຂ່າວບອກວ່າ: ມີຄົນໃນຄອບຄົວໜຶ່ງໄດ້ໃຊ້ກົນອຸບາຍຫຼອກລວງວ່າ ຕົນເປັນຄົນວິເສດວິໂສ ສາມາດປ່ຽນເພດລູກສາວຂອງຕົນ ໃຫ້ເປັນເພດຊາຍໄດ້.
ຢູ່ບັນດາປະເທດອາຊີໃຕ້ (ອິນເດຍ ບັງກະລາເທດ ປາກິດສະຖານ ເນປານ…) ນັ້ນ ເພດຊາຍເປັນເພດທີ່ນິຍົມຊົມຊອບຂອງຄອບຄົວ ເພາະຖືວ່າເພດຊາຍນັ້ນແຂງແຮງ ເປັນທີ່ເພິ່ງພາຂອງຄອບຄົວໄດ້ ຄອບຄົວໃດມີລູກເປັນເພດຍິງທັງໝົດ ກໍຖືວ່າຊວຍ ຍ້ອນຄ່ານິຍົມດັ່ງກ່າວນີ້ເອງ ຈຶ່ງມີພວກຫົວໃສໃຈຄົດຄືໃນຂ່າວທີ່ອ້າງຕົນວ່າເປັນຜູ້ມີລິດມີເດດ ສາມາດປ່ຽນເພດຍິງໃຫ້ເປັນເພດຊາຍໄດ້.
ຂ່າວໄດ້ໃຫ້ລາຍລະອຽດວ່າ: ຄົນໃນຄອບຄົວທີ່ກໍ່ເລື່ອງນັ້ນໄດ້ອ້າງວ່າ ຕົນສາມາດປ່ຽນເພດລູກສາວໄວ 16 ປີ ໃນຄອບຄົວໃຫ້ເປັນເພດຊາຍ ໄດ້ເປັນທີ່ຮຽບຮ້ອຍແລ້ວ ຂໍ້ອ້າງດັ່ງກ່າວໄດ້ດຶງ ດູດຄວາມສົນໃຈຂອງຄົນທີ່ຕ້ອງການປ່ຽນເພດເປັນຈຳນວນຫຼວງຫຼາຍ ແຕ່ເຈົ້າໜ້າທີ່ຕຳຫຼວດ ນັ້ນບໍ່ຫຼົງກົນລວງດັ່ງກ່າວ ຈຶ່ງໄດ້ເອົາລູກສາວ ທີ່ຄອບຄົວອ້າງວ່າ ໄດ້ປ່ຽນເພດເປັນຜູ້ຊາຍແລ້ວ ໄປພິສູດຕົວຈິງຢູ່ໂຮງໝໍແຫ່ງໜຶ່ງ ແລ້ວຄວາມ ຈິງກໍແຈ້ງຈ່າງປ່າງປານກາງເວັນ ອະໄວຍະວະ ເພດຊາຍທີ່ສາວຄົນນັ້ນໃຊ້ຫຼອກໃຫ້ຄົນທັງຫຼາຍເຊື່ອນັ້ນ ທີ່ຈິງກໍແມ່ນຂອງປອມ ຕາມແຜນແລ້ວ ຖ້າບໍ່ຖືກເຈົ້າໜ້າທີ່ຈັບກຸມກ່ອນ ສາວທີ່ອ້າງຕົນວ່າມີຜູ້ວິເສດມາປ່ຽນເພດໃຫ້ເປັນເພດຊາຍ ກໍຈະເຮັດໜ້າທີ່ຫຼອກລວງຕົ້ມຕົວະສັງຄົມວ່າຕົນ ເປັນຜູ້ວິເສດວິໂສ ສາມາດປ່ຽນເພດໃຫ້ຄົນອື່ນ ສາມາດປິ່ນປົວພະຍາດບາດເຍົາທຸກຊະນິດ ເພາະຕົນໄດ້ກາຍເປັນຄົນວິເສດແລ້ວ.
