ຄໍລຳຂອງພວກເຮົາໄດ້ລົງພິມຂໍ້ຕົກລົງ ວ່າດ້ວຍການຄວບຄຸມສຽງເນືອງນັນ ຢູ່ນະຄອນຫຼວງວຽງຈັນ ເລກທີ 620/ຈນວ ລົງວັນທີ 29 ກັນຍາ 2020 ທີ່ລົງນາມໂດຍທ່ານເຈົ້າຄອງແລ້ວ ໃນສະບັບວັນສຸກ ທີ 9 ຕຸລາຜ່ານມາ.
ແຕ່ຍັງມີເພື່ອນຜູ້ອ່ານສ່ອງແສງເຂົ້າມາວ່າ: ການຈັດຕັ້ງປະຕິບັດຍັງບໍ່ທັນຖືກປະຕິບັດ…ການຈັດ ຕັ້ງເຜີຍແຜ່ເຊື່ອມຊຶມຍັງບໍ່ທັນເຮັດຢ່າງກວ້າງຂວາງ ສະແດງອອກບາງເມືອງ ບາງບ້ານ ເຈົ້າໜ້າທີ່ຍັງບໍ່ຮູ້ວ່າມີຂໍ້ຕົກລົງນີ້ອອກມາ.
ເມື່ອເປັນເຊັ່ນນັ້ນ ພວກມັກມ່ວນເກີນເຫດ ພວກຫູໜວກກິນຟານທັງຫຼາຍກໍບໍ່ສົນໃຈ ເປີດເພງຖ້ວມບ້ານຖ້ວມເມືອງ…ບາງລາຍກໍເສບງັນໝົດຄືນຊອດແຈ້ງ…ພວກຂັບລົດເປີດເພງບໍ່ລົດລະພໍໜ້ອຍແຮ່ງຂຶ້ນໃຈເປີດແວ່ນລົດປ່ອຍສຽງເພງອອກເນືອງນັນທົ່ວຖະໜົນ…ແຕ່ບໍ່ດົນດອກເພື່ອນຜູ້ອ່ານເອີຍ ! ພວກເຂົາຕ້ອງຖືກຕັກເຕືອນ ແລະ ລົງໂທດຕາມລະບຽບການວາງອອກ.
ແຕ່ໃນຍາມນີ້ຕ້ອງໄດ້ຊ່ວຍກັນອະທິບາຍ ແລະ ບອກກ່າວປ່າວເຕືອນວ່າ ມີລະບຽບການອອກມາແລ້ວ ! ທຸກຄົນຕ້ອງໄດ້ປະຕິບັດເນີ ! ເພາະວ່າການດຳລົງຊີວິດທີ່ສີວິໄລຕ້ອງແມ່ນຢູ່ພາຍໃຕ້ລະບຽບກົດໝາຍບ້ານເມືອງ.
ບັນດາການຈັດຕັ້ງ ໂດຍສະເພາະ ແມ່ນຫ້ອງການປົກຄອງເມືອງອ້ອມຂ້າງນະຄອນຫຼວງ ຕ້ອງໄດ້ເປັນເຈົ້າການຮຽກເຊີນອຳນາດການປົກຄອງບ້ານເຂົ້າມາ ແລ້ວແຈ້ງໃຫ້ພວກເພິ່ນຮູ້ຂໍ້ຕົກລົງ ເລກທີ 620/ຈນວ ລົງວັນທີ 29 ກັນຍາ 2020 ຢ່າງລະອຽດຖີ່ຖ້ວນ ທັງແນະນຳໃຫ້ພວກເພິ່ນໄປເຜີຍແຜ່ໃຫ້ລູກບ້ານຂອງເພິ່ນຮັບຊາບຢ່າງຮີບດ່ວນ ເພາະຈາກນີ້ໄປໃຜລະເມີດຈະຖືກຕັກເຕືອນຈາກບຸກຄົນອ້ອມຂ້າງທີ່ໄດ້ຮັບຜົນກະທົບ ຫາກດື້ດ້ານຈະມີການຟ້ອງຮ້ອງ ຂຶ້ນຫ້ອງການບ້ານແລ້ວນາຍບ້ານຈະປວດຫົວ.
ຜູ້ໄດ້ຮັບຜົນສະທ້ອນຈາກສຽງເນືອງນັນທັງຫຼາຍກໍຄວນໃຈເຢັນ ມີສະຕິ ລາຍງານການຈັດຕັ້ງບ້ານເນີ ! ບໍ່ແມ່ນຢາກຮ້າຍແລ້ວແກວ່ງກ້ອນຫີນໃສ່ວົງເສບແລ້ວມັນຊິເປັນເລື່ອງໃໝ່…
ຂໍຮຽກຮ້ອງໃຫ້ທຸກຄົນຈົ່ງປະຖິ້ມການບັນເທີງທີ່ກະທົບຜູ້ອື່ນ.
ໂດຍ: ແນວລາວ