ວັນທີ 3 ພະຈິກ 2020 ທ່ານ ນາງ ຂັນມະນີ ສຸທຳມະວົງ ຜູ້ອຳນວຍການໃຫຍ່ ສະຖາບັນການເງິນຈຸລະພາກທີ່ຮັບເງິນຝາກ (ສກຈຮ) ປະຕູຄຳ ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ແລະ ໃຫ້ກຳລັງໃຈປະຊາຊົນທີ່ເຮັດຜະລິດຕະພັນຕ່ຳສາດຢູ່ບ້ານຄວາຍແດງ ພາຍຫຼັງ ສກຈຮ ປະຕູຄຳ ອອກຜະລິດຕະພັນເງິນກູ້ຢືມ “ພັດທະນາໜຶ່ງໜູ່ບ້ານ” ເຊິ່ງສະຖາບັນປະຕູຄຳໄດ້ມີແນວທາງພັດທະນາສິນຄ້າທ້ອງຖິ່ນຂອງໜູ່ບ້ານດັ່ງກ່າວໃຫ້ອອກສູ່ທ້ອງຕະຫຼາດ ສົ່ງເສີມຄົນລາວໃຊ້ຜະລິດຕະພັນລາວ ພ້ອມນັ້ນ ປະຕູຄຳຍັງເປັນສະຖາບັນການເງິນໜຶ່ງທີ່ໃຫ້ທືນກູ້ຢືມແກ່ປະຊາຊົນຜູ້ເຮັດການຜະລິດ ເຊິ່ງເຂດບ້ານຄວາຍແດງ ແມ່ນເຮັດການຜະລິດຫັດຖະກຳຕ່ຳສາດຜື ຜ່ານການລົງຢ້ຽມຢາມຄັ້ງນີ້ ເຫັນວ່າປະຊາຊົນມີຄວາມກະຕືລືລົ້ນຢ່າງຫ້າວຫັນ ໃນການຕ່ຳສາດທີ່ມີຂະໜາດ 60 ຊັງຕີແມັດ x 2 ແມັດ ຫຼືສາມາດຕ່ຳຕາມການສັ່ງຈອງຂອງລູກຄ້າ ນອກນັ້ນ ສກຈຮ ປະຕູຄຳ ແລະ ປະຊາຊົນຍັງຕ້ອງການຄວາມຊ່ວຍເຫຼືອຈາກສັງຄົມ ແລະ ພາກສ່ວນອື່ນໆ ໃນການຊອກຕະຫຼາດຈຳໜ່າຍສິນຄ້າຂອງປະຊາຊົນ ແລະ ເຕັກນິກດ້ານວິຊາການອື່ນໆຕື່ມອີກ ເພື່ອພັດທະນາໃຫ້ເປັນຜະລິດຕະພັນສິນຄ້າໂອດ໋ອບຂອງບ້ານດັ່ງກ່າວ.
ສກຈຮ ປະຕູຄຳ ເປັນສະຖາບັນການເງິນຈຸລະພາກໜຶ່ງທີ່ໄດ້ຮັບອະນຸຍາດຈາກທະນາຄານແຫ່ງ ສປປ ລາວ ພາຍໃຕ້ການຄຸ້ມຄອງຂອງກົມການເງິນຈຸລະພາກ ທັງເປັນສະມາຊິກຂອງສະມາຄົມການເງິນຈຸລະພາກ ແລະ ເປັນສະຖາບັນການເງິນແຫ່ງໜຶ່ງທີ່ໄດ້ຮັບເງິນກູ້ຢືມຈາກໂຄງການຂອງທະນາຄານແຫ່ງ ສປປ ລາວ (ໂຄງການ LAFF ຈາກ KFW) ແລະ ໃນເດືອນກັນຍາ ປີ 2020 ສະຖາບັນດັ່ງກ່າວ ໄດ້ອອກຜະລິດຕະພັນເງິນກູ້ຍືມດອກເບ້ຍຕ່ຳໃຫ້ກັບປະຊາຊົນບ້ານຄວາຍແດງ ເມືອງຫາດຊາຍຟອງ ນະຄອນຫຼວງວຽງຈັນ ຈຳນວນ 10 ຄອບຄົວ ເພື່ອເປັນທຶນເຮັດການຜະລິດຫັດຖະກຳຕ່ຳສາດ ຈາກເມື່ອກ່ອນຜະລິດຮັບໃຊ້ໃນຄົວເຮືອນ ໃຫ້ຫັນມາຜະລິດເປັນສິນຄ້າຈຳໜ່າຍອອກສູ່ຕະຫຼາດ ໃນນີ້ ສະຖາບັນເປັນຜູ້ຊອກຕະຫຼາດຈຳໜ່າຍ ໃຫ້ແນໃສ່ເປັນການຊຸກຍູ້ສົ່ງເສີມປະຊາຊົນໃຫ້ມີລາຍຮັບເຂົ້າສູ່ຄອບຄົວ ນອກຈາກປ່ອຍເງິນກູ້ຢືມໃຫ້ແກ່ປະຊາຊົນແລ້ວ ສະຖາບັນດັ່ງກ່າວຍັງໄດ້ສອນປະຊາສຶກສາດ້ານການເງິນ ການອອມເງິນ ການໃຊ້ເງິນໃນສິ່ງຈຳເປັນ ແລະ ບໍ່ຈຳເປັນ ອອກແບບສິນຄ້າ ໃຫ້ຄຳແນະນຳການຄິດໄລ່ຕົ້ນທຶນການຜະລິດ ແລະ ຊອກຕະຫຼາດຈຳໜ່າຍໃຫ້ແກ່ປະຊາຊົນບ້ານຄວາຍແດງນຳອີກ.
# ພາບ & ຂ່າວ: ຂັນທະວີ