ທີ່ ມາເລເຊຍ: ຄົງຊາບກັນດີຢູ່ແລ້ວວ່າ ມາ ເລເຊຍ ເປັນປະເທດໜຶ່ງທີ່ມັ່ງຄັ່ງຮັ່ງມີ ເປັນປະ ເທດໜຶ່ງທີ່ຢືນຢູ່ແຖວໜ້າຂອງອາຊຽນດ້ານ ການພັດທະນາທາງການຂອງປະເທດນີ້ມີເປົ້າໝາຍສ້າງມາເລເຊຍໃຫ້ເປັນປະເທດພັດທະນາ ຢ່າງເຕັມຮູບແບບ ພາຍໃນປີ 2030
ແນວໃດກໍດີ ຖ້າເວົ້າເຖິງການເຊື່ອຖືງົມງວາຍ -ເຊື່ອໝໍຜີ ໝໍເຢົາແລ້ວ ຄົນມາເລເຊຍຈຳນວນ ໜຶ່ງກໍຍັງໃຫ້ຄວາມສຳຄັນຢູ່ ດັ່ງຂ່າວທີ່ໜັງສືພິມ The Nation ສະບັບວັນທີ 31 ທັນວາ 2016 ໄດ້ບອກວ່າ: ມີຊາຍມາເລເຊຍ ອາຍຸ 40 ປີ ຄົນໜຶ່ງ ຖືກໝໍຜີຕົ້ມຈົນເປື່ອຍເຖິງຂັ້ນໄດ້ສົ່ງເລື່ອງຮ້ອງຟ້ອງຂຶ້ນເຖິງສານ ເພື່ອໃຫ້ໝໍຜີທົດແທນຄ່າເສຍຫາຍ.
ເລື່ອງມີຢູ່ວ່າ: ພໍ່ຂອງຊາຍ ອາຍຸ 40 ປີ ໄດ້ລົ້ມປ່ວຍລົງຢ່າງໜັກ ແລ້ວມີໝໍຜີຄົນໜຶ່ງ ເຊິ່ງໃນພາສາມາເລເຊຍເອີ້ນວ່າ ໂບໂມ (Bomoh) ໄດ້ອ້າງວ່າ ຕົນຮູ້ສາເຫດຂອງການເຈັບປ່ວຍ ແລະ ສາມາດປິ່ນປົວຜູ້ເຈັບໃຫ້ຫາຍໄດ້ ໝໍຜີບອກວ່າ: ຜູ້ປ່ວຍຖືກວິນຍານຮ້າຍ 9 ໂຕເຂົ້າສິງ ຊາຍອາຍຸ 40 ປີ ທີ່ເປັນລູກຊາຍຂອງຜູ້ປ່ວຍເຊື່ອວ່າ ໝໍຜີຄົນນັ້ນຈະສາມາດຂັບໄລ່ວິນຍານຮ້າຍທັງ 9 ອອກຈາກຮ່າງຄີງຂອງຜູ້ເປັນພໍ່ ຈຶ່ງຮີບຈົກເງິນ ຈຳນວນ 810 ຣິງກິດ (ກວ່າ 200 ໂດລາ ສະຫະລັດ) ຈ່າຍເປັນຄ່າປິ່ນປົວລ່ວງໜ້າ ແຕ່ເລື່ອງຂອງເລື່ອງກໍມີຢູ່ວ່າ ຜູ້ປ່ວຍແຮ່ງມີອາການໜັກຂຶ້ນ ແລະ ເສຍຊີວິດໃນທີ່ສຸດ ເມື່ອເປັນແນວນີ້ ຝ່າຍລູກຊາຍກໍເລີຍນຳເລື່ອງຂຶ້ນເຖິງສານ ແຕ່ສານກໍຊ່ວຍຫຍັງບໍ່ໄດ້ ເພາະການປິ່ນປົວທາງໄສຍະສາດນັ້ນເປັນເລື່ອງສ່ວນຕົວ ແລະ ໝໍຜີກໍບໍ່ໄດ້ຈົດທະບຽນກັບທາງການ ເປັນອັນວ່າ ຊາຍຜູ້ເປັນລູກນັ້ນທັງເຈັບ ທັງເໝັນ ຍ້ອນຄວາມເຊື່ອງົມງວາຍ.