ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ພ້ອມຄະນະ ໄດ້ຢ້ຽມຢາມ ແລະ ຕິດຕາມກວດກາຄວາມຄືບໜ້າການປະຕິບັດໂຄງການປຸກສ້າງຫໍສະພາແຫ່ງຊາດຫຼັງໃໝ່ ວັນທີ 2 ພະຈິກ 2020 ຖືກຕ້ອນຮັບຈາກທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ ຫົວໜ້າຄະນະຊີ້ນຳໂຄງການປຸກສ້າງຫໍສະພາແຫ່ງຊາດຫຼັງໃໝ່ ມີພາກສ່ວນກ່ຽວຂ້ອງສອງຝ່າຍເຂົ້າຮ່ວມ.
ທ່ານ ເກດແກ້ວ ສີຫາລາດ ຮອງປະທານກຳມາທິການແຜນການເງິນ ແລະ ການກວດສອບ ຮອງຫົວໜ້າຄະນະຄຸ້ມຄອງໂຄງການປຸກສ້າງຫໍສະພາແຫ່ງຊາດຫຼັງໃໝ່ (ຜູ້ປະຈຳການ) ລາຍງານໃຫ້ຮູ້ວ່າ: ການກໍ່ສ້າງໂຄງການພາກສະໜາມຫໍປະຊຸມແຫ່ງຊາດ ໄດ້ດຳເນີນມາປົກກະຕິ ໂດຍເລີ່ມແຕ່ປີ 2018 ເປັນຕົ້ນມາ ປັດຈຸບັນໄດ້ປະຕິບັດວຽກສຳເລັດຄື: ວຽກໂຄງສ້າງ ວຽກຝາກໍ່ ວຽກຕິດຕັ້ງວົງກົບປະຕູ ວຽກຝາໂບກ ແລະ ວຽກຕິດກາໂລ່ເຊລາມິກສຳເລັດ 100% ວຽກໂອບຫີນ 65% ວຽກລະບົບຕ່າງໆ 85% ສັງລວມການຈັດຕັ້ງປະຕິບັດໜ້າວຽກທັງໝົດແມ່ນສຳເລັດ 80% ສ່ວນແຜນວຽກໃນຕໍ່ໜ້າ ຈະໄດ້ເລັ່ງໃສ່ໜ້າວຽກທີ່ຈຳເປັນເຊັ່ນ: ການຕົບແຕ່ງນອກອາຄານ (ໂອບຫີນ) ທາງເຂົ້າ-ອອກອາຄານ ຫ້ອງໂຖງໃຫຍ່ ເດີ່ນດ້ານນອກອາຄານ ແລະ ບັນດາໜ້າວຽກພື້ນຖານທັງໝົດທີ່ຢູ່ຊັ້ນ 1 ແລະ ຊັ້ນ 2 ຂອງອາຄານ ເພາະວ່າລະບົບການຄຸ້ມຄອງອາຄານທັງໝົດແມ່ນພົວພັນກັບສອງຊັ້ນດັ່ງກ່າວ ແລະ ຄາດວ່າຈະໃຫ້ສຳເລັດທັນແຜນການມອບຮັບຢ່າງເປັນທາງການ ໃນທ້າຍເດືອນມັງກອນ 2021 ທີ່ຈະເຖິງນີ້.
# ພາບ & ຂ່າວ: ຂັນທະວີ